29 ސްކޫލަކަށް ބޭނުންވާ އުމްރާނީ ތަރައްގީގެ ބޮޑު މަޝްރޫއެއް ސަރުކާރުން ފަށައިފިއެވެ.
ތަޢުލީމީ ވުޒާރާގައި ބޭއްވި ރަސްމިއްޔާތެއްގައި 29 ސްކޫލަށް ބޭނުންވާ އުމްރާނީ މަސައްކަތްތައް ވަނީ ކޮންޓްރެކްޓަރުންނާ ހަވާލުކޮށްފައެވެ.
މިމަޝްރޫއުގެ މަސައްކަތްތައް ހަވާލުކޮށްފައިވަނީ، ފަހި ދިރިއުޅުން ކޯޕަރޭޝަނާއި، ރޯޑް ޑިވެލޮޕްމަންޓް ކޯޕަރޭޝަންގެ އިތުރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީއާއެވެ.
މި މަޝްރޫއުގެ ދަށުން ކ. ގުރައިދޫގައި މުޅިން އައު ސްކޫލެއް ތަރައްގީ ކުރުމަށް ވަނީ ހަމަޖެހިފައެވެ. އަދި އިތުރު 28 ސްކޫލަށް ބޭނުންވާ އުމްރާނީ ވަސީލަތްތައްވެސް ޤާއިމުކުރުމަށް ވެސް ވަނީ ހަމަޖެހިފައެވެ. ތައުލީމީ ވުޒާރާއިން ބުނީ، 115 ކްލާސްރޫމާއި، 19 މަލްޓިޕާރޕަސް ހޯލު ތަރައްގީ ކުރުމާއި، ސްކޫލުތަކަށް ބޭނުންވާ އިތުރު އުމްރާނީ ވަސީލަތްތަކުގެ ގޮތުގައި ހިމެނޭ 219 ފެސިލިޓީއެއް ގާއިމުކުރުމަށް މިހާރު ހަވާލުކޮށްފައިވާ ކަމަށެވެ.
އެ ގޮތުން އެފްޑީސީއާއި މަސައްކަތް ހަވާލުކުރި ސްކޫލުތަކުގެ ތެރޭގައި ހިމެނެނީ، ކޮނޑޭ ސްކޫލް، ފިއްލަދޫ ސްކޫލް، މުރައިދޫ ސްކޫލް، ރަސްމާދޫ ސްކޫލް، ކިނޮޅަހު ސްކޫލް، ގއ.މާމެންދޫ ސްކޫލް، ހއ.ތަކަންދޫ ޝަހީދު ޢަލީ ތަކުރުފާނު ސްކޫލް، ވަށަފަރު ސްކޫލްމަޑުއްވަރީ ސްކޫލް، ވާދޫ ސްކޫލް، އަނގޮޅިތީމު ސްކޫލް، ރިނބުދޫ ސްކޫލް، ހުޅުދެލި ސްކޫލް، ދާންދޫ ސްކޫލް، ގެމަނަފުށީ ސްކޫލް، ނަޑެއްލާ ސްކޫލް، މަޑަވެލި ސްކޫލް، ގއ.ދެއްވަދޫ ސުލްޠާން މުޙައްމަދު ސްކޫލްގެ އިތުރުން ރަތަފަންދޫ ސްކޫލް ހިމެނެއެވެ.
އާރްޑީސީއާ މަސައްކަތް ހަވާލުކުރި ސްކޫލްތަކުގެ ތެރޭގައި، އުލިގަމު ސްކޫލް، އިހަވަންދޫ ސްކޫލް، ހުޅުދުއްފާރު ސްކޫލް، ރ.އަތޮޅު ތައުލީމީ މަރުކަޒު، ގާފަރު ސްކޫލް ގެ އިތުރުން ގުރައިދޫ ސްކޫލް ހިމެނެއެވެ.
އެމްޓީސީސީއާ މަސައްކަތް ހަވާލުކުރި ސްކޫލްތަކުގެ ތެރޭގައި، އުލިގަމު ސްކޫލް، އިހަވަންދޫ ސްކޫލް، ހުޅުދުއްފާރު ސްކޫލް، ރ.އަތޮޅު ތައުލީމީ މަރުކަޒުގާފަރު ސްކޫލް، ގުރައިދޫ ސްކޫލް، އިންނަމާދޫ ސްކޫލް، ފިޔޯރީ ސްކޫލް، ށ.ފޭދޫ ސްކޫލްގެެ އިތުރުން ދަރަނބޫދޫ ސްކޫލް ހިމެނެއެވެ.
ސްކޫލްތަކަށް އުމްރާނީގޮތުން ބޭނުންވާ ވަސީލަތްތަކާއި، އެހެނިހެން ވަސީލަތްތައް ހަމަކުރުމަށް ސަރުކާރުން ދަނީ މަސައްކަތް ކުރަމުންނެވެ.