ރ. އުގޫފާރު ރީޖަނަލް ހޮސްޕިޓަލްގައި ކީމޯތެރަޕީގެ ހިދުމަތް ފެށުމަކީ ލިބުނު ބޮޑު ލުޔެއް ކަމުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ފާހަގަކުރައްވައިފިއެވެ.
އެމަނިކުފާނު މިފަދައިން ވިދާޅުވީ، ބައިނަލްއަގުވާމީ ފެންވަރުގައި މިއަދު ފާހަގަކުރަމުންދާ ދުނިޔޭގެ ކެންސަރު ބަލީގެ ދުވަހާ ގުޅިގެން ރަސްމީ އެކްސް އެކައުންޓްގައި ހިއްސާކުރެއްވި ހާއްސަ މެސެޖުގައެވެ.
ރައީސްގެ މެސެޖުގައި، ކެންސަރު ބަލީގެ ކޮންމެ މީހެއްގެ ވާހަކައަކީވެސް ހާއްސަކަމެއް ލިބިފައިވާ ތަފާތު ވާހަކައެއް ކަމުގައި ވަނީ ވިދާޅުވެފައެވެ. އަދި ބަލި ޖެހޭ މީހުންގެ އަދަދު އިތުރުވުމުގެ ސަބަބުން ރާއްޖޭގެ ގިނަ އާއިލާތަކަކަށް ނަފްސާނީ ގޮތުން ނޭދެވޭ އަސަރު ފޯރުމުގެ އިތުރުން، ފަރުވާއަށް ހިނގާ މާލީ ހަރަދުތަކުގެ ސަބަބުންވެސް ނުތަނަވަސްކަމާ ކުރިމަތިކުރުވާކަން އެމަނިކުފާނުގެ މެސެޖުގައި ވަނީ ފާހަގަކުރައްވާފަ އެވެ.
އެ މަނިކުފާނުގެ މެސެޖުގައި، ކެންސަރު ކޮންޓްރޯލްކުރުމުގެ ގައުމީ ޕްލޭން 2022-2026 ގެ ދަށުން، ކެންސަރު ބަލިން ރައްކާތެރިވުމާއި، ދުރާލާ ބަލި ދެނެގަނެ، ފަރުވާ ދިނުމާއި، ޕެލިއޭޓިވް ކެއަރ ހަރުދަނާ ކުރުމަށް ކުރަމުންދާ މަސައްކަތްތަކުގެ މައްޗަށްވެސް އަލިއަޅުއްވާލެއްވިއެވެ. އެގޮތުން އަސާސީ ސިއްހީ ހިދުމަތްތައް ހަރުދަނާކުރުމާއި، ދުންފަތް ކޮންޓްރޯލް ކުރުމަށް ފިޔަވަޅުތައް އެޅުމުގެ އިތުރުން، ބައިނަލްއަގުވާމީ ބައިވެރިންނާ ގުޅިގެން ކުރެވެމުންދާ މަސައްކަތްތައް ވެސް އެ މަނިކުފާނު ފާހަގަކުރެއްވިއެވެ.
ހަމަމިއާއެކު، މާލެ ފިޔަވައި ރާއްޖޭގެ އެހެން ސަރަހައްދުތަކުގައި ބަލިމީހުންނާއި އާއިލާތަކާ ގާތުން އޮންކޮލޮޖީ ފަރުވާ ފޯރުކޮށްދިނުމަށް ކުރެވޭ މަސައްކަތްތަކުގެ ދަށުން، ރ. އުނގޫފާރު ރީޖަނަލް ހޮސްޕިޓަލުގައި ކީމޯތެރަޕީގެ ހިދުމަތްތައް، މިދިޔަ ޖަނަވަރީމަހުގެ ތެރޭގައި އިފްތިތާހްކުރެވިފައިވާކަންވެސް ރައީސްގެސެޖުގައި ފާހަގަކުރެއްވިއެވެ.
ރައީސް ވަނީ، ސިއްހީ ދާއިރާގައި ހަރަކާތްތެރިވާ ފަރާތްތަކާއި، އަމިއްލަ ޖަމްއިއްޔާތަކުން ކުރަމުންދާ މަސައްކަތްތައް ފާހަގަކުރައްވައި އެފަރާތްތަކަށް، ތައުރީފު ކުރައްވާފައިވެއެވެ. އަދި ކޮންމެ މީހެއްގެ ވާހަކައަކީވެސް މުހިންމު ވާހަކައެއްކަމާއި، ކޮންމެ ފުރާނައަކީވެސް މުހިންމު ފުރާނައެއްކަން ފާހަގަކުރައްވާ، މިކަމުގައި އެންމެން ގުޅިގެން މަސައްކަތްކުރުމަށް އެ މަނިކުފާނުގެ މެސެޖުގައި ގޮވާލެއްވިއެވެ.
ރައީސް ވިދާޅުވީ، ކެންސަރު ބަލީގައި ކޮންމެ އަހަރަކުވެސް އެތައް ބައެއްގެ ފުރާނަ ގެއްލިގެންދާކަމަށި، ބައްޔާ މެދު ހޭލުންތެރިކަން އިތުރުކޮށް، ބަލިން ރައްކާތެރިވުމަށާއި، ކެންސަރު ބަލި ޖެހިފައިވާ މީހުންނަށް އެހީތެރިކަން ފޯރުކޮށްދިނުމުގައި އެންމެން ގުޅިގެން މަސައްކަތް ކުރުން މުހިންމު ކަމަށް ވިދާޅުވެފައެވެ.
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދުވެސް ވަނީ ދުވަހާ ގުޅިގެން އެކްސްގައި ޕޯސްޓެއް ހިއްސާކުރައްވާފައެވެ. އެ ކަމަނާގެ ރަސްމީ އެކްސް އެކައުންޓުގައި ހިއްސާކުރެއްވި ޕޯސްޓުގައި ވިދާޅުވީ، އެކަމަނާ ހުންނެވީ ކެންސަރު ބަލީގެ ޕޭޝަންޓުންނާއި، ބަލިޖެހުމަށްފަހު އެ ބަލިން ސަލާމަތްވެފައިވާ މީހުންގެ އިތުރުން އެފަދަ ހުރިހާ ފަރާތްތަކަކަށް އެހީތެތިވެދެއްވާ ބޭފުޅުންނާއެކުގައި ކަމުގައި ކަމަށެވެ. އަދި ދިރިއުޅުމުގެ ކޮންޓްރޯލް، ކެންސަރަށް ލިބިގެންނުވާ ފަދަ މުސްތަގުބަލެއް ބިނާކުރުމަށް އެންމެން ގުޅިގެން މަސައްކަތްކުރުމަށްވެސް މެޑަމް އެދިވަޑައިގެންފައިވެއެވެ.
ކޮންމެ އަހަރެއްގެ ފެބްރުއަރީ މަހުގެ 4 ވަނަ ދުވަހަކީ ދުނިޔޭގައި ފާހަގަކުރާ ކެންސަރު ބަލީގެ ދުވަހެވެ. އެގޮތުން މުޖުތަމައުގައި ކެންސަރު ބަލި ގިނަވެފައިވާއިރު ބައްޔާމެދު ހޭލުންތެރިކަން އިތުރުކުރުކޮށް ދުރާލާ ބަލިން ރައްކާތެރިވެވޭނެ މަގުފަހިކުރުމަށްދަނީ މަސައްކަތް ކުރަމުންނެވެ. ހަމައެއާއެކު ދުރާލާ ބަލި ޖެހިފައިވާކަން ދެނެގަނެވޭނެ އިންތިޒާމު ހަމަޖައްސާ ބަލީގެ ފަރުވާ މާލެއާއި އަތޮޅުތަކުގައި ފުޅާކުރުމަށްވެސް ސަރުކާރުން ދަނީ މަސައްކަތް ކުރަމުންނެވެ.