ވިލުފުށި ދާއިރާގެ ކުރީގެ މެމްބަރު ރިޔާޒް ރަޝީދު ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ތައުރީފް ކުރައްވައިފިއެވެ.
ރިޔާޒް އެކްސްގައި ކުރެއްވި ޕޯސްޓެއްގައި ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބުގައި ވިލުފުށި ކައުންސިލުގެ ގޮނޑިތައް ވޯޓަކާ ނުލައި ސަރުކާރު ހިންގާ ޕާޓީ، ޕީޕަލް ނޭޝަނަލް ކޮންގްރެސް (ޕީއެންސީ) އަށް ކަށަވަރުކަމަށެވެ.
ރިޔާޒު ވިދާޅުވީ ތ. ވިލުފުށި ކައުންސިލުގެ ގޮނޑިތައް އިންތިހާބަކާ ނުލައި ޕީއެންސީއަށް ދިނީ އެރަށުގެ ރައްޔިތުން ކުރިއަށްދާން ބޭނުންވަނީ ތަރައްގީއާ އެކުގައިކަން ސާބިތުކޮށް ދިނުމަށް ކަމަށެވެ.
ރިޔާޒް ވިދާޅުވީ ވިލުފުށި ކައުންސިލުގެ ގޮނޑިތައް އިންތިޚާބަކާ ނުލައި ޕީއެންސީއަށް ދިނީ މި ސަރުކާރުން ވިލުފުށީގައި ކުރިއަށްގެންދާ އެއަރޕޯޓާއި ހޮސްޕިޓަލް އަދި އެނޫންވެސް ގިނަ މަޝްރޫތައް މަޑުޖެހުމަކާ ނުލައި ކުރިއަށް ގެންދާތީ ކަމަށެވެ.
ރިޔާޒު ވަނީ ވިލުފުށީ ރައްޔިތުންނަށާއި ގޮނޑިތައް ލިބުނު ހުރިހާ ކެންޑިޑޭޓުންނަށް މަރުހަބާ ދަންނަވާފައެވެ.
އަންނަ އޭޕްރީލް 4 ވަނަ ދުވަހު އޮންނަ ލޯކަލް ކައުންސިލް އިންތިހާބުގައި އެންމެ ގިނަ އަދަދެއްގެ ކެންޑިޑޭޓުން ނުކުންނަނީ ޕީއެންސީންނެވެ. އެ ޕާޓީން އެކަނިވެސް 1،320 ކެންޑިޑޭޓުން ވާދަކުރެއެވެ. ދެވަނަ އަށް އެންމެ ގިނަ އަދަދެއްގެ ކެންޑިޑޭޓުން ނުކުންނަނީ އިދިކޮޅު އެންމެ ބޮޑު ޕާޓީ، އެމްޑީޕީންނެވެ.
މި އިންތިހާބުގައި ރަށު ކައުންސިލްތަކަށް 626 އަދި ސިޓީ ކައުންސިލްތަކަށް 52 ކައުންސިލަރުން އިންތިހާބު ކުރާނެއެވެ. އަދި އަންހެނުންގެ ކޮމިޓީތަކަށްވެސް އެ އަދަދަށް މެންބަރުން އިންތިހާބު ކުރާނެއެވެ.
މި އިންތިހާބުގައި 294,937 މީހުންނަށް ވޯޓުލުމުގެ ހައްގު ލިބިގެންވާއިރު އޭގެ ތެރޭގައި ހިމެނެނީ 144,527 އަންހެނުންނާއި 150,410 ފިރިހެނުންނެވެ.