ކެންސަރު ބަލި އިތުރުވުމަކީ ގައުމުގެ އުފެންދުންތެރިކަމަށް އޮތް ބޮޑު ނުތަނަސްކަމެއްކަމުގަ ސިއްހީ ވަޒީރު އަބްދުﷲ ނާޒިމް އިބްރާހީމް ވިދާޅުވެއްޖެއެވެ.
ދުނިޔޭގެ ކެންސަރު ދުވަސް ފާހަގަކުރުމަށް ބޭއްވި ސިމްޕޯސިއަމް ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ވަޒީރު ވިދާޅުވީ ރާއްޖޭގައި ކެންސަރު ބަލިން އަރައިގަތުމަށްޓަކާ މުޖުތަމައެއްގެ ގޮތުގައި ކުރެވިދާނެ ގިނަ ކަންތައްތަކެއް އަދިވެސް އެބަހުރިކަމަށެވެ.
ރާއްޖޭގެ މައި ހޮސްޕިޓަލުގައި ރަސްމީ ސިފައެއްގައި ކެންސަރުގެ ފަރުވާ ފެށިފަވަނީ 2017 ވަނަ އަހަރުކަން ފާހަގަކުރައްވާ ވަޒީރު ވިދާޅުވީ އޭގެ ކުރިންވެސް އެކި ގޮތްގޮތުން އެއިރަކު ދެވެން ހުރި ފަރުވާއެއް އަބަދުވެސް ދެމުން ގެންދިޔަކަމަށެވެ.
ބައެއް ތަފާސްހިސާބުތައް ދައްކާގޮތުން 2017 ވަނަ އަހަރު ފެށިގެން މިއަދާ ހަމަޔަށް، ގާތްގަނޑަކަށް 1900 މީހުން ކެންސަރު ޕޭޝަންޓުންގެ ގޮތުގައި، ކެންސަރު ބަލީގެ ގައުމީ ދަފްތަރުގައި ރަޖިސްޓްރީކޮށްފައިވާކަން ވަޒީރު ފާހަގަކުރެއްވިއެވެ. އަދި 2017 ވަނަ އަހަރުން ފެށިގެން 2025 ވަނަ އަހަރުގެ ނިޔަލަށް 1900 މީހުން ފަރުވާ ހޯދާފައިވާއިރު އެއީ ގާތްގަނޑަކަށް އަހަރަކަށް 230 އަށްވުރެ ގިނަ މީހުންކަން ވަޒީރު ފާހަގަަކުރެއްވިއެވެ.
ވަޒީރު ވިދާޅުވީ މި ގޮންޖެހުމުން އަރައިގަތުމަށް އެންމެން ގުޅިގެން އެކި ފަންތީގައި މަސައްކަތް ކުރަން ޖެހޭކަމަށެވެ.
އެގޮތުން ތަފާސްހިސާބުތައް ބެލެހެއްޓޭނެ ރަނގަޅު ނިޒާމެއް ގާއިމްކުރަން ޖެހޭކަމަށާއި، ބޭސްފަރުވާގެ ޚިދުމަތް ފުޅާކުރުމަށްޓަކައި ބޭނުންވާ ވަސީލަތްތައް އިތުރުކުރުމާއި ރައްޔިތުންގެ ދިރިއުޅުމުގެ ވައްޓަފާޅިއަށް ގެންނަންޖެހޭ ބަދަލުތައް ގެނައުމަށްޓަކައި ދައްކަންޖެހޭ ރިވެތި މިސާލު މުޖުތަމައުން ދެއްކުމާއި، ގާނޫނާ ގަވާއިދުތަކުގެ ތެރެއިން މިކަމަށް އަޅަންޖެހޭ ފިޔަވަޅުތައް އަޅަންޖެހޭކަމަަށް ވަޒީރު ވިދާޅުވިއެވެ.
ވަޒީރު ވިދާޅުވީ ކެންސަރު ބަލި ކޮންޓްރޯލް ކުރުމަށްޓަކައި ހުރިހާ އިދާރާތަކުން ޕްލޭން ކުރެވިގެން އިސްތިރާޖީ މަސައްކަތްތަކެއް ކުރުން އެއީ ކޮންމެހެންވެސް ކުރަންޖެހިފައިވާ ކަމެއްކަމަށެވެ. އެއީ ގައުމުގެ އުފެއްދުންތެރިކަމަށްވެސް އޮތް ވަރަށް ބޮޑު ނުތަނަވަސްކަމެއް ކަމަށާއި މިކަމުގެ ސަބަބުން މުޖްތަމައަށް ކުރާނެ އަސަރު ބަޔާން ކުރަން އެނގިވަޑައިނުގަންނަވާ ކަމަށް ވެސް ވަޒީރު ވިދާޅުވިއެވެ.
ވަޒީރު ވިދާޅުވިީ ސަރުކާރުގެ ސިޔާސަތުގެ ތެރޭގައި މި ހުރިހާ ދިމާލަކުން އެކި ފަންތީގެ އެކި މަރުހަލާތަކުގައި މަސައްކަތް ކުރަމުންދާކަމަށެވެ. އެގޮތުން ރާއްޖޭގައި ދުންފަތުގެ އިސްތިއުމާލުކުރުން ކޮންޓްރޯލް ކުރުމަށްޓަކައި މުހިންމު ފިޔަވަޅުތަކެއް އަޅާފައިވާއިރު މިއަދު ސަރުކާރުގެ އެންމެ މަތީ ފަންތީގައި މިކަމަށް އިސްކަންދީ އެކަމަށް އެއްްބާރުލުން ދޭތަން ފެންނަމުންދާކަމަށް ނާޒިމް ވިދާޅުވިއެވެ.
ކެންސަރު ޑިޕާޓްމަންޓަށް ވަސީލަތްތައް ފޯރުކޮށްދިނުމާއި، އެޗްޕީއޭއާއި އެންސްޕާގެ ތެރެއިން އޭގެ ގަވާނެންސް ހަރުދަނާކޮށް އޭގެ ޕްލޭން އެކުލަވާލުމުގެ މަސައްކަތް ކުރަމުންދާކަމަށް ވަޒީރު ވިދާޅުވިއެވެ.
ބަލިތަކަށް ދެވޭ ފަރުވާ ހަރުދަނާކުރުމަށް މަސައްކަތްކުރާއިރު އެންމެ އިސްކަމެއް ދޭންޖެހެނީ ބަލި ޖެހުމުގެ ކުރިން، ދުރާލާ ރައްކާތެރިވުމަށް މަސައްކަތް ކުރުމަށް ކަން ވަޒީރުވަނީ ފާހަގަކުރައްވާފައެވެ. މިކަމަށްޓަކައި ހޭލުންތެރިކަން އިތުރުކުރުމަށް ކޮންމެ އަހަރެއްގެވެސް ފެބުރުވަރީ މަހުގެ 4 ވަނަ ދުވަސް ފާހަގަކުރަނީ ދުނިޔޭގެ ކެންސަރު ބަލީގެ ދުވަހުގެ ގޮތުގައެވެ.