ލާ މަރުކަޒީ ނިޒާމު ފެށުނީ މި ސަރުކާރު ދައުލަތާ ހަވާލުވީފަހުން ކަމަށް މިނިސްޓަރ އޮފް އިކޮނޮމިކް ޑިވްލޮޕްމެންޓް އެންޑް ޓްރޭޑް މުހައްމަދު ސައީދު ވިދާޅުވެއްޖެއެވެ.
ކޮންގްރެސް ޕާޓީގެ މާފަންނު ހުޅަނގު ދާއިރާގެ ކެމްޕެއިން ޖަގަހަ ހުޅުވުމަށް ބޭއްވި ޖަލްސާގައި ވާހަކަ ދައްކަވަމުން ސައީދު ވިދާޅުވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ކެމްޕެއިން ކުރެއްވުމުގެ ތެރެއިން ވީ ހުރިހާ ވައުދެއް، ފޮތެއްގައި ލިޔުއްވާ، ޗާޕު ކުރައްވާ، ކައުންސިލްތަކަށް ފޮނުވާފައިވާނެކަމަށެވެ.
އެއްވެސް ދުވަސްވަރެއްގަ، ވައުދުތަކެއް ވެފައި އެވައުދުތައް ޗާޕުކޮށް، ދެފުށް ފެންނަ، ވަކި އުސޫލެއްގެ ތެރެއިން ކުރާ މަސައްކަތެއްގެ ގޮތުގައި ރައްޔިތުންނަށް ހާމަކަން ބޮޑު ގޮތެއްގައި، އެއްވެސް ވެރިއަކު މިހާތަނަށް ވެރިކަން ކޮށްފައި ނުވާކަން ސައީދު ފާހަގަކުރެއްވިއެވެ.
ސައީދު ވިދާޅުވީ ވައުދުތައް ފުއްދާނެކަން ޔަގީން ކޮށްދިނުމަށް، ވޯޓު ދިން ރައްޔިތުމީހާގެ އަތަށް އެ ވައުދުތައް ފޮނުވާފައިވާނެކަމަށެވެ.
ކުރީގެ ސަރުކާރުތަކުގައި ވައުދުތައް ވެފައި، އެ ވައުދުތައް އަވަހަށް ފޮރުވޭތޯ ބަލާކަން ފާހަގަކުރައްވާ ސައީދު ވިދާޅުވީ ވައުދު ފުއްދުމުގެ ބަދަލުގައި އެ ވައުދެއް ރައްޔިތުން ހަނދާން ނެތޭވަރު ކުރުމަށްފަހު، ދެން އެ ވައުދެއްގެ ވާހަކަ ނުދައްކަވާ ކަމަށެވެ.
ރައްޔިތުންގެ މަޖިލިސް، ކޮންގްރެސް ޕާޓީ އަށް ލިބުނަސް އޭގެއިން ނާޖާއިޒް ފައިދާ ނަގާފައި ނުވާކަން، އިންސާފަށް ވިސްނާ މީހުންނަށް އިނގޭނޭކަމަށް އޭނާ ވިދާޅުވިއެވެ. އަދި ކޮންމެ ގާނޫނަކާއި ކޮންމެ މަސައްކަތެއް ކޮށްފައިވާނީ ރާއްޖޭގައި ސުލްހަ މަސަލަސްކަން ގާއިމުކުރުމަށް ކަމަށް އިންސާފުގެ ތެރެއިން ބެލުމުން އެނގޭނެކަމަށް ވެސް ސައީދު ވިދާޅުވިއެވެ.
ސައީދު ވިދާޅުވީ މި ސަރުކާރު ޕާޓީގެ ކެންޑިޑޭޓުން ހޮވުމުން މަސައްކަތްތައް ފަސޭހަވެގެން ދިޔުމުގެ އިތުރުން ވައުދުތައް ފުއްދުމުގެ ޔަގީންކަން އޮތްކަމަށެވެ. އެނާ ވަނީ ދައުލަތުގެ ޕާޓީ އަށް ވޯޓު ދިނުމަށް އިލްތިމާސް ކުރައްވާފަ އެވެ.