ގަވައިދުން މެޑިކަލް ޗެކަޕް ހެދުން މުހިއްމު ކަމަށް މިނިސްޓަރ އޮފް ހެލްތު އަބްދުﷲ ނާޒިމް އިބްރާހީމް ވިދާޅުވެއްޖެއެވެ.
"ތަރުޖަމާނާއެކު" ޕްރޮގުރާމްގައި ވާހަކަ ދައްކަވަމުން ނާޒިމް ވިދާޅުވީ މިހާރު އާސަންދައިގެ ދަށުން މެޑިކަލް ޗެކަޕް ހެދޭނެގޮތް ހަމަޖެހިފައިވާކަމަށެވެ. އެހެންކަމުން ފައިސާ ނެތިގެންނޭ ބުނެ ނުވަތަ އަމިއްލަ އަށް ނުއުފުލޭ ބުރައެއް ކަމަށް ބުނެ ދެއްކޭނެ އުޒުރެއް ނޯންނާނެ ކަމަށް ވިދާޅުވިއެވެ.
ނާޒިމް ވިދާޅުވީ އުމުރުން ދުވަސް ވާ ވަރަކަށް މެޑިކަލް ޗެކަޕް ހެދުން މުހިއްމު ކަމަށެވެ.
ރާއްޖޭއަށް ލިބިފައިވާ އެންމެ ބޮޑު އެއް ނަސީބަކީ ރާއްޖޭގެ ކޮންމެ މީހެއް ވެސް ހެލްތު ޕްރޮފެޝަނަލެއްގެ ކުރިމަތީގައި އުފަންވުން ކަމަށާ އޭގެތެރޭގައި ނަރުހުންނާއި، ޑޮކްޓަރުނާއި ސިއްހީ ތަޖުރިބާކާރުން ހިމެނޭކަމަށް ނާޒިމް ވިދާޅުވިއެވެ.
މީގެ އިތުރުން ރާއްޖޭގައި ވެކްސިން ދިނުމުގެ މުހިންމުކަން ފާހަގަކުރައްވާ ނާޒިމް ވަނީ އިތުރު ދެ ވެކްސިން މިއަހަރު ތައާރަފް ކޮށްފައިވާ ކަމުގައި ވިދާޅުވެފަ އެވެ. އަދި ރައްޔިތުން އެ ހިދުމަތް ބަލައިގަންނަ ކަމަށް ނާޒިމް ވިދާޅުވިއެވެ.
ނާޒިމް ވިދާޅުވީ ނިޒާމެއްގެ ގޮތުގައި ޕްރައިމަރީ ހެލްތު ކެއާ އިން މިހާރު ދެމުންދާ ހިދުމަތްތައް ދެމެހެއްޓުމަކީ އެންމެ މުހިއްމު ކަންތައް ކަމަށެވެ.