ދިވެހިން ކެއުންބުއިމުގައި އިހުޒަމާނުގައި ބޭނުންކުރި އެކި އުފެއްދުންތައް ހިމެނޭގޮތަށް އިސްރަށްވެހިންގެ "ރަހަފަތް" މައުރަޒުގައި ހުޅުވައިފިއެވެ.
މި މައުރަޒަކީ ދިވެހި ސަގާފީ ކާބޯތަކެއްޗާއި، ހާއްސަކޮށް ރަމަޟާން މަހަށް ތައްޔާރުވުމުގެ ގޮތުން ބޭނުންކުރާ ދިވެހި ރަހަތައް ދައްކާލުމަށް ބާއްވާ މައުރަޒެއްކެވެ.
މިމައުރަޒު ހުޅުއްވައިދެއްވީ ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމާއި، އިޖްތިމާއީ އަދި އާއިލީ ތަރައްގީއާ ބެހޭ ވަޒީރު ޑރ. އައިޝަތު ޝިހާމް އެވެ.
މިމައުރަޒު ހުޅުވުމަށްފަހު އިޖްތިމާއީ އަދި އާއިލީ ތަރައްގީއާ ބެހޭ ވަޒީރު ޑރ. އައިޝަތު ޝިހާމް ވިދާޅުވީ މިފަދަ ހަރަކާތެއް ބޭއްވުމުގެ ބޭނުމަކީ އިސްރަށްވެހިންގެ ނާދީގެ މެންބަރުންނަށް އުފާވެރި މާހައުލެއް ގާއިމްކޮށްދިނުންކަމަށެވެ. އަދި އަންނަން އޮތް ޖީލުގެ ކުދިންނަށް މިފަދަ މައުލޫމާތުތައް ފޯރުކޮށްދިނުމަކީވެސް ބޭނުމެއްކަމަށް ވަޒީރު ވިދާޅުވިއެވެ.
ދިވެހިބަހާއި ސަގާފަތާއި ތަރިކައާއި ބެހޭ ވަޒީރު އާދަމް ނަސީރު އިބްރާހީމް ވިދާޅުވީ މިފަދަ މައުރަޒުތަކުގެ ސަބަބުން އިސްރަށްވެހިންނަށް އެ ފަރާތްތަކުގެ ހުނަރު ދައްކާލުމުގެ ފުރުސަތު ފަހިވެގެންދާކަމަށެވެ. އަދި އެބައެއްގެ ރަހައަކީ ތަރިކައާއި ސަގާފަތުގެ މުހިންމު ބައެއްގެ ގޮތުގައި ވަޒީރު ފާހަގަކުރެއްވިއެވެ.
މި ފަދަ މައުރަޒުތައް ބޭއްވުމަކީ ވަރަށް ހިތްހަމަޖެހޭ ކަމެއްކަމަށް މި މައުރަޒުގެ ބައިވެރިން ބުނެއެވެ. އަދި ދިވެހި ރަހަތައް ދައްކާލުމަށް ފުރުސަތު ލިބުމުން އުފާވާކަން ފާހަގަކޮށްފައިވެއެވެ.
މި މައުރަޒުގައި ޖުމްލަ 77 ބައިވެރިން ހިމެނޭ އިރު މައުރަޒުގައި އެކި ބާވަތުގެ 2000 އަށް ވުރެ ގިނަ އައިޓަމް ހިމެނެއެވެ. މައުރަޒު ހުޅުވުމާއެކު ހާއްސަ މާހެފުމެއްވެސް ވަނީ ބާއްވާފައެވެ. މި މާހެފުމުގެ އިސްރަށްވެހިންގެ ނާދީގެ މެންބަރުން ވަނީ ދިވެހި ރަހަތަކުގެ 33 ބާވަތެއް ތައްޔާރުކޮށްފައެވެ.
އާންމުންނަށް ވަދެވޭގޮތަށް މައުރަޒު ހުޅުވާލާފައިވާއިރު މައުރަޒު ކުރިއަށްދާނީ މިމަހުގެ 7 ގެ ނިޔަލަށް ކަމަށް މައުލޫމާތުދެއެވެ.މީގެ އިތުރުން މައުރަޒު ހުޅުވިފައި ހުންނާނީ ހުކުރުދުވަސް ފިޔަވައި ކޮންމެ ދުވަހެއްގެ 14:00 އިން 18:00 އަށެވެ. އަދި 20:00 އިން 22:00 އަށެވެ. ހުކުރު ދުވަހު 18:00 އިން 16:00އަށް އަދި 20:00 އިން 22:00 މައުރަޒަށް ޒިޔާރަތްކުރެވޭނެއެވެ.