ކުރިޔަށް އޮތް ރަމަޟާން މަހަށް ހާއްސަ ކޮށްގެން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލެ ދެވަނަ ފިޔަވަހީގައި ގާއިމްކުރި ރޯދަ މާރުކޭޓުން ދިވެހިންނަށް ގޮޅި ދޫކުރަން ހުޅުވާލައިފިއެވެ.
އެޗްޑީސީން އާންމުކޮށްފައިވާ ބަޔާނެއްގައި ބުނީ، މި މާރުކޭޓުން ގޮޅި ދޫކުރަނީ ހިލޭ ކަމަށާއި އެއްވެސް ކުއްޔެއް ނުނަގާނެ ކަމަށެވެ. އަދި މި ގޮޅިތަކުގައި ވިއްކޭނީ މަހުގެ ބާވަތްތަކާއި، މޭވާއާއި، ތަރުކާރީ އަދި އެހެނިހެން ދިވެހި ކާބޯތަކެތީގެ ބާވަތްތައް ކަމަށެވެ.
މި މާރުކޭޓުގެ ގޮޅިތަކަށް އެދި ހުށައަޅާ ފޯމު ބަލައިގަތުމާއި ގުރުއަތު ނެގުން އޮންނާނީ، މި މަހުގެ 5 ވާ، ބުރާސްފަތި ދުވަހުގެ ހަވީރު 15:30 ގައި އެޗްޑީސީ ކަސްޓަމާ ކެއާ އޮފީހުގައި ކަމަށް އެޗްޑީސީން މައުލޫމާތުދެއެވެ. އަދި ގޮޅިއަށް އެދި ހުށައަޅަން ޖެހޭ ފޯމް އެޗްޑީސީގެ ވެބްސައިޓުން ލިބެން ހުންނާނެ ކަމަށް ވަނީ ބުނެފައެވެ.
މި މާރުކޭޓު ގާއިމުކޮށްފައިވަނީ، ވިނަރެސް ޓަވަރު 8 އާއި، އެ ސަރަހައްދުގައި ހުންނަ ވަގުތީ މިސްކިތާ ދޭތެރޭގައެވެ.
އެޗްޑީސީން މަސައްކަތް ކުރަނީ ހުޅުމާލެއަކީ، ހުރިހާ ހިދުމަތެއް ފަސޭހައިން ލިބެން ހުންނަ ތަނަކަށް ހެދުމަށް ކަމަށް އެ ކޯޕަރޭޝަނުން ބުނެއެވެ.
ކޮންމެ އަހަރެއްގެވެސް ރަމަޟާން މަހަށް ތައްޔާރުވުމުގެ ގޮތުން އެޗްޑީސީން އަންނަނީ، ގިނަ މަސައްކަތްތަކެއް ކުރަމުންނެވެ. މި މަސައްކަތްތަކުގެ ތެރެއިން ތަރައްގީކުރި ރޯދަ މާރުކޭޓަކީ ދެވަނަ ފިޔަވަހީގައި ދިރިއުޅޭ ފަރާތްތަކަށް ފަސޭހަކަމާއެކު އެކި ބާވަތްތަކުގެ ކާބޯތަކެތި ލިބޭނެ އިންތިޒާމު ހަމަޖެއްސުމަށް ރަމަޟާން މަހަށް ހާއްސަކޮށްގެން ތަރައްގީކުރި ތަނެކެވެ.