1447 ވަނަ އަހަރުގެ ރަމަޟާންމަހުގެ އިނާޔަތް މި މަހުގެ 12 ވަނަ ދުވަހު ދިނުމަށް ހަމަޖެހިފައިވާ ކަމަށް ފިނޭންސް މިނިސްޓްރީން ބުނެފި އެވެ.
ފިނޭންސް މިނިސްޓްރީން އާންމުކުރި ސާކިޔުލާއެއްގައި ރޯދަ މަހުގެ އިނާޔަތް ދިނުމުގައި އަމަލުކުރާނެ ގޮތް ބަޔާންކޮށްފައިވެ އެވެ. އެގޮތުން ވަޒީފާ އަދާކުރާ ކޮންމެ މުސްލިމަކަށް ރޯދަ މަހުގެ އިނާޔަތުގެ ގޮތުގައި 3000 ރުފިޔާ ދިނުމަށް ހަމަޖެހިފައިވެ އެވެ.
ފިނޭންސް މިނިސްޓްރީން ބުނީ އެއް ވަޒީފާއަށްވުރެ ގިނަ ވަޒީފާ އަދާކުރާ މުވައްޒަފުންނަށް އިނާޔަތް ދޭއިރު އިނާޔަތް ދޭން ޖެހޭނީ އެ މުވައްޒަފެއްގެ އަސާސީ ވަޒީފާ އަދާކުރަމުންދާ އޮފީހަކުން ކަމަށެވެ. އަދި އިތުރު އޮފީހަކުން އިނާޔާތުގެ ފައިސާ ނުދިނުމަށް އަންގާފައިވެ އެވެ.
ރޯދަ މަސް ފެށޭއިރު ނޯ ޕޭ ލީވްގައި ތިބޭ މުވައްޒަފުންނާއި ސޮކޮލަޝިޕްތަކުގައި ޕޭ ލީވްގައި ތިބޭ މުވައްޒަފުން އިނާޔަތް ލިބޭ މުވައްޒަފުން ތެރޭ ނުހިމެނޭނެ ކަމަށް އަންގާފައިވެ އެވެ. އެހެންނަމަވެސް މިއިން މުވައްޒަފަކު ރޯދަ މަހުގެ ތެރޭގައި އެނބުރި ވަޒީފާއަކަށް ނުކުމެއްޖެނަމަ އެ ދުވަހަކުން ފެށިގެން ރޯދަ މަހުގެ ނިޔަލަށް ޖެހޭ އަދަދު ބަލައި އެ މިންވަރަށް އިނާޔަތުގެ ފައިސާ ދެވޭނެ އެވެ.
ރަމަޟާން މަހުގެ އިނާޔަތުގެ ގޮތުގައި ވަޒީފާ އަދާކުރާ ކޮންމެ މުސްލިމް މުވައްޒަފަކަށް 3000 ރުފިޔާ ދޭން ޖެހޭނެ އެވެ.