ދިވެހިރާއްޖޭގައި "ރީޑިފައިން" މަޝްރޫއުގެ ހަރަކާތްތައް ތަންފީޒުކުރުމަށްޓަކައި، ލޯކަލް ގަވަރމަންޓް އޮތޯރިޓީ (އެލްޖީއޭ)، މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސް (އެމްއައިއެލްޖީ) އަދި ސްމޯލް އައިލެންޑް ޖިއޮގްރަފިކް ސޮސައިޓީ (ސިގްސް) އާ ދެމެދު ފަހުމުނާމާއެއްގައި ސޮއިކޮށްފިއެވެ.
މި ފަހުމުނާމާގައި އެލްޖީއޭގެ ފަރާތުން ސޮއިކުރެއްވީ ޑިރެކްޓަރ، ހައްވާ އިޒްވަތެވެ. އެމް.އައި.އެލް.ޖީގެ ފަރާތުން ޑިރެކްޓަރ، ހުސައިން ވަހީދު ސޮއިކުރެއްވިއިރު، ސިގްސްގެ ފަރާތުން ސޮއިކުރެއްވީ ޑިރެކްޓަރ އޮފް ސައިންސް އެންޑް އިނޮވޭޝަން މިޒްނާ މުޙައްމަދެވެ.
"ރީޑިފައިނިންގ ކޮންފްލިކްޓް ޕްރިވެންޝަން އެންޑް ޕީސްބިލްޑިންގ – އެމްޕަވަރިންގ ސީ.އެސް.އޯސް ފޯ ސަސްޓެއިނަބަލް ޕީސް އިން ސްރީލަންކާ އެންޑް މޯލްޑިވްސް"ގެ ނަމުގައި ހިންގަ މި މަޝްރޫއަކީ މުޖުތަމައުތަކުގެ ތެރޭގައި ހިނގާ ދެބަސްވުންތައް ހުއްޓުވުމާއި، ސުލްހަ ގާއިމުކުރުމާއި، ކާރިސާތަކަށް ތައްޔާރުވުމުގެ ގާބިލުކަން އިތުރުކުރުމަށް އަމާޒުކޮށްގެން ހިންގާ މަޝްރޫއެއް ކަމަށް އެލްޖީއޭއިން ބުނެ އެވެ.
މި މަޝްރޫއުގައި ތިމާވެއްޓާއި، މޫސުމަށް އަންނަ ބަދަލުތަކާއި، ގުދުރަތީ ވަސީލަތްތައް ބޭނުންކުރުމާ ގުޅިގެން ކުރިމަތިވާ ގޮންޖެހުންތައް ހައްލުކުރުމަށް ހާއްސަ އިސްކަމެއް ދޭނެ އެވެ. "ރީޑިފައިން" މަޝްރޫޢަކީ ޔޫރަޕިއަން ޔޫނިއަންގެ މާލީ އެހީތެރިކަމާއެކު ކުރިއަށްގެންދެވޭ މަޝްރޫޢެކެވެ.
މި މަޝްރޫޢު ތަންފީޒު ކުރުމުގެ މައިގަނޑު މަސައްކަތްތައް ކުރިޔަށްގެންދާނީ ސްރީލަންކާގެ ޖަމްޢިއްޔާއެއް ކަމަށްވާ "ކްރައިސަލިސް" އިންނެވެ. އަދި ރާއްޖޭގެ ފަރާތުން ސްމޯލް އައިލެންޑް ޖިއޮގްރަފިކް ސޮސައިޓީ (ސިގްސް) އެވެ.