ނޭޝަނަލް ފަރޓިލިޓީ ސެންޓަރުން ހާސިލްކޮށްފައިވާ ލަނޑުދަނޑިތަކަކީ ރާއްޖެ އާއި ދުނިޔެގެ ނިސްބަތުން ބަލާއިރު ބޮޑު ކުރިއެރުމެއް ކަމަށް ދަރުމަވަންތަ ހޮސްޕިޓަލުގެ ގައިނެކޮލޮޖީ އަދި އޮބްސްޓެޓްރިކްސްގެ ކްލިނިކަލް ޑައިރެކްޓަރު ޑރ. މުހައްމަދު އަސީލް ޖަލީލް ވިދާޅުވެއްޖެ އެވެ.
ދަރުމަވަންތަ ހޮސްޕިޓަލުގެ ނެޝަނަލް ފަރޓިލިޓީ ސެންޓަރުގެ ތާރީޚީ ކާމިޔާބީތައް ފާހަގަކުރުމަށް ބޭއްވި ރަސްމިއްޔާތު ގައި ވާހަކަ ދައްކަވަމުން ޑރ. އަސީލް ވިދާޅުވީ ރާއްޖެގައި ދަރިމައިވުމުގެ ދަތިކަން ދިމާވާ މީހުންގެ ސީދާ އަދަދު ހޯދިފައިނުވާ ކަމަށެވެ. އެހެންނަމަވެސް ދުނިޔެއަށް ބަލާއިރު ދަރިމައިވާ އުމުރުގެ މީހުންގެ ތެރެއިން 17 އިންސައްތަ މީހުންނަށް ދަރިން ލިބުމުގައި ދަތިކަން ކުރިމަތިވާކަން ތަފާސް ހިސާބުތަކުން ދައްކާ ކަމަށެވެ.
2024 ވަނަ އަހަރު ރާއްޖޭގައި ދަރިމައިވާ ނިސްބަތް ދަށަށް ގޮސްފައިވާކަމަށް ޑރ އަސީލް ވިދާޅުވި އެވެ. އަދި މިހާރު ފަރޓިލިޓީ ރޭޓު ހުރީ 1.759 ގައި ކަމަށް ޑރ އަސީލް ވިދާޅުވި އެވެ.
މިކަމުން ވެސް ހާމަކޮށްދެނީ މިކަމަށް ރަނގަޅު ފަރުވާގެ ދިނުމުގެ މުހިންމުކަން ކަމަށް ވިދާޅުވި އެވެ.
ދަރުމަވަންތަ ހޮސްޕިޓަލުގެ ނޭޝަނަލް ފަރޓިލިޓީ ސެންޓަރަށް އެއް އަހަރު ފުރުން ފާހަގަކޮށް، ސެންޓަރުގެ ތާރީޚީ ކާމިޔާބީތައް ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ މުހައްމަދު މުއިއްޒު އާއި އަނބިކަނބަލުން ސާޖިދާ މުހައްމަދު އެވެ.
މި ރަސްމިއްޔާތުގައި ނެޝަނަލް ފަރޓިލިޓީ ސެންޓަރުން ވޭތުވެދިޔަ އެއް އަހަރު ދުވަހުގެ ތެރޭގައި ކުރެވުނު މަސައްކަތްތަކާއި ލިބުނު ކާމިޔާބީތަކާއި ބެހޭގޮތުން ވަނީ ޕްރެޒެންޓޭޝަނެއް ހުށަހަޅާފައެވެ.
ދަރިމައިވުމާ ގުޅޭ ފަރުވާތަކުގެ ތެރޭގައި ހިމެނޭ އައިވީއެފް އަދި އައިޔޫއައި ގެ ފަރުވާ އާސަންދަ އަދި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) މެދުވެރިކޮށް ރާއްޖެ އާއި ރާއްޖެއިން ބޭރުންވެސް މިހާރު ލިބެ އެވެ.
ދަރުމަވަންތަ ހޮސްޕިޓަލުގައި ހުންނަ ނެޝަނަލް ފަރޓިލިޓީ ސެންޓަރ ހުޅުވީ 2024 ނޮވެންބަރު މަހުއެވެ. އަދި އެ ސެންޓަރުގައި ފުރަތަމަ ފަހަރަށް އައިވީއެފް މެދުވެރިކޮށް ކުއްޖަކު އުފަންވީ 2026 ޖަނަވަރީ 7 ވަނަ ދުވަހުއެވެ.
ރަސްމިއްޔާތުގައި ވާހަކަ ދައްކަވަމުން ގައިނެކޮލޮޖީ އަދި އޮބްސްޓެޓްރިކްސްގެ ކްލިނިކަލް ޑައިރެކްޓަރު ޑރ. މުހައްމަދު އަސީލް ޖަލީލް ވިދާޅުވީ
އާސަންދައިން އައިވީއެފްގެ ފަރުވާއަށް 50 ޖާގަ ހުޅުވާލީ މިދިޔަ ނޮވެންބަރު މަހު އެވެ. ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)އިން ކުރި އިއުލާނެއްގައިވާ ގޮތުން މިދިޔަ އަހަރު އައިވީއެފްގެ ފަރުވާއަށް 50 ދެމަފިރިއަކަށް އެހީ ހަމަޖައްސައިދޭން ނިންމާފައިވެއެވެ. އެންސްޕާއިން ނޮވެމްބަރ އާންމުކުރި ތަފާސްހިސާބުތަކުން އެނގޭ ގޮތުގައި، ފަރޓިލިޓީ ކެއަރ ފަންޑް މެދުވެރިކޮށް މި ދެ އަހަރުގެ ތެރޭގައި 93 ފަރާތެއްގެ ފަރުވާއަށް 7.13 މިލިއަން ރުފިޔާގެ އެހީތެރިކަން ފޯރުކޮށްދީފައިވެ އެވެ. އޭގެ ތެރެއިން 23 ފަރާތެއްގެ ފަރުވާ ވަނީ ކާމިޔާބުވެފަ އެވެ.
މިވަގުތު ރާއްޖެއިން އައިވީއެފްގެ ޚިދުމަތް ފޯރުކޮށްދެނީ ޓްރީޓޮޕް ހޮސްޕިޓަލާއި އައިޖީއެމްއެޗް އަދި ދަރުމަވަންތަ ހޮސްޕިޓަލުންނެވެ.