އޭލެވެލް އެޑެކްސެލްގެ މެއި/ޖޫން އިމްތިހާނު ހެދުމުގެ ފުރުސަތު އަލުން ދިނުމަށް އެޑިއުކޭޝަން މިނިސްޓްރީން ނިންމައިފިއެވެ.
އެޑިއުކޭޝަން މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ، 2019 ވަނަ އަހަރަށް ފަހު ރާއްޖޭގައި އޭލެވެލް އެޑެކްސެލް މެއި/ޖޫން އިމްތިހާން ދިނުން ހުއްޓާލާފައިވާ ކަމަށެވެ. އަދި އިމްތިހާނު ދިނުން ހުއްޓާލުމާ ގުޅިގެން އެ އިމްތިހާނު ހެދުމަށް ބޭނުންވާ ކެނޑިޑޭޓުން ރާއްޖެއިން ބޭރަށް ދަތުރުފަތުރު ކުރުމަށާއި، ހުރުމުގެ ހަރަދުތަކަށް އެކަނިވެސް ޖުމްލަ ގޮތެއްގައި 30،000 ރުފިޔާ އަށްވުރެ ގިނަ ފައިސާ ހަރަދުވާކަން އެ މިނިސްޓްރީ އަށް ފާހަގަކުރެވިފައިވާކަމަށެވެ.
އެގޮތުން މިކަމަށް ހައްލެއް ހޯދައިދިނުމުގެ ގޮތުން އަމިއްލަ ކެނޑިޑޭޓުންނަށް އޭލެވެލް އެޑެކްސެލްގެ މައްދާތަކުގައި ބައިވެރިވާން ބޭނުންވާ ކެނޑިޑޭޓުންނަށް މިއަހަރުން ފެށިގެން އިމްތިހާނުތައް އަލުން ބައްވާގޮތަށް ނިންމާފައިވާކަމަށް މިނިސްޓްރީން ވަނީ ބުނެފައެވެ.
މިނިސްޓްރީން ބުނީ އޭލެވެލް އެޑެކްސެލް މެއި/ޖޫން އިމްތިހާން ސީރީސްއާ ގުޅޭ މައުލޫމާތު މިހިނގާ ފެބުރުއަރީމަހުގެ 4 ވަނަ ދުވަހުން ފެށިގެން ޑިޕާޓްމަންޓް އޮފް ޕަބްލިކް އެގްޒަމިނޭޝަނުން އާންމުކުރާނޭ ކަމަށާއި، މި އިމްތިހާން މެއި/ޖޫންގައި ރާއްޖޭގައި އަލުން ފެށިނަމަވެސް ސްކޫލްތަކުގެ ދަރިވަރުންނަށް އޭލެވެލް އިމްތިހާން މިހާރެކޭ އެއްގޮތަށް އޮކްޓޯބަރު/ނޮވެމްބަރުގައި ކުރިއަށްދާނޭ ކަމަށް ވެސް މިނިސްޓްރީން ބުނެފައިވެއެވެ.