މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ ހުޅުމާލޭ ޖަލުގައި ޙުކުމް ތަންފީޛު ކުރަމުންދިޔަ ގައިދީ އަކު އައިޖީއެމްއެޗްގައި ފަރުވާ ދެމުން ދަނިކޮށް މިއަދު ހެނދުނު ނިޔާވެފައިވާ ކަމަށް ކަރެކްޝަނަލް ސަރވިސް އިން ބުނެފިއެވެ.
ނިޔާވެފައި ވަނީ އުމުރުން 53 އަހަރުގެ ދަފްތަރު ނރ. 439 / އިބްރާހިމް ސުޙެއިލްއެވެ.
ކަރެކްޝަނަލް ސަރވިސް އިން ބުނީ، އިބްރާހިމް ސުޙެއިލްގެ ސިއްޙީ ހާލު ދެރަވުމުން އައިޖީއެމްއެޗްގައި އެޑްމިޓްކޮށްގެން ފަރުވާ ދެމުން ގެންދާތާ ހަފްތާއެއް ވެފައިވާ ކަމަށާއި، އޭނާ ނިޔާވެފައިވަނީ ހޮސްޕިޓަލްގައި ފަރުވާ ދެމުންދަނިކޮށް ނިއުމޯނިއާ ޖެހިގެން، މިއަދު ހެނދުނު 9:05 އެހާކަންހާ އިރު ކަމަށެވެ. އަދި ސުހެއިލް އަކީ 2025 ގައި ސްޓްރޯކެއް ޖެހިގެން، އެކަމަށް ފަރުވާ ހޯދަމުން އައިމީހެއް ކަމަށް ވެސް ކަރެކްޝަނަލް ސަރވިސް އިން ވަނީ ބުނެފައެވެ.
ސުޙެއިލް ނިޔާވުމާ ގުޅިގެން އެސަރވިސްއިން ވަނީ ވަގުތުން އެކަން މޯލްޑިވްސް ޕޮލިސް ސަރވިސްއަށާއި އޭނާގެ ޢާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައި ކަމަށް ވެސް ކަރެކްޝަނަލް ސަރވިސް ވަނީ ބުނެފައެވެ.