ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން މި އަހަރުގެ ފުރަތަމަ "ކުއާޓާލީ އިންސައިޓްސް: މޯލްޑިވްސް ޓޫރިޒަމް އިންޓެލިޖެންސް ބްރީފިން" މިއަދު ބާއްވައިފިއެވެ.
ވީއެމްސީ އިން ބުނީ، މި ބައްދަލުވުމަކީ ފަތުރުވެރިކަމުގެ ދާއިރާގެ އިސްވެރިންނާއި، ކަމާބެހޭ ފަރާތްތައް އެއްތަންވެ، ސިނާއަތުގެ މައުލޫމާތު ހިއްސާކުރުމަށާއި، ކުރިއަށް އޮތް އަހަރުގެ ލަނޑުދަނޑިތަކާއި، ފަތުރުވެރިކަމުގެ ސިނާއަތުގެ ކުރިއެރުމާ ގުޅޭގޮތުން މަޝްވަރާކުރުމަށް ބޭއްވި މުހިންމު ބައްދަލުވުމެއް ކަމަށެވެ.
މި ބައްދަލުވުން ފައްޓަވައިދެއްވުމުގެ ގޮތުން، ވިޒިޓް މޯލްޑިވްސް ކޯޕަރޭޝަނުގެ ސީއީއޯ އަދި މެނޭޖިން ޑިރެކްޓަރ އިބްރާހީމް ޝިއުރީ ވަނީ، ފާއިތުވި އަހަރު ފަތުރުވެރިކަމަށް ލިބުނު ކާމިޔާބީއަށް އަލިއަޅުވާލައްވައި، ބައިނަލްއަގުވާމީ ފަތުރުވެރިކަމުގެ މާކެޓުގައި ރާއްޖެ ކުރިއަރަމުން އަންނަ މިންވަރު ފާހަގަކުރައްވާފަ އެވެ. އަދި ކުރިއަށް އޮތް އަހަރު ފަތުރުވެރިކަން ކުރިއެރުވުމަށް ވިޒިޓް މޯލްޑިވްސް ކޯޕަރޭޝަނުން ކުރިއަށް ގެންދިއުމަށް ހަމަޖެހިފައިވާ މަސައްކަތްތަކަށް އަލިއަޅުވާލެއްވި އެވެ.
މީގެ އިތުރުން ޝިއުރީ ވިދާޅުވީ، "ކުއާޓަލީ އިންސައިޓްސް" ސެޝަނަކީ ފާއިތުވި ކަންކަމަށް ރިއާޔަތްކޮށް، އާ ކަންތައްތަކެއް ދަސްކޮށް، އިސްތިރާތީޖީ ރޭވުންތައް އެކުލަވައިލުމަށް ލިބޭ މުހިންމު ފުރުސަތެއް ކަމަށާއި، މި ސެޝަންގެ ސަބަބުން ފަތުރުވެރިކަމުގެ ސީޒަނަށް އަންނަމުންދާ ބަދަލުތަކާއި މާކެޓް އިންޓެލިޖެންސްގެ އެންމެ ފަހުގެ މައުލޫމާތު ލިބިގެންދާނެ ކަމަށެވެ. އަދި މިއީ ޕްރޮމޯޝަނަލް ރޯޑްމެޕާ ބެހޭ މައުލޫމާތުތައް ހިއްސާކުރެވި، ދާއިރާގައި މަސައްކަތްކުރާ ފަރާތްތަކުގެ މެދުގައި ގުޅުން ބަދަހިކޮށް، ހިޔާލު ބަދަލުކުރުމަށް ލިބޭ އަގުހުރި ފުރުސަތެއް ކަމަށް ވެސް ޝިއުރީ ވިދާޅުވިއެވެ.
މި ބައްދަލުވުމުގައި ވީއެމްސީގެ ޗީފް އޮޕަރޭޓިންގ އޮފިސަރ ސަބީހާ އަހުމަދު ވަނީ ފަތުރުވެރިން ޒިޔާރަތްކުރާ މިންވަރާއި، މާކެޓްތައް ބެހިފައިވާ ގޮތުގެ އިތުރުން ކުރިއަށް އޮތްތަނުގައި ޑިމާންޑް ހުންނާނެ ގޮތް ހުށަހަޅުއްވައިދެއްވާފައެވެ. އަދި ޗީފް ކޮމާޝަލް އޮފިސަރ ނަޞްރުﷲ އާދަމް ވަނީ މި އަހަރަށް ކަނޑައަޅާފައިވާ މުހިންމު ޕްރޮމޯޝަނަލް ހަރަކާތްތަކުގެ މައުލޫމާތު ހިއްސާކުރައްވާފައެވެ. މީގެ އިތުރުން، ކްރިއޭޓިވް ޑިރެކްޓަރ އަހުމަދު އަފްރު ރަޝީދު ވަނީ މިއަހަރުގެ ފުރަތަމަ ހަ މަސްދުވަހަށް ކަނޑައަޅާފައިވާ ޑިޖިޓަލް މާކެޓިންގ ސްޓެރެޖީއާ ބެހޭ މައުލޫމާތު ދެއްވައި، ފަތުރުވެރިކަމުގެ އޮފް-ސީޒަނާ ދިމާކޮށް ކުރިއަށް ގެންދާ "ސީ-ސޭޝަނަލް ސަމަރ" ކެމްޕޭން ތައާރަފުކޮށްދެއްވާފައެވެ.
މި ބައްދަލުވުން ނިންމަވާލައްވަމުން ވިޒިޓް މޯލްޑިވްސް ކޯޕަރޭޝަނުގެ ޑިރެކްޓަރުންގެ ބޯޑުގެ ޗެއާޕާސަން ޢަބްދުﷲ ގިޔާސް ވަނީ ކުއާޓާލީ އިންސައިޓް މިބައްދަލުވުމަކީ ފަތުރުވެރިކަމުގެ ސިނާއަތުގެ ތަފާސްހިސާބުތަކާއި މައުލޫމާތުގެ މައްޗަށް ބިނާކޮށް، ސިނާއަތުގެ ފަރާތްތަކާއެކު މެދުކެނޑުމެއް ނެތި މަޝްވަރާކުރުމަށް ލިބޭ މުހިންމު މަންސައެއްކަމުގައި ފާހަގަކުރައްވާފަ އެވެ. އެގޮތުން ރާއްޖޭގެ ފަތުރުވެރިކަން ފަހަކަށް އައިސް ހޯދަމުންދާ ކާމިޔާބީތަކާއި، ރެކޯޑު އަދަދަކަށް ފަތުރުވެރިން ޒިޔާރަތްކޮށް އާމްދަނީ އިތުރުވެފައިވާކަން ގިޔާސް ފާހަގަކުރެއްވިއެވެ.
މީގެ އިތުރުން ގިޔާސް ވިދާޅުވީ، "ސިނާއަތުގެ ބައިވެރިންގެ ފަރާތުން ވީއެމްސީއަށް ލިބޭ ހިޔާލުތަކަކީ ނުހަނު އަގުހުރި މައުލޫމާތުތަކެއް ކަމަށާއި، މީގެ ސަބަބުން ވީއެމްސީގެ ސިޔާސަތުތައް އިތުރަށް ހަރުދަނާކޮށް، މައުލޫމާތުގެ މައްޗަށް ބިނާވެފައިވާ ނިންމުންތައް ނިންމުމަށް މަގުފަހިވެގެންދާނެ ކަމަށެވެ. އަދި އަންނަ އޭޕްރީލް މަހު ބާއްވާ 'ކުއާޓަރލީ އިންސައިޓްސް' ބައްދަލުވުމުގައި އެމް.އެމް.އޭ، މީރާ އަދި އެމް.އޭ.ސީ.އެލް ފަދަ މުހިންމު އިދާރާތަކުން ލިބޭ އިތުރު ތަފާސްހިސާބުތައް ވީއެމްސީ އިން ހިއްސާކުރާނެ ކަމަށާއި، ރާއްޖޭގެ ފަތުރުވެރިކަން އެކުގައި ކުރިއެރުވުމަށް މި ފަށާފައިވާ މަޝްވަރާތައް މެދުކެނޑުމެއްނެތި ކުރިއަށް ގެންދާނެ ކަމަށް ވެސް ގިޔާސް ވިދާޅުވިއެވެ.
ވީއެމްސީ އިން ބުނީ، ސިލްސިލާކޮށް ބާއްވާ ކުއާޓާލީ އިންސައިޓްސް ބައްދަލުވުމަކީ، ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ މެދުގައި ގުޅުން ބަދަހިކޮށް، ހިޔާލު ބަދަލުކުރުމަށް މަގުފަހިކޮށްދީ، ފަތުރުވެރިކަމުގެ އެންމެ ފަހުގެ ތަފާސްހިސާބުތަކާއި، ފަތުރުވެރިކަމުގެ ސިނާއަތަށް އަންނަމުންދާ ބަދަލުތަކާއި، ބާޒާރުގެ ކުރިމަގާ ގުޅޭ ދިރާސީ މައުލޫމާތުތައް ފޯރުކޮށްދޭ ބައްދަލުވުމެއް ކަމަށެވެ.