މިނިސްޓްރީ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސްއާއި، ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އާ ދެމެދު ފަހުމުނާމާއެއްގައި ސޮއިކޮށްފިއެވެ.
ސިޓީސް މިނިސްޓްރީ އިން ބުނީ އެ ފަހުމުނާމާއަކީ ސިޓީސް މިނިސްޓްރީއާ، އެންޑީއެމްއޭ، 2025 ޑިސެންބަރު 10 ވަނަ ދުވަހު ބޭއްވުނު ބައްދަލުވުމުގައި މަޝްވަރާކުރެވުނު ފަދައިން، އެންޑީއެމްއޭއިން ކުރިއަށްގެންދާ ޔުނެސްކޯ-އައިއޯސީގެ ސުނާމީ ރެޑީ ޕްރޮގްރާމް ތަންފީޒުކުރުމުގައި ދެ މުއައްސަސާ ގުޅިގެން މަސައްކަތްކުރުމާ ގުޅޭ ގޮތުން ސޮއިކުރެވުނު ފަހުމުނާމާއެއްކަމަށެވެ.
އެ ފަހުމުނާމާގައި ސިޓީސް މިނިސްޓްރީގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ މުއުމިނާ ވަހީދު ކަމަށާއި، އެންޑީއެމްއޭގެ ފަރާތުން ސޮއިކުރެއްވީ އެ އޮތޯރިޓީގެ ޗީފް އެގްޒެކިޓިވް ހިސާން ހަސަން ކަމަށް ސިޓީސް މިނިސްޓްރީ އިން ބުނެއެވެ.
ސިޓީސް މިނިސްޓްރީ އިން ބުނީ ފަހުމުނާމާގައިވާ ގޮތުން ސިޓީތަކާއި، އަތޮޅުތަކުގައި ރަށު ފެންވަރުގައި ހިންގާ ވޯކްޝޮޕްތަކާއި، ޑިޒާސްޓާ މެނޭޖްމަންޓް ޕްލޭން އެކުލަވާލުމާއި، ކޮމިއުނިޓީ ބޭސްޑް އެމަޖެންސީ ރެސްޕޮންސް ޓީމްތަކުގެ ތަމްރީނާއި، ޓީމްތައް އެކުލަވައިލުމުގެ މަސައްކަތްތަކުގައި އެ މިނިސްޓްރީގެ އެއްބާރުލުމާއި، އެހީތެރިކަން ދޭގޮތަށް ހަމަޖައްސާފައިވާ ކަމަށެވެ.
މީގެ އިތުރުން އެ އެއްބަސްވުމުގައި ހިމެނޭ ކަންކަން ވިލަރެސްކުރުމަށް ޓަކައި ދެ މުއައްސަސާސިން ވެސް ފޯކަލް ޕޮއިންޓެއް ކަނޑައަޅާ ގޮތަށް ހަމަޖައްސާފައިވާ ކަމަށް ސިޓީސް މިނިސްޓްރީ އިން ބުނެއެވެ.