5 އަހަރުގެ ދައުރެއްގެ ތެރޭގައި 3 އިންތިހާބު ބޭއްވުމުގެ ސަބަބުން މުޅި ދައުލަތް އޮންނަނީ އިންތިހާބީ ހުމެއްގެ ތެރޭގައިކަމަށް މިނިސްޓަރ އޮފް ސިޓީސް، ލޯކަލް ގަވާމެންޓް އެންޑް ޕަބްލިކް ވޯކްސް އާދަމް ޝަރީފް ވިދާޅުވެއްޖެއެވެ.
ޝަރީފް އެކްސްގައި ކުރައްވާފައިވާ ޕޮސްޓެއްގައި ވިދާޅުވީ 5 އަހަރުގެ ދައުރެއްގެ ތެރޭގައި 3 އިންތިހާބު ބޭއްވުމުގެ ސަބަބުން ގައުމީ އުފެއްދުންތެރިކަމަށް މަސައްކަތް ކުރުމަށް ލިބޭ ވަގުތުން ބޮޑު ބައެއް ކެމްޕެއިންތަކަށް ހޭދަ ކުރަންޖެހޭ ކަމަށެވެ. އަދި އެކަމަށް ބޮޑު ހަރަދެއް ހިނގާނެކަމަށް އޭނާ ވިދާޅުވިއެވެ.
އެހެންކަމުން، ރާއްޖޭގައި ރިޔާސީ އިންތިހާބާއި މަޖިލިސް އިންތިހާބު، އެކުގައި ބޭއްވުމަކީ މުޅި ގައުމުގެ މަސްލަހަތު ހިމެނޭ، ވަރަށް ބޭނުންތެރި ކަމެއް ކަމަށް ޝަރީފް ވިދާޅުވިއެވެ.
މިއަދު ކުރިއަށް ދިޔަ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަފުޅު ދައްކަވަމުން މިނިސްޓަރ ވިދާޅުވީ އިންތިހާބުތައް މިހާރު އޮންނަ ގޮތުން ރައީސުލްޖުމްހޫރިއްޔާ ކަމަށް ވަޑައިގަންނަވާ ބޭފުޅަކު ޖެހިވަޑައިގަންނަވަނީ ގާތްގާތުގައި އިންތިހާބުތަކަށް ތައްޔާރުވެވަޑައިގަންނަވަން ކަމަށެވެ.
އެގޮތުން ރައީސުލްޖުމްހޫރިއްޔާގެ މަގާމަށް ވަޑައިގަންނަވާ ބޭފުޅަކު ވެރިކަމާ ހަވާލުވެވަޑައިގަންނަވާތާ ގިނަ ދުވަސްތަކެއްނުވަނީސް މަޖިލީސް އިންތިހާބަށް ތައްޔާރުވާން ޖެހިވަޑައިގަންނަވާ ކަމަށެވެ. މަޖިލީސް އިންތިހާބަށްފަހު މާ ގިނަ ދުވަސްތަކެއްނުވެ، ދެން ތައްޔާރުވާން ޖެހިވަޑައިގަންނަވަން ޖެހެނީ ލޯކަލް ކައުންސިލް އިންތިހާބަށް ކަމަށެވެ.
އިންތިހާބުތައް ބާއްވަން ޖެހުމުގެ ސަބަބުން އެކަށީގެންވާ ބާރުމިނުގައި ތަރައްގީގެ ކަންކަންވެސް ކުރިއަށްނުދާ ކަމަށް މިނިސްޓަރ ވިދާޅުވިއެވެ. އެއީ ރާއްޖޭގެ ވެރިކަން ކުރެއްވި ކޮންމެ ވެރިޔަކުވެސް ތަޖުރިބާކުރަން ޖެހިވަޑައިގަންނަވާ ކަންކަން ކަމަށް ވިދާވިއެވެ.
މިނިސްޓަރ ވިދާޅުވީ ދެ އިންތިހާބު އެއްކޮށްލުމަށް ގާނޫނު އަސާސީއަށް ހުށަހަޅާފައިވާ އިސްލާހު ފާސްވުމުން ރާއްޖޭގެ ރައީސުލްޖޫމްހޫރިއްޔާ ކަމަށް ވާދަކުރައްވަން ކިތަންމެ ގިނަ ބޭފުޅުން ނިކުންނެވިޔަސް އެ ބޭފުޅުންނާ އެ ބޭފުޅުންނާ އެކީގައި ރަނގަޅު ޓީމެއް ފެނިގެންދާނެ ކަމަށެވެ.
މިނިސްޓަރ ވިދާޅުވީ އިންތިހާބު އެއްކޮށްލެވުމުން ސަލާމަތްވަނީ ހަރަދުތައް އެކަނި ނޫން ކަމަށާއި، ޕާޓިވަންތަ ކަމާއެކު މަސައްކަތްކުރުމުގެ ސިފަ ފެންނާނެ ކަމަށެވެ. އަދި ގައުމުގެ ހިންގުން ހަރުދަނާވެގެންދާނެކަމަށްވެސް މިނިސްޓަރ ފާހަގަކުރެއްވިއެވެ.