އޮސްޓްރޭލިޔާއަކި ރާއްޖޭގެ އިޖުތިމާއީ އަދި އިގްތިސާދީ ތަރައްގީގައި މުހިންމު ދައުރެއް އަދާކުރާ ގައުމެއް ކަމަށް ހާރިޖީީ ވަޒީރު ޑރ. އަބްދުﷲ ހަލީލް ވިދާޅުވެއްޖެއެވެ.
އޮސްޓްރޭލިޔާގެ ގައުމީ ދުވަސް "އޮސްޓްރޭލިއަން ޑޭ" ފާހަގަކުރުމުގެ ގޮތުން، ރާއްޖޭގައި ހުންނަ އެގައުމުގެ ހައިކޮމިޝަނުން އިންތިޒާމުކޮށްގެން ބޭއްވި ފޮޓޯ މައުރަޒު ހުޅުވުގެ ރަސްމިއްޔާތުގައި ވާހަކަދައްކަވަމުން ހަލީލް ވިދާޅުވީ ރާއްޖެއާ އޮސްޓްރޭލިޔާއާ ދެމެދު އޮންނަ ގާތް ގުޅުމަކީ، ދެ ގައުމުގެ ދެމެދުގައި އޮތް އިހްތިރާމާއި، ސުލްހަ މަސަލަސްކަން ބިނާކުރުމަށް ދެ ގައުމުން ގުޅިގެން ކުރާ މަސައްކަތްތަކުގެ މައްޗަށް ބިނާވެފައިވާ ވަރުގަދަ ގުޅުމެއް ކަމަށެވެ.
ހަލީލް ވިދާޅުވީ މިއަދު ބޭއްވި މައުރަޒަކީވެސް ދެ ގައުމުގެ ދެމެދުގައިވާ ގުޅުން އިތުރަށް ވަރުގަދަ ކުރުމަށް ކުރެވޭ މުހިންމު މަސައްކަތެއް ކަމަށެވެ. އަދި އޮސްޓްރޭލިޔާއަކީ ރާއްޖޭގެ ތަރައްގީގެ މުހިންމު ބައިވެރިއެއް ކަމަށް ވަޒީރު ވިދާޅުވިއެވެ.
ދެ ގައުމުގެ ދެމެދުގައި އޮންނަ ގުޅުން އިތުރަށް ހަރުދަނާވަމުންދާކަން ފާހަގަކުރައްވައި ވަޒީރު ވިދާޅުވީ، ފާއިތުވި އަހަރުތަކުގައި އިސް އޮފިޝަލުންގެ ފެންވަރުގައާއި ޑިފެންސް ޕޮލިސީގެ ދާއިރާއިން ކުރިއަށްދާ މަޝްވަރާތަކަކީ ދެ ގައުމުގެ ގުޅުން އައު ހަރުފަތަކަށް ގެންގޮސްދޭ މުހިންމު ކަންތައްތަކެއް ކަމަށެވެ.
ވަޒީރު ވިދާޅުވީ ކުރިއަށް އޮތް ތަނުގައިވެސް މިފަދަ މަޝްވަރާތަކުގެ ޒަރީއާއިން، ދެ ގައުމުގެ އިސްކަންދޭ ކަންކަމުގައި އެއްބާރުލުން އިތުރުވެގެންދާނެ ކަމަށް އުންމީދުކުރައްވާ ކަމަށެވެ.
އެ ރަސްމިއްޔާތުގައި ވަޒީރު ވަނީ އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒްއަށާއި އެ ގައުމުގެ ރައްޔިތުންނަށް ގައުމީ ދުވަހުގެ ތަހުނިޔާ ފޮނުއްވާފައެވެ. އަދި އޮސްޓްރޭލިއާގެ ހާރިޖީ ވުޒާރާއިން ރާއްޖެއާއެކު ބާއްވާ ގާތް ގުޅުމަށްޓަކައި ޝުކުރު އަދާކުރައްވައި، އޮސްޓްރޭލިއަން ހައިކޮމިޝަނުން އިސްނަގައިގެން ކުރިއަށްގެންދާ މިފަދަ ހަރަކާތްތަކަށް ހަލީލް ތައުރީފުކުރެއްވިއެވެ.