ވިޒިޓް މޯލްޑިވްސް ކޯޕަރޭޝަން (ވީއެމްސީ)ގެ ހިންގުމުގެ ނިޒާމު ހަރުދަނާކޮށް، ކުންފުނީގެ ގާބިލުކަން އިތުރުކުރުމާއި ހަރަދު ކުޑަކުރުމުގެ ސިޔާސަތުތަކާ އެކު، 2025 ވަނަ އަހަރު ނިންމާލާފައި ވަނީ ކާމިޔާބު ކުރިއެރުންތަކާ އެކުގައި ކަމަށް އެ ކުންފުނިން ބުނެފިއެވެ.
ވިޒިޓް މޯލްޑިވްސް އިން ބުނީ، ހިންގުމުގެ ނިޒާމު ހަރުދަނާކުރުމަށް ގެނައި ބަދަލުތަކުގެ ތެރޭގައި، ރިސްކުތައް މެނޭޖްކުރުމުގައި ގާބިލްކަން އިތުރުކޮށް ދެފުށް ފެންނަ ނިޒާމަށް ކުންފުނީގެ މަސައްކަތްތައް ބައްޓަންކުރުމަށް މުހިންމު މަސައްކަތްތަކެއް ކޮށްފައިވާ ކަމަށެވެ.
އެހެންކަމުން ސަރުކާރު ހިއްސާވާ ކުންފުނިތައް ހިންގުމުގެ ގަވާއިދަށް ކަންކަން ފެއްތުމަށް ފާއިތުވި އަހަރު ވީއެމްސީ ހިންގުމުގެ ނިޒާމަށް ވަނީ ހަރުދަނާ ބަދަލުތަކެއް ގެނެސްފައި ކަމަށާ، އެގޮތުން އެ ކުންފުނީގެ ތެރެއިން އޮޑިޓް އެންޑް ރިސްކު ކޮމިޓީއަކާއި، ގަވަނެންސް ކޮމިޓީއެއް އަދި އެޗްއާރު އެންޑް ރިމިއުނަރޭޝަން ކޮމިޓީއެއް އެކުލަވާލައި، ބޯޑުން ކަންކަން ބެލެހެއްޓުމާއި، ޒިންމާޒދާރުކަން އިތުރުކޮށް، ކަންކަމުގައި ގޮތް ނިންމުމުގެ ނިޒާމު ވަނީ ހަރުދަނާކޮށްފަި ވާ ކަމަށް ވެސް އެ ވީއެމްސީން ވަނީ ބުނެފައެވެ.
އެ ކުންފުނިން ބުނީ، މި އިސްލާހީ ފިޔަވަޅުތަކުގެ ތެރެއިން، ޗީފް އިންޓާނަލް އޮޑިޓަރެއް އައްޔަންކޮށް، ކުންފުނީގެ އެތެރޭގެ ކަންކަން އިތުރަށް ހަރުދަނާކޮށް ޔަގީންކަން އިތުރުކުރުމަށް ނިންމާފައިވާ ކަމަށާއި، އަދި ކުންފުނީގެ ތާރީހުގައި ފުރަތަމަ ފަހަރަށް، 'ކޯޕަރޭޓް ރިސްކް ރެޖިސްޓްރީ' އެއް ތައާރަފުކޮށް، މަސައްކަތްތަކާއި މާލީ ކަންކަމުގައި ދިމާވެދާނެ ރިސްކުތައް ދެނެގަނެ، އެކަންކަން ދިމާނުވާނެ ގޮތަށް ކަންކަން ބައްޓަންކުރުމުގެ މަސައްކަތް ފެށިފައިވާ ކަމަށް ވެސް އެ ކުންފުނިން ވަނީ ބުނެފައެވެ.
އެ ގޮތުން ފާއިތުވި އަހަރު ވިޒިޓް މޯލްޑިވްސް ކޯޕަރޭޝަނުން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ހުރިހާ ސުންގަޑިތަކަށް ކަންކަން ނިންމައި މަސްއޫލިއްޔަތުތައް އަދާކުރެވިފައިވާއިރު، ހިންގުމުގެ ގަވާއިދަށް ގެނެވުނު ކޮންމެ އިސްލާހެއް ތަންފީޒުކޮށްފައިވާ ކަމަށާއި، އަދި ކުންފުނީގެ ހިންގުމުގެ ނިޒާމުގެ ހިއުމަން ރިސޯސެސް ޕޮލިސީ އާއި، ރީފަންޑް ޕޮލިސީ އަދި އެންޑޯސްމަންޓް ގައިޑްލައިން ފަދަ އެތެރޭގެ ގަވާއިދުތަކަށް ހަރުދަނާ އިސްލާހުތަކެއް ގެނެވުނު ކަމަށް އެ ކުންފުނިން ވަނީ ފާހަގަ ކޮށްފައެވެ.
މީގެ އިތުރުން ސިންގަލް ސޯސްކޮށް ކުރެވޭ މުއާމަލާތުތަކުގެ ބަދަލުގައި "ވެންޑާ ޕޯޓަލް"އެއް ތައާރަފްކޮށް ޕްރޮކިއުމަންޓު މުއާމަލާތްތައް ވީހާވެސް ވާދަވެރި ދެފުށް ފެންނަ ނިޒާމަކަށް ހަރުދަނާކުރެވުނު ކަމަށާއި، ކުންފުނީގެ މުއާމަލާތްތައް ހަރުދަނާ އުސޫލެއްގެ ދަށުން ރޭވުމަށާއި، ކަނޑައެޅިފައިވާ ގަވާއިދުތަކާ އެއްގޮތަށް ކަންކަން ބައްޓަންކޮށް، އަވަހަށް ހުއްދަތައް ހޯދުމަށްޓަކައި އަހަރީ ޕްރޮކިއުމަންޓް ޕްލޭނެއް އެކުލަވައިލައި އަމަލުކުރަން ފެށުނު ކަމަށް އެ ކުންފުނިން ވަނީ ބުނެފައެވެ. އަދި މީގެ ނަތީޖާއެއްގެ ގޮތުން، ބައިނަލްއަގުވާމީ ބޮޑެތި ފެއާތަކުގައި ކުރިމަތިވާ ޖޫރިމަނާތަކުން ސަލާމަތްވެ، ކަނޑައެޅިފައިވާ ތާވަލާ އެއްގޮތަށް ޕްރޮކިއުމަންޓް އަދި ކޮންޓްރެކްޓިންގެ މަސައްކަތްތައް ނިންމުމުގެ ގާބިލުކަން އިތުރުވެގެންދިޔަ ކަމަށް ވެސް އެ ކުންފުނިން ވަނީ ބުނެފައެވެ.
އެ ކުންފުނިން ބުނީ، ކުންފުނީގެ ހިންގުން ހަރުދަނާކުރުމަށް އެޅުނު ފިޔަވަޅުތަކުގެ އެންމެ ބޮޑު އެހީތެރިކަމެއް ލިބުނީ ބޯޑުގެ ހަރަކާތްތެރިކަމާއި އިދާރީ ގޮތުން ގެނެވުނު ބަދަލުތަކުގެ ސަބަބުން ކަމަށެވެ. އެގޮތުން 2025 ވަނަ އަހަރު، 97 އިންސައްތަ ހާޒިރީއަކާއެކު 30 ބޯޑު ބައްދަލުވުން ބާއްވާފައިވާ ކަމަށް އެ ކުންފުނިން ބުނެއެވެ. އަދި 70 ބޯޑު ރިޒޮލިއުޝަން، 62 ސާކިއުލާ ރިޒޮލިއުޝަން ފާސްކޮށްފައިވާ ކަމަށާއި، ބޯޑާއި މެނޭޖްމަންޓާ ދެމެދު އޮތް ބަދަހި ގުޅުމުގެ ސަބަބުން، މުހިންމު ދަނޑިވަޅުތަކުގައި އަވަސް ނިންމުންތައް ނިންމައި، ކުންފުނީގެ މަސައްކަތްތައް މެދުނުކެނޑި ކުރިއަށް ގެންދިއުމުގެ މަގު ފަހިވެ، ކުންފުނީގެ އަމާޒުތައް ގައުމީ ފަތުރުވެރިކަމުގެ ސިޔާސަތުތަކާ އެއްގޮތްކުރުމަށް ބޮޑު ބާރަކަށް ވެގެންދިޔަކަމަށް އެ ކުންފުނިން ވަނީ ބުނެފައެވެ.
އެ ކުންފުނިން ވަނީ، މާލީ ގޮތުން ގޮންޖެހުންތަކެއް ހުރި ނަމަވެސް، 2025 ވަނަ އަހަރަކީ ވޭތުވެދިޔަ އަށް އަހަރުގެ ތެރޭގައި ކުންފުންޏަށް އަމިއްލައަށް އާމްދަނީ ހޯދުމުގައި އެންމެ ބޮޑު ކުރިއެރުމެއް ލިބުނު އަހަރު ކަމުގައި ފާހަގަ ކޮށްފައެވެ. އެގޮތުން 2024 ވަނަ އަހަރާ އަޅާބަލާއިރު 2025 ވަނަ އަހަރު އާމްދަނީ 45 އިންސައްތަ އިތުރުވެފަިވާ ކަމަށް އެ ކުންފުނިން ވަނީ ބުނެފައެވެ. މިއީ ކުންފުނީގެ ވަސީލަތްތަކުން އާމްދަނީ އިތުރުކުރުމަށާއި، މާލީ ދެމެހެއްޓެނިވިކަން ކަށަވަރުކުރުމަށް ކުރެވުނު މަސައްކަތުގެ ނަތީޖާ ކަމަށް ވެސް އެ ކުންފުނިން ވަނީ ބުނެފައެވެ.
މިހާރު އޮތް ހަރުދަނާ ހިންގުމުގެ ނިޒާމާއެކު މިއަހަރާ ކުރިމަތިލުމަށް ތައްޔާރުވެ، ގައުމީ ފަތުރުވެރިކަމުގެ ލަނޑުދަނޑިތައް ހާސިލުކުރުމަށް ކުންފުނި އޮތީ ފުރިހަމައަށް ތައްޔާރަށް ކަމަށް ވެސް އެ ކުންފުނިން ވަނީ ބުނެފައެވެ.