ގއ. ގެމަނަފުށީ ނަރުދަމާގެ މަސައްކަތް ނިންމުމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)އާ ހަވާލުކޮށްފިއެވެ.
މި މަސަކަތް ހަވާލުކުރުމުގެ އެއްބަސްވުމުގައި އިމާރާތްކުރުމާ ގެދޮރުވެރިކަމާ ބިނާރާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ ހަސަން ރަޝީދުއެވެ. އަދި އެމްޑަބްލިއުއެސްސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ އަބްދުލް މަތީން މުހައްމަދެވެ.
މި މަސައްކަތް އެމްޑަބްލިއުއެސްސިއާ ހަވާލުކޮށްފަވަނީ 6 މަސް ދުވަހުގެތެރޭގައި ނިންމާގޮތަށް 17.6 މިލިޔަން ރުފިޔާއަށެވެ.
މި މަސަކަތުގެ ދަށުން، ގެމަނަފުށީގައި ކުރިން ގާއިމުކުރުމަށް މަސައްކަތް ފަށާފައިވާ ނަރުދަމާ ނިޒާމުގެ ބާކީ ހުރި މަސައްކަތްތައް ނިންމައި ނިޒާމު ޓެސްޓްކޮށް ކަމިޝަން ކުރުން ހިމެނެއެވެ. އެގޮތުން މި މަސައްކަތުގެ ދަށުން ނަރުދަމާގެ ޕަމްޕްސްޓޭޝަން ބެހެއްޓުމާއި، ރަށުގައި މީހުން އާބާދުވެފައިވާ ހުރިހާ ސަރަހައްދެއްގައި ނަރުދަމާ ހޮޅި އެޅުމާއި ސީ އައުޓް ފޯލް އެޅުމުގެ އިތުރުން ގޭބީސީތަކަށް ނަރުދަމާ ކަނެކްޝަން އެޅުމުގެ މަސައްކަތް ވެސް ހިމެނެއެވެ.
ގެމަނަފުށީގައި ފެނުގެ ނިޒާމު ގާއިމުކޮށް ބޭނުންކުރަން ފަށާފައިވަނީ 2023 ވަނަ އަހަރުއެވެ. ގެމަނަފުއްޓަކީ 1300 އަށްވުރެ ބޮޑު އާބާދީއެއް އޮންނަ ރަށެކެވެ.