ރާއްޖެއަށް މުދާ އެތެރެކޮށް ބޭރުކުރާ ފަރާތްތަކަށް ހުރި ދަތިތައް ހައްލުކުރުމަށް މޯލްޑިވްސް ކަސްޓަމްސް ސާވިސް އިން ފޯރަމެއް، ބާއްވައިފިއެވެ.
ކަސްޓަމްސް އިން އާންމުކޮށްފައިވާ ބަޔާނެއްގައި ބުނީ ރާއްޖެއަށް މުދާ އެތެރެކޮށް ބޭރުކުރާ ފަރާތްތަކަށް ހުރި ދަތިތައް ހައްލުކުރުމަށް އެއް ދުވަހުގެ މުއްދަތަށް ކަސްޓަމްސް ބިލްޑިން ގައި ބޭއްވި ފޯރަމްގައި ކަސްޓަމްސް، ބަނދަރުތައް، މުދާ ކްލިއާކުރުމުގައި ހަރަކާތްތެރިވާ ކްލިއަރިން އެޖެންޓުންނާއި ބްރޯކަރުން އަދި އިމްޕޯޓާއި އެކްސްޕޯޓް މުދަލާގުޅޭ ހުއްދަތައް ދޫކުރާ ސަރުކާރުގެ އިދާރާތައް ހިމެނޭގޮތަށް 60 އަށް ވުރެ ގިނަ މީހުން ބައިވެރިވެފައިވާ ކަމަށެވެ.
ކަސްޓަމްސް އިން ބުނީ މި ފޯރަމްގައި ރާއްޖެއަށް މުދާ އެތެރެކޮށް ބޭރުކުރާ ފަރާތްތަކަށް ހުރި ދަތިތައް ހައްލުކުރުމާ ގުޅޭގޮތުން ވަރަށް ފުޅާ ދާއިރާއެއްގައި މަޝްވަރާ ކޮށްފައިވާ ކަމަށެވެ.
އެގޮތުން ރާއްޖެއަށް އެތެރެކުރާ ކެމިކަލްގެ ބާވަތްތަކަށް ހުއްދަ ދޫކުރުމާއި، ކާބޯތަކެއްޗާއި ބޭހުގެ ބާވަތްތައް ކްލިއާކުރުމުގައި ހުރި ދަތިތަކަށް ހައްލު ގެންނާނެ ގޮތްތަކާއި، ގަސްގަހާގެއްސާއި ޖަނަވާރުގެ ބާވަތްތައް އެތެރެކުރުމުގެ ކަންކަން މިހާރަށްވުރެ ފަސޭހަކުރުމާއި، އިމާރާތްކުރުމުގެ ސާމާނު އެތެރެކުރުމަށް ހުއްދަ ދޭ އުސޫލުތައް ލުއިފަސޭހަ ކުރުމާގުޅޭގޮތުން ފޯރަމްގެ ބައިވެރިން މަޝްވަރާކޮށްފައިވާކަމަށް ކަސްޓަމްސް އިން ވަނީ ބުނެފައެވެ. މީގެ އިތުރުން މިކަންކަން ހައްލުކުރުމަށް މިހާރުން މިހާރަށް އެޅެންހުރި ފިޔަވަޅުތަކާއި، މެދުރާސްތާ އާއި ދިގުރާސްތާގައި ގެނެވޭނެ ހައްލުތަކާމެދުވެސް ވަނީ މަޝްވަރާކޮށްފައެވެ.
މި ފޯރަމްއިން ކުރަން ނިންމުނު ކަންކަން ކަމާގުޅުންހުރި އިދާރާތަކާއި ހިއްސާކޮށް، އެކަންކަން ތާވާލާ އެއްގޮތަށް ކުރިއަށް ގެންދިއުމަށްވެސް ފޯރަމްގައި ނިންމާފައިވާކަމަށް ކަސްޓަމްސް އިން މައުލުމާތުދެއެވެ.
ކަސްޓަމްސް އިން ބުނީ ރާއްޖެއަށް ގެންނަ މުދަލުގެ ނިސްބަތް ދުވަހުން ދުވަހަށް އިތުރުވަމުންދާއިރު، ބަނދަރުތަކުގައި ކަސްޓަމްސްއިން ފޯރުކޮށްދޭ ހިދުމަތްތައް އެއްދަވަހުން އަނެއް ދުވަހަށް ތަރައްގީކޮށް، ކްލިއަރަންސް ޕްރޮސެސް ހަލުވިކޮށް، ފެންވަރު ރަނގަޅުކުރުމަށްޓަކައި، ކަސްޓަމްސްއިން އަބަދުވެސް މަސައްކަތްތައް ކުރަމުންދާކަމަށެވެ. އަދި މިފަދަ ކަންކަމުގައި ކަސްޓަމްސް އާއި ގުޅިގެން މަސައްކަތްކުރާ އިދާރާތަކާއި ސްޓޭކްހޯލްޑަރުންގެ ފަރާތުން ލިބޭ އެއްބާރުލުން ކަސްޓަމްސްއިން ފާހަގަކޮށްފައިވެއެވެ.