ކާދު ސަތޭކަ ޕްރޮގްރާމް ދަށުން، މޯލްޑިވްސް ކަރެކްޝަނަލް ސާވިސްގެ ގައިދީންނަށާއި އޮފިސަރުންނަށް ތިން ވޯކްޝޮޕް ކުރިއަށް ގެންގޮސްފިއެވެ.
މޯލްޑިވްސް ކަރެކްޝަނަލް ސާވިސް އިން ސޮނެވާ ނަމޫނާއާއެކު، ޖަލުތަކުގައި ވޭސްޓް ގޮތުގައި އުކާލެވޭ ކާތަކެތި ބޭނުންކޮށްގެން ކާދު (ގަސް ކާނާ) އުފެއްދުމަށް ފަހުމުނާމާއެއްގައި ސޮއިކުރީ މިދިޔަ އަހަރުގެ ޖުލައި މަހުގެ 9 ވަނަ ދުވަހުއެވެ.
މިދިޔަ މަހުގެ 25 އިން ފެށިގެން 27ވަަނަ ދުވަހުގެ ނިޔަލަށް ކުރިއަށް ގެންދިޔަ މި ވޯކްޝޮޕްތައް ކުރިއަށް ގެންގޮސްފައިވަނީ އޮފިސަރުންނަށާއި އައްސޭރި ޖަލުގެ ގައިދީންނައި މާފުށީ ޖަލުގެ ފިރިހެން ގައިދީން އަދި އަންހެން ގައިދީންނަށް ވަކިންނެވެ. މިގޮތުން ޖުމްލަ 42 ގައިދީންނާއި 33 އޮފިސަރުން މި ވޯކްޝޮޕްތަކުގައި ބައިވެރިވެފައިވެއެވެ.
މި ވޯކްޝޮޕްތަކުގައި ޖަލުތަކުގައި ކާދު ސަތޭކަ ޕްރޮގްރާމް ފަށައި، ޖަލުތަކުގައި ދެމެހެއްޓެނިވި ގޮތެއްގައި ކުނި މެނޭޖްކުރާނެ ގޮތްތައް ދަސްކޮށްދޭނެއެވެ.
މިފަދަ ޕްރޮގްރާމްތައް ގައިދީންނަށް ހިންގުމުގެ މަޤްޞަދަކީ، ޙުކުމް ތަންފީޛުކުރުމަށް ފަހު ޤައިދީން އަނބުރާ މުޖުތަމަޢަށް ނިކުންނައިރު ދިރިއުޅުމުގައި ޢާމްދަނީއެއް ލިބޭނޭ ފަދަ މަސައްކަތެއް ނޫނީ ހުނަރް ދަސްކޮށްދީ، ޢަމަލީ ތަޖުރިބާ ހޯދުމުގެ ފުރުސަތުތައް ފަހިކޮށްދިނުންކަމަށް ކަރެކްޝަންސްއިން ބުނެ އެވެ.
އެގޮތުން އުކާލެވޭ ކާބޯތަކެތި ބޭނުންކޮށްގެން ކާދު އުފައްދައި، ދިރިއުޅުން ތިމާވެއްޓާ ރައްޓެހިގޮތަށް ބައްޓަންކޮށް، ދަސްކޮށްދެވޭ މަސައްކަތްތަކުން މަންފާއެއް ހޯދުމުގެ ފުރުސަތު ވެސް ލިބިގެންދާނެ ކަމަށް ކަރެކްޝަންސް އިން ބުނެ އެވެ.
މި ވޯކްޝޮޕްތައް ކުރިއަށް ގެންގޮސްފައިވަނީ ރިހެބިލިޓޭޝަން އެންޑް ރީއިންޓަރގްރޭޝަން ކޮމާންޑްގެ އިސްނެގުމުގެ ދަށުން އިންސްޓިޓިއުޓް ފޮރ ކަރެކްޝަނަލް ސްޓަޑީޒްއާ ގުޅިގެން ސޮނެވާ ނަމޫނާގެ މާހިރުންނެވެ.