140 މީހުންނަށް ވަގުތީ ބޯހިޔާވަހިކަން ހޯދުމަށް އެހީތެރިކަން ފޯރުކޮށްދީފައި ވާނެކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އެންޑީއެމްއޭ އިން ބުނީ އެހީތެރިކަން ބޭނުންވެގެން ގުޅި 30 އެޕާޓްމަންޓެއްގައި އުޅޭ 140 މީހުންނަށް ވަގުތީ ބޯހިޔާވަހިކަން ހޯދުމަށާއި ކެއިން ބުއިމުގެ ކަންކަން ހަމަޖެއްސުމަށް އެހީތެރިކަން ފޯރުކޮށްދީފައި ވާނެކަމަށެވެ.
މީގެ ތެރޭގައި ހިމެނެނީ 49 ފިރިހެނުންނާއި 48 އަންހެނުންނާއި 43 ކުޑަކުދިން ކަމަށް އެންޑީއެމްއޭ އިން މައުލުމާތުދެއެވެ.
ހުޅުމާލެ ފޭސް ދޭއްްގެ ހިޔާ ފުލެޓް އެޗް-5 ގައި އިއްޔެ އަލިފާނުގެ ހާދިސާއެއް ހިނގައިގެން، އެ ޓަވަރުން މީހުން ހުސްކުރިއެވެ.
އެންޑީއެމްއޭ އިން ބުނީ ހިޔާގެ ފަސްވަނަ ޓަވަރުގައި ހިނގި އަލިފާނުގެ ހާދިސާގައި އެ ޓަވަރުގެ 38 އެޕާޓްމަންޓުގެ ނަރުދަމާ ހޮޅިތަކަށް ގެއްލުންވެފައިވާ ކަމަށެވެ. އަދި އެ ހާދިސާއާ ގުޅިގެން 85 ފަރާތަކަށް ވަގުތީ ބޯހިޔާވަހިކަމާއި ކެއުން ބުއިމަށް އެހީތެރިކަން ފޯރުކޮށްދީފައިވާ ކަމަށް އެ އޮތޯރިޓީން ބުނެފައިވެއެވެ.
އެންޑީއެމްއޭއިން ބުނީ އެ ހާދިސާއަށްފަހު ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް ހައުސިން ޑިވެލޮޕްމަންޓް (އެޗްޑީސީ) އިން ކުރިއަށްގެންދާ ކަމަށެވެ. އަދި އަލިފާނުގެ ހާދިސާއާ ގުޅިގެން އިތުރަށް ބަލަން ޖެހޭ ކަންކަން އެޗްޑީސީއާ ގުޅިގެން ބަލަމުންގެންދާ ކަމަށް އެންޑީއެމްއޭ އިން ބުނެފައިވެއެވެ.