ރާއްޖޭގެ ދެކުނުގެ 4 އަތޮޅު ގުޅުވާލާ ކޫއްޑޫއާއި ކާޑެއްދޫއަށް ވައިގެ ދަތުރުތައް ފަށައިފިއެވެ.
ރާއްޖޭގެ ދެކުނުގެ 4 އަތޮޅު ވައިގެ މަގުން ގުޅުވާލުމާއި ގުޅޭގޮތުން ކޫއްޑޫގައި ހުންނަވާ އައިލެންޑް އޭވިއޭޝަން ސާވިސެސްގެ ޑެޕިއުޓީ މެނޭޖިން ޑިރެކްޓަރު އަލީ ސަލީމް ވިދާޅުވީ، މިއީ ރައްޔިތުންނަށް ގިނަގުނަ ފައިދާތަކެއް ލިބިގެންދާނެ ދަތުރުތަކަކަށް ވެގެންދާނެ ކަމަށެވެ.
އެ ކުންފުނިން މި ހިދުމަތްތައް ފެށީ، މި އޮޕަރޭޝަނަށް ބޭނުންވާ ހުރިހައި ސެޓަޕްއެއް އައްޑޫގައި ގާއިމްކޮށްފައި ކަމަށާއި މިކަމަށް ބޭނުންވާ ބޯޓުތަކާއި އިންސާނީ ވަސީލަތްތައްވެސް ގާއިމް ކޮށްފައިވާ ކަމަށް އޭނާ ވިދާޅުވިއެވެ.
މޯލްޑިވިއަނުން މި ދަތުރުތައް ކުރަނީ، މޯލްޑިވިއަންގެ އެންމެ ކުދި ސީޕްލޭން ދަތުރުތަކުގައި ބޭނުންކުރާ ޓްވިން އޮޓަރ މަރުކާގެ ބޯޓުތަކުގައި ކަމަށް މައުލޫމާތުދެއެވެ. އަދި މިއީ 15 މީހުންގެ ޖާގައިގެ ބޯޓުތަކެއް ކަމަށާއި، މި ދަތުރުތައް ކުރަން ހަމަޖެހިފައިވަނީ، 5 ސެކްޓަރ ނުވަތަ ރޫޓަށް ބަހާލައިގެން ކަމަށް ބުނެއެވެ.
އެއީ، އައްޑޫ ގަމުން ހުވަދު އަތޮޅުގެ ކާޑެއްދޫ އަދި ކޫއްޑޫ އެއާޕޯޓުގެ އިތުރުން ފުވައްމުލަކަށް ދަތުރު ކުރާ ގޮތަށާއި، ފުވައްމުލަކުން ކާޑެއްދޫ އަދި ކޫއްޑޫއަށް ދަތުރު ކުރާ ގޮތަށެވެ. ދަތުރުތަކަށް އަގުތައް ކަނޑައަޅާފައިވަނީ، 500ރ އިން ފެށިގެންނެވެ.