ގްރޭޑް 10 އާ ހަމައަށް ކިޔަވައިދޭ ސްކޫލަކާއި އޭލެވެލަށް ހާއްސަ ސްކޫލެއް ހުޅުމާލެ 2 ގައި އިމާތާރް ކުރުމުގެ މަސައްކަތް މި އަހަރު ފައްޓަވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.
މީޑިއާއަކަށް ދެއްވި އިންޓަވިއުއެއްގައި މިނިސްޓަރު ވިދާޅުވީ ހުޅުމާލޭގެ ގިނަ ސްކޫލުތަކުގެ ޖާގަ ވަރަށް ބޮޑަށް ފުރިފައިވާ ކަމަށެވެ. އިތުރު ސްކޫލެއް ހުޅުމާލެ އަށް ބޭނުންވާކަން ފާހަގަ ކުރައްވަމުން މިނިސްޓަރު ވިދާޅުވީ ގްރޭޑް 1-10 އަށް ކިޔަވައިދޭ އާ ސްކޫލެއް ރާއްޖޭގައި އެންމެ ބާރަށް އާބާދީ އިތުރުވަމުންދާ ހުޅުމާލެ ފޭސް 2 ގައި އިމާރާތް ކުރުމުގެ މަސައްކަތުގެ ކޮންސެޕްޓް ފައިނަލްކޮށް، މިހާރު އޮތީ ޑިޒައިން ހާރުހަލާގައި ކަމަށެވެ.
އެ ސްކޫލުގެ އަމަލީ މަސައްކަތް އެންމެ ލަސްވެގެން މި އަހަރުގެ ފުރަތަމަ ކުއާޓާގެ ތެރޭގައި ފެށޭނެ ކަމަށް މިނިސްޓަރު ލަފާކުރައްވަ އެވެ.
ހުޅުމާލޭގެ ސްކޫލުތަކަށް ވަނުމަށް ޖާގަ އަށް މިހާރު އެދެމުން އަންނަ މިންވަރާއި ގްރޭޑް 1 އަށް ވަންނާނެ ދަރިވަރުންގެ އަދަދަށް ބަލައި މިނިސްޓަރު ވިދާޅުވީ ކުރިއަށް އޮތް ދުވަސްތަކުގައި މަތީ ސާނަވީ އަށް ކިޔަވައިދޭ ސްކޫލެއް ބޭނުންވާނެ ކަމަށެވެ.
މިނިސްޓަރު ވިދާޅުވީ ހުޅުމާލެ 2 ގައި މިހާރު ހުރި ދެ ސްކޫލާ ކައިރި ހިސާބެއްގައި އޭ ލެވެލަށް ހާއްސަ ސްކޫލެއް އިމާރާތް ކުރުމުން ދަރިވަރުންނަށް ވެސް ފަސޭހަ ވާނެ ކަމަށެވެ.އޭލެވެލް ސްކޫލެއްގެ ކޮންސެޕްޓް އަދި ނުފެށުނު ކަމަށް ވިޔަސް ހުޅުމާލެ 2 ގައި އޭލެވެލް ސްކޫލެއް ވެސް އެޅުމަށް ނިންމާފައިވާ ކަމަށް މިނިސްޓަރު ވިދަޅުވި އެވެ.