އަބުރު ކަތިލައި، މަގާމުން ވަކިކުރީ މުވައްޒަފަކަށް ފިޔަވަޅު އެޅުމުން ކަމަށް ޖިންސީ ފުރައްސާރައިގެ ތުހުމަތުގައި އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ)ގެ ވެރިޔާގެ މަގާމުން ވަކިކުރި އިސްމާއިލް ސާޖިދު ވިދާޅުވެއްޖެއެވެ.
ޖިންސީ ފުރައްސާރައިގެ މައްސަލައެއް ސާބިތުވެ، ސާޖިދު އެފްއައިޔޫއިން ވަކިކުރީ، މިދިޔަ ބުރާސްފަތި ދުވަހެވެ. އޭރު ވެސް އޭނާ ހުރީ، ޖިންސީ ފުރައްސާރައިގެ ތުހުމަތުގައި ސަސްޕެންޝަނުގައެވެ.
މިއަދު ސާޖިދު ނެރުނު ބަޔާނެއްގައި ވަނީ، ޖިންސީ ފުރައްސާރައިގެ ތުހުމަތު ސާބިތުވާ ކަމަށް މައްސަލަ ބެލި އެމްއެމްއޭގެ ކޮމިޓީން ނިންމާފައި ވަނީ، މައްސަލަ ހުށަހެޅި ފަރާތުން ކަނޑައެޅިގެން ދޮގުތަކެއް ހަދާފައިވަނިކޮށް ކަމަށް ތުހުމަތުކޮށްފައެވެ.
އެ ދޮގުތައް ސާބިތުކުރެވޭ މިންވަރަށް ކޮމިޓީއަށް ކިތާބީ ހެކި ހުށަހަޅާފައިވީ ނަމަވެސް، މައްސަލަ ނިންމާފައި ވަނީ، އެ ހެކިތަކަށް އެއްވެސް މިންވަރަކަށް ބެލުމެއް ނެތި ކަމަށް އޭނާ ތުހުމަތުކުރެއްވިއެވެ.
ސަސްޕެންޑުކުރި، އެފްއައިޔޫގެ ވެރިޔާ ވަކިކޮށްފިއިތުރަށް ވިދާޅުވުމަށްއެ މައްސަލަ ހުށަހެޅި މަގުސަދާމެދު ސުވާލު އުފެދޭ ހާލަތްތަކެއް ހުށަހަޅާފައިވާ ކަމަށް އޭނާ ވިދާޅުވިއެވެ. މިގޮތުން، އޭނާ މަގާމުން ވަކިކުރީ އެފްއައިޔޫގެ މުވައްޒަފެއްގެ ހައިސިއްޔަތުން ކޮށްގެން ނުވާނެ ބައެއް ކަންކަން މުވައްޒަފަކު ކޮށްފައިވާތީ، އޭނާއަށް ފިޔަވަޅު އެޅުމުން ކަމަށް ސާޖިދު ވަނީ ވިދާޅުވެފައެވެ.
އޭގެއިތުރަށް، ފުރައްސާރަ ކުރި ކަމަށް ހުށަހަޅާފައިވާ މައްސަލާގައި ބުނާ ކަންކަން ހިނގި ދުވަސްތަކާއި މައްސަލަ ހުށަހެޅި ދުވަހާ ދެމެދު 39 ދުވަސް ހިނގާފައިވާ ކަން އޭނާ ފާހަގަކުރެއްވިއެވެ.
އެ މުއްދަތުތަކުގެ ތެރޭގައި ހިނގާފައިވާ ކަންކަން އިދާރާގެ ލިޔެކިޔުންތަކުންނާއި އެހެނިހެން ކިތާބީ ހެކިތަކުން އެނގެން އެބަހުރި ކަމަށް ސާޖިދު ވިދަޅުވިއެވެ.
އެމްއެމްއޭގެ ޖިންސީ ފުރައްސާރަކުރާ ކޮމިޓީން އެ ކަންކަން ރަނގަޅަށް ބެލިނަމަ، މައްސަލަ ހުށަހެޅުމުގެ ފަހަތުގައިވާ މަގުސަދު ސާފުވާނެ ކަމަށް އެ ބަޔާނުގައިވެއެވެ.
އިތުރަށް އޭނާ ވިދާޅުވީ، މި މައްސަލައިގެ އެއްވެސް ތަފްޞީލެއް ނުލިބެނީސް މިކަމުގެ މަޢުލޫމާތުތަކެއް އެމްއެމްއޭގެ މުވައްޒަފެއް ދިން ކަމަށް މީޑިއާ ރިޕޯޓުތަކަށް ބެލުމުން އެނގޭ ކަމަށެވެ. ނަމަވެސް، އެފަދަ އެއްވެސް މަޢުލޫމާތެއް މިހާތަނަށް އެއްވެސް މީޑިއާއަކަށް އޭނާ ދީފައެއް ނުވާނެ ކަމަށް ވަނީ ވިދާޅުވެފައެވެ.
އެ ކަމުން ދޭހަވަނީ ޝަކުވާ ކޮމިޓީ އާއި އެމްއެމްއޭގެ މުވައްޒަފުންގެ މަޢުލޫމާތު ރައްކާތެރިކުރުމަށް ފިޔަވަޅު އެޅޭނެ ހަރުދަނާ އުޞޫލުތަކެއް ނެތްކަން، ނުވަތަ އޭނާގެ އަބުރު ކަތިލައި މައްސަލައަށް ނުފޫޒުތަކެއް ފޯރުވަން އުޅުނުކަން ކަމަށް އޭނާ ތުހުމަތުކުރެއްވިއެވެ.
އޭގެއިތުރަށް، މި މައްސަލައިގައި އަޅާފައިވަނީ ޤާނޫނީ ހަމައިގެ މަތިން އަޅާފައިވާ ފިޔަވަޅެއް ނޫންކަން ތަފުސީލު ބެލި ކޮންމެ މީހަކަށްވެސް އެނގޭނެ ކަމަށް ސާޖިދު ގަބޫލުކުރައްވައެވެ.