މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން އިންތިޒާމުކުރާ ވީއައިއޭ ލޭ ހަދިޔާ ކުރުމުގެ ޕްރޮގްރާމް ފަށައިފި އެވެ.
މިއީ ދެ ދުވަހަށް ކުރިއަށް ގެންދާ ލޭ ހަދިޔާ ކުރުމުގެ ޕްރޮގްރާމެކެވެ. މި ޕްރޮގްރާމްގައި ލޭ ހަދިޔާކުރުމަށް އެއާޕޯޓުގެ ހުރިހާ މުވައްޒަފުން ކިބައިން އެމްއޭސީއެލްއިން އެދިފައިވެ އެވެ.
މިއީ ކޮންމެ އަހަރަކުވެސް އެމްއޭސީއެލްގެ ސްޓާފުންނަށް ހުޅުވާލައިގެން ކުރިއަށް ގެންދާ ޕްރޮގްރާމެކެވެ. އެހެން ނަމަވެސް އެހެން އަހަރުތަކާ ހިލާފަށް މި އަހަރު ޕްރޮގްރާމް ކުރިއަށް ގެންދަނީ ވެލާނާ އިންޓަނޭޝަނަލް އެއާޕޯޓުގައި މަސައްކަތްކުރާ ދައުލަތުގެ އިދާރާތަކާއި މުއައްސަސާތަކާއި ކުންފުނިތަކުގެ އިތުރުން ރިސޯޓް މުވައްޒަފުންނަށްވެސް ހުޅުވާލައިގެން ކަމަށް އެމްއޭސީއެލްއިން ވަނީ ބުނެފައެވެ.
އެމްއޭސީއެލްއިން މި ދުވަސްކޮޅު ލޭ ހަދިޔާކުރުމުގެ ޕްރޮގްރާމެއް ކުރިއަށް ގެންދާއިރު ލޭ ލިބުން ދަތިވުމުގެ ސަބަބުން މޯލްޑިވްސް ބްލަޑް ބޭންކްއިން ވީހާވެސް ގިނަ ބަޔަކު ލޭ ހަދިޔާކޮށް ދިނުމަށް ބްލަޑް ބޭންކްއިން އަންނަނީ އެދެމުންނެވެ.
ހުޅުމާލޭގެ އޮރެންޖު ހިޔާގައި ހުންނަ މޯލްޑިވްސް ބްލަޑް ސާވިސަސްގެ ބްލަޑް ބޭންކު ހުޅުވާފައި ހުންނާނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8އިން ރޭގަނޑު 8 އަށެވެ.
މޯލްޑިވްސް ބްލަޑް ސާވިސަސްއިން ބުނީ، ލޭ ހަދިޔާކުރާ މީހުން އުމުރުން 18އަހަރުން މަތިވެ، ބަރުދަން 45 ކިލޯއަށް ވުރެ މަތިވާން ވާނެ ކަމަށެވެ. އަދި ލޭ ހަދިޔާކުރާ މީހުން މަދުވެގެން ހަ ގަޑިއިރުގެ ނިދި ހަމަކުރުމާއި ލޭ ހަދިޔާކުރުމުގެ ކުރިން އެއް ގަޑިއިރު ކާން އެ ޚިދުމަތުން އިލްތިމާސްކުރެ އެވެ.