ގިރާވަރުފަޅުގެ ލޭންޑް ޔޫސް ޕްލޭނަށް ގެނައި ބަދަލުތަކާއި ގުޅިގެން ނަގާ ގުރުއަތުލުން މިއަދު ފަށައިފި އެވެ.
މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން އަންނަނީ މިއަދު ހެނދުނު 9:30އިން ފެށިގެން ގުރުއަތުލުމުގެ މަސައްކަތް ކުރިއަށް ގެންދަމުންނެވެ.
ގުރުއަތު ނަގާނީ ގުރުއަތު ލުމަށް ހާޒިރުވި މީހުންގެ ކުރިމަތީގައި މިނިސްޓްރީގެ މުވައްޒަފުންކަމަށް މިނިސްޓްރީން މައުލޫމާތު ދެ އެވެ.
ގުރުއަތުނެގުން ކުރިއަށްދާއިރު ގޯތި ލިބިފައިވާ ފަރާތަށް ހަމަޖެހިގެންދާ ޕްލޮޓް ހިޔާވެހި ޕޯޓަލްއިން ވަގުތުން ފެންނާނެކަމަށާއި، އެފަރާތަކަށް ލިބޭ ފްލޮޓް ނަންބަރު އެސްއެމްއެސްގެ ޒަރިއްޔާއިން އަންގާނެކަން ފާހަގަކޮށްފައިވެއެވެ.
ގޯތި ލިބޭ ފަރާތްތަކުގެ ގުރުނަގާ ނިމުމުން، ގޯތި ޙަވާލުކުރުމުގެ އެއްބަސްވުމުގެ ސޮއިކުރުމާއި ގޯތީގެ ރަޖިސްޓަރީ ޙަވާލުކުރުމުގެ މަސައްކަތް ކުރިއަށްގެންދާނެ ގޮތުގެ މަޢުލޫމާތު ފަހުގެ ތާރީޚެއްގައި ޙިއްސާކުރާނެ ކަމަށް މިނިސްޓްރީން ބުނެ އެވެ.
ގިރާވަރުފަޅު ގޯތިތަކުގެ ގުރު ނެގުން ކުރިއަށްދަނީ
ގިރާވަރުފަޅުން ދޫކުރަނީ 1250 އަކަފޫޓުގެ 2603 ގޯތި، 1650 އަކަފޫޓުގެ 1214 ގޯތި، 2050 އަކަފޫޓުގެ 254 ގޯތި އަދި 2450 އަކަފޫޓުގެ 01 ގޯތި ހިމެނެއެވެ.
ގިރާވަރުފަޅު ހިއްކުމުގެ މަސައްކަތް މިހާރު ވަނީ ފަށާފަ އެވެ. ގިރާވަރުފަޅު ހިއްކުމުގެ މަސައްކަތް ކުރަނީ ހުޅުމާލެ ތިން ވަނަ ފިޔަވަހީގެ ބިން ހިއްކުމަށްވެސް ބޭނުންކުރި ޑްރެޖަރުތަކުންނެވެ.
މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ބުނީ އާ ލޭންޑް ޔޫޒް ޕްލޭން އެއް އެކުލަވާލަން ޖެހުނީ ކުރީގެ ޝާއިޢުކުރެވުނު ޕްލޭންގައި ގޯތި މަދުވާތީ ކަމަށެވެ. އަދި ގޯތީގެ ޢަދަދު އިތުރުކޮށް އައު ލޭންޑް ޔޫސް ޕްލޭން އެއް މިހާރު އެކުލަވާލައިފައި ވާކަމަށެވެ.
އެގޮތުން ކުރީގެ ޝާއިޢުކުރެވުނު ޕްލޭންގައި 610 ގޯތި މަދުވާކަން ފާހަގަކޮށް، މިހާރުގެ ޕްލޭންގައި އެ ޢަދަދު ހިމަނައިގެން ގިރާވަރުފަޅުން ދޫކުރަންޖެހޭ ޖުމްލަ 4,072 ގޯތި ހިމެނޭނެކަމަށް މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން މައުލޫމާތުދެއެވެ.