ގައުމީ އެއާލައިން މޯލްޑިވިއަންއިން ރާއްޖޭގެ ދެކުނުގެ ހަތަރު އަތޮޅު ވައިގެ މަގުން ގުޅުވާލައިފިއެވެ.
ރާއްޖޭގެ އެންމެ ދެކުނުން އައްޑޫ އަތޮޅާއި، ފުވައްމުލަކާއި، ގއ.އަތޮޅު އަދި ގދ. އަތޮޅު މޯލްޑިވިއަނުން ވައިގެ މަގުން ގުޅުވާލާފައިވާ އިރު މި ދަތުރުތައް ފެށުމަށް ހަމަޖެހިފައިވަނީ 1 ފެބްރުއަރީން ފެށިގެންނެވެ.
މިކަމަށްޓަކައި ގަން އިންޓަރނޭޝަނަލް އެއަރޕޯޓުގައި ބޭއްވި ޚާއްސަ ރަސްމިއްޔާތު ޝަރަފުވެރިކޮށްދެއްވީ، ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީންއެވެ. މީގެ އިތުރުން މި ރަސްމިއްޔާތުގައި ކެބިނެޓުގެ ގިނަ ވަޒީރުންނާއި މޯލްޑިވިއަންގެ އިސްބޭފުޅުން ބައިވެރިވެ ވަޑައިގެންނެވިއެވެ.
މި ރަސްމިއްޔާތުގައި މި ދަތުރުތައް ފެށުމުގެ ހުއްދަ މޯލްޑިވިއަންއާ ހަވާލުކޮށްދެއްވީ ޓްރާންސްޕޯޓު މިނިސްޓަރު އަމީނެވެ. މޯލްޑިވިއަންގެ ފަރާތުން އެ ހުއްދައާ ހަވާލުވެވަޑައިގެންނެވީ އެ ކުންފުނީގެ މެނޭޖިން ޑިރެކްޓަރު އިބްރާހިމް އިޔާސްއެވެ.
މި ރަސްމިއްޔާތުގައި ވާހަކަދައްކަވަމުން އައިލެންޑް އޭވިއޭޝަންގެ މެނޭޖިންގ ޑިރެކްޓަރ އިބްރާޙީމް އިޔާސް ވިދާޅުވީ، މި އޮޕަރޭޝަންގެ ބޭސްއަކަށް ގަން އިންޓަރނޭޝަނަލް އެއާޕޯޓް ވެގެން ދިޔުމަކީ އައިލެންޑު އޭވިއޭޝަންގެ ތާރީޚުގައި ވެލާނާ އިންޓަރނޭޝަނަލް އެއާޕޯޓު ފިޔަވައި އިތުރު އޮޕަރޭޝަން ބޭސްއެއްގެ ގޮތުގައި ކަނޑައެޅިގެން ދިޔަ ފުރަތަމަ އެއާޕޯޓް ކަމަށެވެ.
އިޔާސް ވިދާޅުވީ، މި ޚިދުމަތުގެ ސަބަބުން ދެކުނުގެ ރައްޔިތުންނަށް ވަރަށް ބޮޑު ލުޔެއް ލިބޭނެ ކަމަށާ އެގޮތުން، ހަފުތާގެ ކޮންމެ ދުވަހަކު ވެސް މި ދަތުރުތައް ކުރާނެ ކަމަށެވެ. އަދި ފުރޮޅުލީ ޓުއިން އޮޓޯ މަތިންދާ ބޯޓުގައި ޝެޑިއުލް ކޮމާރޝަލް ފްލައިޓުގެ ޚިދުމަތް ފަށާ ފުރަތަމަ އެއާލައިނަކީ މޯލްޑިވިއަންކަން އިޔާސް ފާހަގަކުރެއްވިއެވެ.
އިޔާސް ވިދާޅުވީ، އައްޑޫއަކީ ފަތުރުވެރިކަމުގައިވެސް ފާހަގަކޮށްލެވޭ ސަރަޙައްދަކަށްވާތީ، ވައިގެ މަގުން 4 އަތޮޅު ގުޅާލުމަކީ، މި ސަރަޙައްދުގައި ފަތުރުވެރިކަން އިތުރަށް ކުރިއަރައިގެންދާނެ ކަމެއް ކަމަށެވެ.
މި ހަތަރު އަތޮޅުގެ 4 އެއާޕޯޓު ވައިގެ މަގުން އެއް އެއާޕޯޓު އަނެއް އެއާޕޯޓާއި ގުޅުވާލައި ދަތުރުތައް މިހާރު ފަށާފައިވާއިރު، މި ދަތުރުތަކަށް ބުކިން ހެދުމަށް މިހާރު ވަނީ ހުޅުވާލާ މި ދަތުރުތަކުގެ އަގުތައް ހާމަކޮށްފައެވެ.
މޯލްޑިވިއަންގެ ދެކުނުގެ ދަތުރުތަކާއި އަގުތައް:
ގަން - ފުވައްމުލައް - 500ރ
- ފުވައްމުލައް - ކޫއްޑޫ - 650ރ
- ފުވައްމުލައް - ކާޑެއްދޫ - 650ރ
- ގަން - ކާޑެއްދޫ - 900ރ
- ގަން - ކޫއްޑޫ - 900ރ
މި ޚިދުމަތަށް ބޭނުންކުރާނީ ޑީއެޗްސީ-6-300 ޓްވިން އޮޓާ ބޯޓެވެ. މި ބޯޓުތަކުގައި ގާތްގަނޑަކަށް 15 ވަރަކަށް މީހުންނަށް ދަތުރުކުރެވޭނެއެވެ.
މިއީ ރައީސް ޑރ. މުހައްމަދު މުއިއްޒު، އެއާޕޯޓު އެޅުމުގެ ބަދަލުގައި ކުދި މަތިންދާބޯޓުތަކަށް ރަށްރަށަށް ޖެއްސޭނެ ގޮތެއް ހޯދަން ސަރުކާރުން ދިރާސާކުރަމުންދާ ކަމަށް މި ފަހުން ވިދާޅުވެފައިވަނިކޮށް ފަށާ ޚިދުމަތެކެވެ.