މިނިސްޓްރީ އޮފް ޓުއަރިޒަމް އެންޑް އެންވަޔަރަމަންޓްއިން އިންޑިއަން އޯޝަން ޑައިވިން އެސޯސިއޭޝަންއާ ބައްދަލުކޮށްފި އެވެ.
މި ބައްދަލުވުމަކީ ރާއްޖޭގެ ކަނޑުގެ ދިރުންތަކާއި ޑައިވް ސައިޓްތައް ބެލެހެއްޓުމުގައި އިތުރަށް ގުޅުން ބަދަހިކުރުމަށް ބޭއްވި ބައްދަލުވުމެއްކަމަށް މިނިސްޓްރީން ބުނެ އެވެ.
މި ބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައިވަނީ ޑައިވް ސައިޓްތައް މޮނިޓަރ ކުރުމާއި، ހިމާޔަތްކޮށްފައިވާ ސަރަހައްދުތައް މެނޭޖްކުރުމުގައި ދެފަރާތް ގުޅިގެން މަސައްކަތް ކުރެވޭނެ ގޮތްތަކާ ބެހޭގޮތުން ކަމަށް މިނިސްޓްރީން ބުނެ އެވެ. ހާއްސަކޮށް، ރާއްޖޭގެ ނާޒުކު ފަރުތައް ރައްކާތެރިކުރުމުގައި ޑައިވް ސެންޓަރުތަކުން އަދާކުރާ މުހިންމު ދައުރުގެ މައްޗަށް މި ބައްދަލުވުމުގައި އަލިއަޅުވާލާފައިވާކަމަށް މިނިސްޓްރީން ބުނެ އެވެ.
ބައްދަލުވުމުގައި ރާއްޖެއަށް ޒިޔާރަތްކުރާ ފަތުރުވެރިންނަށް ރައްކާތެރި އަދި ހަނދާންތަކުން ފުހެލަން ދަތި ޑައިވިންގ ތަޖުރިބާއެއް ފޯރުކޮށްދިނުމަކީ ރާއްޖޭގެ ފަތުރުވެރިކަމަށް ނުހަނު ބޭނުންތެރި ކަމެއްކަން ދެފަރާތުން ފާހަގަކޮށްފައިވެ އެވެ.
މީގެ އިތުރުން، ފަރުތަކުގެ ދިރުން ދެމެހެއްޓުމަކީ ހަމައެކަނި ތިމާވެށީގެ ގޮތުން މުހިންމު ކަމެއް ނޫން ކަމަށާއި، އެއީ ރާއްޖޭގެ އިގްތިސާދުގެ މައިނާރު ކަމަށްވާ ފަތުރުވެރިކަމުގެ ދެމިއޮތުމާވެސް ގުޅިފައިވާ ކަމެއްކަން ފާހަގަކޮށް އެކަމާމެދު ވެސް ބައްދަލުވުމުގައި މަޝްވަރާ ކުރި އެވެ.
މި ބައްދަލުވުން ނިންމާލާފައިވަނީ ޑައިވް ސައިޓްތައް ބެލެހެއްޓުމާއި، ތިމާވެށީގެ ރައްކާތެރިކަމަށް ކުރެވޭ މަސައްކަތްތަކުގައި އައި.އޯ.ޑީ.އޭ އާއި ރާއްޖޭގެ ކަމާގުޅޭ އިދާރާތަކާ ދެމެދު އޮތް ގުޅުން އިތުރަށް ބަދަހިކުރުމަށް އެއްބަސްވަމުންނެވެ.