އިތުރު އަތޮޅަކަށް އާރްޓީއެލްގެ ޚިދުމަތް ފެބްރުއަރީ މަހު ފެށުމަށް ތައްޔާރުވަމުން އަންނަ ކަމަށް ޓްރާންސްޕޯޓް މިނިސްޓްރީން ބުނެފިއެވެ.
ޓްރާންސްޕޯޓު މިނިސްޓްރީން ބުނީ އަންނަ މަހު އިތުރު އަތޮޅެއްގައި ފެރީގެ ޚިދުމަތް ފެށުމަށް ތައްޔާރުވަމުން އަންނަ ކަމަށެވެ. ޚިދުމަތް ފަށާ އަތޮޅުތަކާއި އޭގެ އުސޫލުތައް ކަނޑައަޅަނީ މިނިސްޓްރީންނެވެ. ދެން އެންމެ އަވަހަށް ޚިދުމަތް ފަށާނެ އަތޮޅުތައް ކަނޑައެޅުމުގެ މަސައްކަތް ކުރަމުންދާ ކަމަށް އެ މިނިސްޓްރީން ބުނެފައިވެއެވެ.
އާރްޓީއެލްގެ ޚިދުމަތް ރާއްޖޭގައި ދެނީ 6 ޒޯނަކަށް ބަހާލައިގެންނެވެ. މި ޚިދުމަތް މިހާތަނަށް 4 ޒޯނެއްގައި ވަނީ ފަށާފައެވެ.
ޚިދުމަތް ނުފަށާ އޮތީ، ޒޯން 4 އަދި ޒޯން 3ގައެވެ. ޒޯން 4ގައި ހިމެނެނީ، މ، ފ، ދ އަދި ލ.އަތޮޅުއެވެ. ޒޯން 3ގައި ހިމެނެނީ ކ، އއ، އދ އަދި ވ.އަތޮޅެވެ.
މިކަމާ ގުޅޭގޮތުން އެމްޓީސީސީން ބުނީ ބާކީ ހުރި އަތޮޅުތަކަށް ޚިދުމަތް ދިނުމަށް ބޭނުންވާ ހުރިހާ ފެރީތައް ބަނުމުގެ މަސައްކަތް މިހާރު ކުރިއަށްދާ ކަމަށެވެ. އަދި އެ މަސައްކަތް ކަނޑައެޅިފައިވާ ތާވަލާ އެއްގޮތަށްދާއިރު، މަސައްކަތް ނިމެމުންދާ ވަރަކުން އަތޮޅުތަކަށް ދަތުރުތައް ފަށާނެ ކަމަށެވެ.