އޭޕްރިލް މަހު ބާއްވާ ލޯކަލް ކައުންސިލް އިންތިޚާބުގައި ވާދަކުރަން މެނުއަލްކޮށް ފޯމު ހުށަހެޅުމުގެ ފުރުސަތު ދިނުމުގެ ވިސްނުމެއް ނުގެންގުޅޭކަމަށް އިލެކްޝަންސް ކޮމިޝަނުން ބުނެފިއެވެ.
އެ ކޮމިޝަނުން މިފަދައިން ބުނީ އޮންލައިންކޮށް ފޯމު ހުށަހެޅުމުގެ އިތުރުން މެނުއަލްކޮށްވެސް ފޯމު ބަލައިގަންނަންޖެހޭ ކަމަށް ސިޔާސީ ބައެއް ފަރާތްތަކުން ގުޅިގެންނެވެ.
އިލެކްޝަންސް ކޮމިޝަންގެ ނައިބު ރައީސް ޢަބްދުއްރަޙްމާން ޞަލާހު ރަޝީދު ވިދާޅުވީ އެ ކޮމިޝަންގެ މައި ޕޯޓަލް މެދުވެރިކޮށް ފޯމު ހުށަހެޅުމުގެ ފުރުސަތު ހުޅުވާލި ފަހުން މިހާތަނަށް 2،200 އަށްވުރެ ގިނަ ފޯމު ހުށަހަޅާފައިވާއިރު ފޯމު ހުށަހެޅި އެއްވެސް ކެންޑިޑޭޓަކު ފޯމު ހުށަހެޅުމުގައި އުނދަގޫތަކެއް ކުރިމަތިވާކަން އެ ކޮމިޝަނާ ހިއްސާކޮށްފައި ނުވާ ކަމަށެވެ.
ގިނަ ފަރާތްތަކުން އޮންލައިންކޮށް ފޯމު ހުށަހަޅަން ފަސޭހަކަން ފާހަގަކުރައްވާ ކަމަށާއި އަދި ކޮންމެ ތަނެއްގައި ހުރެގެންވެސް ފޯމު ހުށަހެޅޭތީއާއި ފޯމުގެ އަޕްޑޭޓް ޕޯޓަލް މެދުވެރިކޮށް ބަލާލެވޭތީ އެކަން ފަސޭހަކަން ފާހަގަކުރައްވާކަމަށް ޞަލާހު ވިދާޅުވިއެވެ.
ޞަލާހު ވިދާޅުވީ ޕޯޓަލް މެދުވެރިކޮށް ކެންޑިޑޭޓުން ހުށަހަޅާ ލިޔެކިޔުންތަކުގެ ސައްޙަކަން ފަސޭހަކަމާއެކު ކަށަވަރުކުރެވޭ ކަމަށެވެ. އަދި އެ ފޯމުތަކަށް ޖަވާބު ދިނުންވެސް އަވަސް ކަމަށާއި މިއީ ކުރިމަތިލާ ކެންޑިޑޭޓުންނަށްވެސް ލުއިގޮތެއްކަން ފާހަގަކުރެއްވިއެވެ.
އިލެކްޝަންސް ކޮމިޝަނުން އިންތިޚާބަށް ކުރިމަތިލާން ހުޅުވާލީ މި މަހުގެ 17ވަނަ ދުވަހުއެވެ. މި ފުރުސަތު އަންނަ ފެބްރުއަރީ މަހުގެ 1ވަނަ ދުވަހާ ހަމައަށް ހުޅުވާލި ނަމަވެސް 7 ޖެނުއަރީން ފެށިގެން ޕޯޓަލް ހުޅުވާލައި ފޯމު ފުރުމުގެ ފުރުސަތު އެ ކޮމިޝަނުން ވަނީ ދީފައެވެ. މިއީ މީގެ ކުރިން ދެވޭ ފުރުސަތެއް ނޫންކަމަށާއި އޭގެ ސަބަބުންވެސް ކުރިއާލައި ފޯމު ހުށަހެޅުމަށް ގިނަ ބަޔަކަށް ލުއިތަކެއް ލިބިގެންދިޔަ ކަމަށްވެސް ޞަލާހު ފާހަގަކުރެއްވިއެވެ.