މިވަގުތު ރާއްޖެއަށް ނިޕާ ވައިރަހުގެ ނުރައްކާ އޮތް މިންވަރު ކުޑަކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ރޭ ނެރުނު ނޫސްބަޔާނެއްގައި ބުނީ، މިވަގުތު ރާއްޖެއަށް ނިޕާ ވައިރަހުގެ ނުރައްކާ އޮތް މިންވަރު ކުޑަ ނަމަވެސް، ހާލަތު މޮނީޓާކުރަމުން އަންނަ ކަމަށާއި އެ ބައްޔާގުޅޭ އެއްވެސް ކޭސްއެއް އަދި ކޮންޓެކްޓުވި އެއްވެސް ފަރާތެއް ހުރިކަމުގެ ރިޕޯޓެއް އެ އެޖެންސީއަށް ލިބިފައިނުވާ ކަމަށެވެ.
އެޗްޕީއޭ އިން ބުނީ، މި ހިނގާ ޖަނަވަރީ މަހުގައި އިންޑިއާގެ ވެސްޓު ބެންގޯލްއިން ނިޕާ ވައިރަހަށް ޕޮޒިޓިވް 3 މީހަކު ފެނިފައިވާއިރު، އެ މީހުންނާ ކޮންޓެކްޓްވި 180 އަށްވުރެ ގިނަ މީހުން ދެނެގަނެވި، އެމީހުން މިހާރު ކަރަންޓީނު ކުރެވިފައިވާކަމަށެވެ. އަދި ކަރަންޓީނު ކުރެވިފައިވާ މީހުންގެ ހާލަތު އެ ޤައުމުގެ ކަމާބެހޭ ފަރާތްތަކުން ވަރަށް ގާތުން ބަލަމުންދާކަމަށާއި ބަލި ޖެހިގެން އިތުރު ކޭސްއެއް ފެނިފައި ނުވާއިރު، މި ކޭސްތަކާއި ގުޅިގެން އިންޑިއާގެ އިތުރު އެހެން އެއްވެސް ސަރަޙައްދަކުން އަދި އެހެން ޤައުމަކުންވެސް މި ބަލި ފެނިފައިވާކަމުގެ ރިޕޯޓެއް ކޮށްފައި ނުވާކަމަށް އެ އެޖެންސީން ބުނެފައިވެއެވެ.
މީގެއިތުރުން، އެ ނޫސްބަޔާނުގައި ވަނީ، ޢާންމު ޞިއްޙަތު ރައްކާތެރިކުރުމަށް އަޅަންޖެހޭ ފިޔަވަޅުތައް ކަމާގުޅޭ އިދާރާތަކާއި ޞިއްޙީ ޚިދުމަތްދޭ ތަންތަނާއި ގުޅިގެން އެޗްޕީއޭ އިން ކުރަމުންދާކަން ފާހަގަކޮށް، މި ބަލި ފެނިފައިވާ ވެސްޓު ބެންގޯލް ސަރަޙައްދަށް ދަތުރުކުރާ ފަރާތްތަކުން ސަމާލުވުމަށް އިލްތިމާސްކޮށްފައެވެ.