ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) އިން ދެކުނު އޭޝިއާއަށް ކަނޑައެޅުއްވި އާ ރީޖަނަލް ރެޕްރެޒެންޓެޓިވް ކްރިސްޓިއަން ހޮލްގަރ މަގާމަށް އައްޔަންކުރެއްވި ކަމުގެ ފަތްކޮޅު، މިނިސްޓަރ އޮފް ފޮރިން އެފެއާޒް ޑރ. ޢަބްދުﷲ ޚަލީލަށް މިއަދު ހުށަހަޅުއްވައިފިއެވެ.
ފަތްކޮޅު ހުށަހެޅުއްވުމަށްފަހު ބޭއްވި ބައްދަލުވުމުގައި، ދިވެހިރާއްޖެއިން ޔޫ.އެން.އޯ.ޑީ.ސީ.އާ އެކު ކުރަމުންދާ މަސައްކަތްތައް ފާހަގަކުރެއްވައި އެކަމަށް މިނިސްޓަރ ޑރ. ޚަލީލް ޝުކުރު އަދާކުރެއްވިއެވެ.
ވަކީން ޚާއްސަކޮށް، ބޯޑަރު ހުރަސްކޮށް ހިންގާ ކުށްތަކާއި، ޓެރަރިޒަމް އަދި ހަރުކަށި ފިކުރާ ދެކޮޅަށް ކުރެވޭ މަސައްކަތްތަކުގައި ޔޫ.އެން.އޯ.ޑީ.ސީ އިން އަދާކުރާ ދައުރު ފާހަގަކުރެއްވިއެވެ.
މީގެ އިތުރުން ކުށްތަކުން ރައްކާތެރިވުމަށް ކުރެވޭ މަސައްކަތްތަކާއި، ގާބިލުކަން އިތުރުކުރުމުގެ ހަރަކާތްތަކާއި، ހެކީގެ މައްޗަށް ބިނާވެފައިވާ ސިޔާސަތުތައް ބައްޓަންކުރުމުގައި ޔޫއެންއޯޑީސީ އާއެކު މަސައްކަތްކުރާނެ ކަމުގެ ޔަޤީންކަން ދެއްވިއެވެ.
މިއީ ގައުމުގެ ސުލްހަޔާއި، ސަލާމަތާއި، ތަރައްގީއަށް މަގުފަހިކޮށްދޭ ކަންކަން ކަމުގައިވެސް މިނިސްޓަރ ޑރ. ޚަލީލް ފާހަގަކުރެއްވިއެވެ.
ރީޖަނަލް ރެޕްރެޒެންޓެޓިވް ހޮލްގަރ ވަނީ ޔޫ.އެން.އޯ.ޑީ.ސީ އާއި ދިވެހިރާއްޖެއާ ދެމެދު އޮތް ވަރުގަދަ ގުޅުން ފާހަގަކުރައްވައި، ސަރުކާރުން އަހަންމިއްޔަތުކަންދޭ ކަންކަމުގައި އެހީތެރިކަން ފޯރުކޮށްދިނުމަށް ތައްޔާރަށް އޮތްކަން ވިދާޅުވެފައެވެ.
މީގެ އިތުރުން، ޔޫ.އެން.އޯ.ޑީ.ސީ އިން މިހާރު ކުރިއަށްގެންދާ އަދި ކުރިއަށް ރޭވިފައިވާ ޕްރޮގްރާމްތަކަށް އަލިއަޅުއްވާލައްވައި، ދެކުނު އޭޝިއާ ސަރަހައްދަށް ކުރިމަތިވެފައިވާ ގޮންޖެހުންތަކުން އަރައިގަތުމުގައި ސަރަހައްދީ އެއްބާރުލުމުގެ މުހިންމުކަން ފާހަގަކުރެއްވިއެވެ.