ސަރުކާރާ ދެކޮޅަށް މަސައްކަތްކުރާ ކައުންސިލަރުން ހޮވައިފި ނަމަ، ހުރިހާ ރައްޔިތުންނަށް އެކަމުގެ ގެއްލުންވާނެ ކަމަށް ރައީސް ޑރ. މުހައްމަދު މުއިއްޒުގެ އަނބިކަނބަލުން، މެޑަމް ސާޖިދާ މުހައްމަދު ވިދާޅުވެއްޖެއެވެ.
ކުރިއަށްއޮތް ލޯކަލް ކައުންސިލު އިންތިހާބަށް މާފަންނު ދެކުނު ދާއިރާގެ ޕީއެންސީގެ ޖަހަގަ ހުޅުވުމަށް ރޭ ބޭއްވި ޖަލްސާގައި ވާހަކަދައްކަވަމުން މެޑަމް ސާޖިދާ ވިދާޅުވީ ކައުންސިލުތަކަކީ ސަރުކާރުގެ ސިޔާސަތުތައް ތަންފީޒުކުރުމުގައި ރައްޔިތުންނާ އެންމެ ގާތުން މަސައްކަތްކުރާނެ ފަރާތްތައް ކަމަށާއި އެހެންކަމުން ރައްޔިތުންގެ ހުރި ހުރިހާ ކަންކަމެއް ސީދާ ސަރުކާރަށް ގެނެސްދެވޭނެ ބަޔަކު ތިބުމަކީ ރައްޔިތުންނަށް އޭގެ ލަބަޔާއި މަންފާކުރާނެ ކަމެއް ކަމަށެވެ.
މެޑަމް ސާޖިދާ ވިދާޅުވީ ރެޔާއި ދުވާލު މަސައްކަތްކުރައްވަމުންދާ ވެރިޔަކާ އެކީގައި މަސައްކަތްކުރާނެ ކައުންސިލަރުންތަކެއް، ޑަބްލިޔުޑީސީއެއް، މޭޔަރެއް ހުރުމަކީ ކޮންމެހެން ކުރަންޖެހޭނެ ކަމެއް ކަމަށެވެ. އަދި ސަރުކާރާ ދެކޮޅަށް މަސައްކަތްކުރުމުގެ ވިސްނުމުގައި އަންނަ ނަމަ، ރައްޔިތުންނަށް ވާނެ އެއްވެސް ފައިދާއެއް ނޯންނާނެ ކަމަށް ވިދާޅުވިއެވެ.
ސާޖިދާ މިފަދައިން ވިދާޅުވެފައިވާއިރު ޕީއެންސީގެ އޮފީސް ހުޅުވުމަށް ބޭއްވި ޖަލްސާގައި ރައީސް މުހައްމަދު މުއިއްޒު ވެސް ވަނީ ސަރުކާރުގެ ކައުންސިލަރުން ހޮވުމަށް އިލްތިމާސްކޮށްފައެވެ.