ރާއްޖެއާއި އިންޑިއާ ދެ ގައުމުގެ ރައްޔިތުންގެ މަންފާއަށްޓަކައި އެކުގައި ކުރާ މަސައްކަތްތައް ކުރިއަށްގެންދާނެކަމަށް އިންޑިއާގެ ބޮޑުވަޒީރު ނަރެންދްރަ މޯދީ ވިދާޅުވެއްޖެއެވެ.
ނަރެންދްރަ މޯދީ މިފަދައިން ވިދާޅުވީ، އިންޑިޔާގެ ޖުމްހޫރީ ދުވަހާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުބ އެކްސްގައި ހިއްސާކުރެއްވި ތަހުނިޔާގެ މެސެޖާ ގުޅިގެން ކުރެއްވި ޕޯސްޓެއްގައެވެ.
މޯދީގެ ޕޯސްޓުގައިވަނީ އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި ރައީސް އަރިސްކުރެއްވި ތަޙުނިޔާއާއި ހެޔޮއެދުން އިޙްތިރާމާއިއެކު ބަލައިގަންނަކަމަށް ވިދާޅުވެފައެވެ. އަދި ދެ ގައުމުގެ މަންފާއަށްޓަކައި އެކުގައި ކުރާ މަސައްކަތްތައް ކުރިއަށްގެންދާނެކަމަށް މޯދީ ވިދާޅުވިއެވެ. މޯދީގެ ޕޯސްޓު ނިންމަވާލެއްވީ، ދިވެހި ރައްޔިތުންނަށް އުފާފާގަތި ދުވަސްތަކަކަށް އެެދެމުންނެވެ.
އިންޑިޔާގެ ޖުމްހޫރީ ދުވަސް ފާހަގަކުރަނީ އެ ޤައުމުގެ ޤާނޫނު އަސާސީ އެކުލަވާލާ، ޢަމަލުކުރަން ފެށި ދުވަހާއި ގުޅުވައިގެންނެވެ.