އިސްލާމްދީނަށާއި ގައުމަށް ލޯބިކުރާ، އުޅުމާއި ސުލޫކު ރަނގަޅު، ހަރުދަނާ، ހީވާގި ދަރީންތަކެއް ބިނާކުރެވޭނީ ތައުލީމާއި ތަރުބިއްޔަތު ދީގެންކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ދިރާސީ އައު އަހަރުގެ ކިޔެވުން މިއަދު ފެށުމާ ގުޅިގެން އެކްސްގައި ހިއްސާކުރެއްވި ޕޯސްޓެއްގައެވެ.
އެގޮތުން ރައީސްގެ މެސެޖުގައިވަނީ ތައުލީމީ ދާއިރާގެ އެންމެހާ ހިންގުންތެރީންނަށާއި ޓީޗަރުންނަށާއި، ބެލެނިވެރީންނާއި ދަރިވަރުންނަށް ކާމިޔާބީއަށް އެދިވަޑައިގެންފައެވެ.
ރައީސް ވިދާޅުވީ ތައުލީމު އުނގެނުމާއި އުނގަންނައިދިނުމަކީވެސް ވަރަށް ބޮޑު ދީނީ އަދި ގައުމީ ޒިންމާއެއްކަމަށެވެ. އަދި ދިވެހީން އެދޭ ފާގަތި ކުރިމަގު މި ގައުމަށް ހޯދައިދެވޭނީ އެ ޒިންމާ އަދާކުރުމުގައި އެންމެން އެއްބާރުލައި އިހުލާސްތެރިވީ މިންވަރަކުންކަމަށް ރައީސް ވިދާޅުވެފައިވެއެވެ.
ތައުލީމީ ނިޒާމު ހަރުދަނާކޮށް ކުރިއެރުވުމަށާއި ހެޔޮލަފާ، ތޫނުފިލި، އުޅުން ރީތި ދަރީންތަކެއް ދިވެހި ތައުލީމީ ހިޔާވަހިތަކުގައި ބޮޑެތި ކުރުމުގެ ހެޔޮ ތައުފީގު ދެއްވުން އެދި ރައީސްގެ ޕޯސްޓުގައި ދުއާކުރައްވާފައިވެއެވެ.