19 އަހަރަށްފަހު މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ކެރޭންތައް އަޕްގްރޭޑުކުރުމުގެ މަސައްކަތް އެ ކުންފުނިން ފަށައިފި އެވެ.
މިކަން ހާމަކޮށް އެ ކުންފުނިން ބުނީ ކުންފުނީގެ މަސައްކަތްތަކަށް ބޭނުންކުރާ މުދާ އުފުލާ ކެރޭނުތަކަށް ބޮޑެތި މަރާމާތުތަކާއި އަޕްގްޜޭޑުތައް ގެންނަން ޖެހިފައިވާ ކަމަށެވެ.
މި މަސައްކަތް ކުރަމުން ދާނީ ދެ ފިޔަވައްސަކަށް ބަހާލައިގެން ކަމަށް އެ ކުންފުނިން ބުނެ އެވެ. އެގޮތުން ފުރަތަމަ ފިޔަވަހީގައި ކުރިއަށް ދާނީ ކޮންޓްރޯލް އަދި ޑްރައިވް ސިސްޓަމްތައް ޒަމާނީ ފެންވަރަށް ތަރައްގީ ކުރުން ކަމަށް އެ ކުންފުނިން ބުނެ އެވެ.
އެއަށްފަހު ދެވަނަ ފިޔަވަހީގައި ޕަވަރ އަދި އިންޖީނު އަޕްގްރޭޑު ކުރުމުގެ މަސައްކަތް ފަށާނެކަމަށް ކުންފުނިން ބުނެފައިވެ އެވެ.
އެމްޕީއެލް އިން ހާމަކުރާ ގޮތުގައި މި ކެރޭނުތައް 2007 ވަނަ އަހަރުން ފެށިގެން ކުންފުނީގެ އެކި މަސައްކަތްތަކުގައި އަންނަނީ ބޭނުން ކުރަމުންނެވެ. އަދި ގާތްގަނޑަކަށް 19 އަހަރު ވަންދެން މި ކެރޭނުތައް އޮޕަރޭޝަންތަކުގައި ބޭނުންކުރަމުން އަންނައިރު މިތަކެތި މަރާމާތުކޮށް ޒަމާނީ ފެންވަރަކަށް އަޕްގްރޭޑު ކުރުމަކީ ކޮންމެހެންވެސް މުހިންމުކަމެއް ކަމަށް އެމްޕީއެލްއިން ބުނެ އެވެ.
އެމްޕީއެލްގެ މަސައްކަތުގައި ބޭނުންކުރާ އުޅަނދުތަކާއި އެނޫންވެސް ސަރަހައްދުތަކަށް އެކަށީގެންވާ ބަދަލުތަކެއް ގެނެސްފައިނުވާތީ ބައެއް ކަހަލަ ހާދިސާތައް ވެސް ހިނގާފައިވެ އެވެ. އެކަށީގެންވާ މިންވަރަށް ކަންކަން ނުބެލުމުގެ ސަބަބުން ފާއިތުވި އަހަރުވެސް އެމްޕީއެލްގައި ހިތާމަވެރި ހާދިސާތައް ހިނގާފައިވެ އެވެ.