ހައިވޭގެ ޓްރެފިކް ލައިންތައް އާކުރަން ނިންމާފައިވާކަމަށް މޯލްޑިވްސް ޕޮލިސް ސާވިސް އިން ބުނެފިއެވެ.
ފުލުހުން އެކްސްގައި އާންމުކޮށްފައިވާ ބަޔާނެއްގައި ބުނީ މަގުތަކަކީ އަމާން ރައްކާތެރި ތަނަކަށް ހެދުމަށް ކުރެވޭ މަސައްކަތުގެ ތެރެއިން ހައިވޭގެ ޓްރެފިކް ލައިންތައް އާކުރުމުގެ މަސައްކަތް މިރޭ ފަށާނެކަމަށެވެ.
އެގޮތުން މިރެއިން ފެށިގެން މަސައްކަތް ނިމެންދެން، ކޮންމެ ރެއަކު 12:00 އިން ހެނދުނު 06:00 އަށް ހައިވޭގެ ޓްރެފިކް ލައިންތައް އާކުރުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަނުން ކުރިއަށް ގެންދިއުމަށް ހަމަޖައްސާފައިވާކަމަށް ފުލުހުން މައުލޫމާތުދެއެވެ.
މީގެ އިތުރުން ހައިވޭގެ މަސައްކަތްތައް ކުރިއަށްދާނީ ކޯން ޖަހައިގެން ކަމަށާއި، މަސައްކަތް ކުރިއަށްދާ ވަގުތު ހައިވޭ ބަންދު ނުކުރާނެ ކަމަށް ފުލުހުން ބުނެއެވެ. އަދި މިއީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް އަޅާ މުހިންމު ފިޔަވަޅެއްކަން ފުލުހުން ފާހަގަކުރެއެވެ.
ހައިވޭ މަރާމާތުކުރުމުގެ މަސައްކަތް ފަށާފައި މިވަނީ، އެ މަގުގެ ތާރުގަނޑުގައި ކުރަހާފައިވާ މަގުމަތީގެ ނިޝާންތައް ވަރަށް ބޮޑަށް ފުހެވި، ދުއްވާ ފަރާތްތަކަށް ދަތިތަކާ ކުރިމަތިވަމުންދާ ދަނޑިވަޅެއްގައެވެ. މީގެ އިތުރުން ހައިވޭގެ ދެ ފަރާތުގައި ޖަހާފައިވާ ދަގަނޑުތަކުގައި ދަބަރު ޖަހައި ވަރަށް ބޮޑަށް ބާވެފައިވާއިރު، އެއާޕޯޓުގެ ފެންސުތައްވެސް ވަނީ ވަރަށް ބޮޑަށް ހަލާކުވެފައެވެ.
މި މަސައްކަތުގެ ސަބަބުން ރޭގަނޑު ވަގުތުތަކުގައި ދަތުރުކުރާ ފަރާތްތަކަށް މަގުމަތީގެ ނިޝާންތައް ސާފުކޮށް ފެންނަން ހުރުމުން އެކްސިޑެންޓްތައް މަދުވުމަށް ބޮޑު އެހީތެރިކަމެއް ލިބިގެންދާނެ ކަމަށް ފުލުހުން ވިދާޅުވެއެވެ.
މި އަހަރުގެ ފުރަތަމަ 7 ދުވަސް ތެރޭގައި ބުރިޖު އަދި ހައިވޭ ގައި 11 އެކްސިޑެންޓު ހިނގާފައިވާކަން ފާހަގަކުރެވެއެވެ.
މި މަސައްކަތް ކުރިއަށް ދާއިރު، ހައިވޭ ބޭނުންކުރާ މީހުން މިކަމަށް ސަމާލުވުމަށް ފުލުހުން އިލްތިމާސް ކޮށްފައިވެއެވެ.