ކުޅުނު އެއްވެސް މެޗަކުން ބަލިނުވެ މުބާރާތުގެ ޗެމްޕިއަންކަން ހޯދި ރާއްޖޭގެ ގައުމީ ފުޓްސަލް ޓީމުން ހޯދި ކާމިޔާބީ ފާހަގަކުރުމަށް ހަވާއެރުވުމާއެކު ހާއްސަ ހަރަކާތެއް ކުރިއަށް ގެންދިޔުމަށް ނިންމައިފި އެވެ.
މުބާރާތުގެ ފަހު މެޗު ރާއްޖެ މިއަދު ކުޅުނު އިރު މި މެޗުން ވެސް ރާއްޖެ ވަނީ މޮޅުވެފަ އެވެ. ލަންކާއާ ދެކޮޅަށް ކުޅުނު މި މެޗު ރާއްޖެއިން ކާމިޔާބު ކުރީ 5-2 ގެ ނަތީޖާއަކުންނެވެ.
ޓީމު ރާއްޖެއަށް އައުމަށް ހަމަޖެހިފައިވާ ބޯޓު ވެލާނަ އިންޓަނޭޝަނަލް އެއަޕޯޓަށް ޖެއްސުމާއެކު އުފާ ފާޅުކުރުމައި މަރުހަބާ ކިއުމުގެ ހަރަކާތްތައް ވެލާނާ އިންޓަނޭޝަނަލް އެއާޕޯޓާއި ހަމައިން ފެށޭނެ ކަމަށް ސްޕޯޓްސް މިނިސްޓްރީން ބުނެ އެވެ.
ސަރަހައްދީ ފުރަތަމަ ސާފް ފުޓްސަލް މުބާރާތުގައި ރާއްޖެ ހޯދީ ފަހުރުވެރި ކާމިޔާބީ ފާހަގަކުރުމަށް ހަވާ އެރުވުން އޮތީ މާދަމާރޭ އާޓިފިޝަލް ބީޗުގަ އެވެ.
ސްޕޯޓްސް މިނިސްޓްރީއިން ބުނީ އެފްއޭއެމްއާ ގުޅިގެން ހަވާއެރުވުމުގެ އިތުރުން އާޓިފިޝަލް ބީޗުގައި ބޮޑުބެރުގެ ހަރަކާތްތައް ވެސް ކުރިއަށް ދާނެ ކަމަށެވެ. މި ހަރަކާތުގައި ޓީމުގެ ކުޅުންތެރިންނާއި ޓީމަށް ލިބުނު ޓްރޮފީއާއެކު އާންމުންނަށް ފޮޓޯ ނެގުމުގެ ފުރުސަތު ވެސް އޮންނާނެ އެވެ.
ވީއައިޕީން ޓީމަށް މަރުހަބާ ކިޔުމަށްފަހު އެއާޕޯޓުން ޓީމު މާލެ އައުމަށްފަހު އަމީނީ މަގާއި މަޖީދީ މަގުން ޕިކަޕުގައި އާންމުންނަށް ފެންނަ ގޮތަށް ޓްރޮފީއާއެކު ޓީމު ބުރެއް ޖަހާ ގޮތަށް އޮތީ ހަމަޖެހިފަ އެވެ. އެއަށްފަހު އާޓިފިޝަލް ބީޗުގައި އޮންނަ ހަރަކާތުގައި ޓީމު ބައިވެރިވާނެ އެވެ.
ގައުމީ ޓީމަށް މަރުހަބާ ކިޔުމަށް މި ހަރަކާތުގައި ވީހާވެސް ގިނަ ބަޔަކު ބައިވެރިވުމަށް މިނިސްޓްރީން އެދިފައިވެ އެވެ.