އަންޑަގްރެޖުއޭޓް އިންޖިނިއަރިން ޕްރޮގްރާމުގެ ދަށުން ސްކޮލާޝިޕް އަށް ކުރިމަތިލުމުގެ ފުރުސަތު މިނިސްޓްރީ އޮފް ހަޔަރ އެޑިއުކޭޝަން، ލޭބާ އެންޑް ސްކިލް ޑިވަލޮޕްމެންޓް އިން ހުޅުވާލައިފި އެވެ.
މިނިސްޓްރީ އޮފް ހަޔަރ އެޑިއުކޭޝަން އިން އެކްސްގައި އާންމުކޮށްފައިވާ ޕޯސްޓެއްގައި ބުނީ ބަންގްލަދޭޝް ގައި ހުންނަ، ބަންގްލަދޭޝް ޔުނިވަރސިޓީ އޮފް އިންޖިނިއަރިންގ އެންޑް ޓެކްނޮލޮޖީ (ބީޔޫއީޓީ)، އަންޑަގްރެޖުއޭޓް އިންޖިނިއަރިން ޕްރޮގްރާމުގެ ދަށުން ސްކޮލާޝިޕް އަށް ކުރިމަތިލުމުގެ ފުރުސަތު މިހާރު ހުޅުވާލާފައިވާކަމަށެވެ.
މި ފުރުސަތު ހުޅުވާލާފައިވަނީ މިއަދުން ފެށިގެން 29 ޖަނަވަރީ އާ ހަމައަށް ކަން މިނިސްޓްރީ އޮފް ހަޔަރ އެޑިއުކޭޝަން އިން ފާހަގަކޮށްފައިވެއެވެ.
ސްޓޫޑަންޓް ލޯނު ސްކީމްގެ ދަށުން މިހާތަނަށް 1,249 މިލިއަން ރުފިޔާ ވަނީ ދަރިވަރުންނަށް ދޫކުރެވިފައެވެ. އަދި 2025 ވަނަ އަހަރު ޖުމްލަ 548 މިލިއަން ރުފިޔާ ވަނީ މި ސްކީމްގެ ދަށުން ދޫކުރެވިފައެވެ. ދިވެހިރާއްޖޭގެ އިތުރުން ބޭރުގެ 36 ޤައުމެއްގައި މަތީ ތަޢުލީމާއި ތަމްރީނު ހާޞިލުކޮށް ޖުމްލަ 660 ދަރިވަރުން ވަނީ 2025 ވަނަ އަހަރުގެ ނިޔަލަށް ދަސްވެނިވެފައެވެ.
ސްކޮލަރޝިޕް ސްކީމްތަކުގެ ދަށުން މިހާތަނަށް 471 މިލިއަން ރުފިޔާ ދޫކުރެވިފައިވާއިރު، 2025 ވަނަ އަހަރު ޖުމްލަ 222 މިލިއަން ރުފިޔާ ވަނީ ދޫކުރެވިފައެވެ. އަދި 2025 ވަނަ އަހަރު ޖުމްލަ 180 ދަރިވަރުން ވަނީ އެކި ސްކޮލަރޝިޕް ސްކީމްތަކުގެ ދަށުން ދަސްވެނިވެފައެވެ.