ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުން ޑިޖިޓަލްކޮށް، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެން.ޑީ.އެމް.އޭ) އިން، 'ޑެމޭޖް އެސެސްމަންޓް އެންޑް ލޮސް އެނަލިސިސް' (ޑާލާ) ޕްލެޓްފޯމް އިފްތިތާހްކޮށްފިއެވެ.
ހޮޓެލް ޖެންގައި މިއަދު ހެނދުނު ބޭއްވި ރަސްމިއްޔާތެއްގައި ޑާލާ ޕްލެޓްފޯމް އިފްތިތާހްކޮށްދެއްވީ މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާން އެވެ.
ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫ.އެން.ޑީ.ޕީ) މޯލްޑިވްސްގެ އެހީތެރިކަމާއެކު، އެން.ޑީ.އެމް.އޭ އިން މިއަދު ތަޢާރަފްކުރި "ޑާލާ" ޕްލެޓްފޯމަކީ ކާރިސާތަކުގައި ލިބޭ ގެއްލުންތައް ރިފޯޓުކުރުން ޑިޖިޓަލްކޮށް، ކާރިސާތަކާ ގުޅޭ ރިޕޯޓްތައް ތައްޔާރުކުރުމާއި، ހެކީގެ މައްޗަށް ބިނާކޮށް ނިންމުންތައް ނިންމުމުގެ ނިޒާމު ހަރުދަނާކުރުމަށް ފަރުމާކޮށްފައިވާ ގައުމީ ޑިޖިޓަލް ޕްލެޓްފޯމެއްކަމަށް އެން.ޑީ.އެމް.އޭ އިން މައުލޫމާތުދެއެވެ.
މި ޕްލެޓްފޯމްގެ ސަބަބުން، މީގެ ކުރިން މެނުއަލްކޮށް ކުރަމުންދިޔަ ކާރިސާތަކުގެ ގެއްލުން ވަޒަންކުރުމުގެ މަސައްކަތް ފަސޭހަ، ރައްކާތެރި އަދި ގުޅިފައިވާ ޑިޖިޓަލް ނިޒާމަކަށް ބަދަލުވެގެންދާނެކަމަށް އެން.ޑީ.އެމް.އޭ އިން ބުނެއެވެ. އެގޮތުން ޕޯޓަލް މެދުވެރިކޮށް އޮންލައިންކޮށް ކާރިސާތަކުގެ މަޢުލޫމާތު ކަމާގުޅޭ މުއައްސަސާތަކަށް ރިޕޯޓުކުރެވޭނެ ކަމަށާއި ލިބުނު ގެއްލުންތަކުގެ ހިސާބުތައް އޮޓޮމެޓިކުން ތައްޔާރުކުރުމާއި ގެއްލުން ވަޒަންކުރުމުގެ ސައްހަކަން އިތުރުވެ އަވަސްވެގެންދާނެކަން އެން.ޑީ.އެމް.އޭ އިން ފާހަގަކޮށްފައިވެއެވެ.
މި ބަދަލާއެކު އެންމެ ބޮޑު ފަސޭހަކަމެއް ލިބޭނީ، ކާރިސާތަކާ ގުޅިގެން އެހީތެރިކަމަށް އެދޭ ފަރާތްތަކަށް ކަން ފާހަގަކޮށް އެން.ޑީ.އެމް.އޭ އިން ބުނީ ފަސޭހަކަމާއެކު ޕޯޓަލް މެދުވެރިކޮށް އެހީއަށް އެދި ހުށަހެޅުމާއި، އެހީގެ ކަންކަން ކުރިއަށްދާގޮތާއި ހުށަހަޅާފައިވާ މައުލޫމާތު ބަދަލުކުރުން ފަދަ ކަންކަމާ ގުޅޭ މައުލޫމާތު އެސް.އެމް.އެސް މެދުވެރިކޮށް އެފަރާތްތަކަށް ލިބޭނެކަމަށެވެ. މީގެ ނަތީޖާއެއްގެ ގޮތުން ކާރިސާތަކަށް އިޖާބަދިނުމާއި އިއާދަކުރުމުގެ މަސައްކަތް މިހާރަށްވުރެ އަވަސްވެ، ހަރުދަނާވެގެންދާނެކަމަށް އެން.ޑީ.އެމް.އޭ އިން ބުނެއެވެ.
އެން.ޑީ.އެމް.އޭ އިން ބުނީ ޑާލާ ޕޯޓަލްގެ މުހިންމު އެއް ސިފަޔަކީ ކާރިސާގެ ބާވަތްތަކާއި ގެއްލުން ލިބުނުކަމަށް ރިޕޯޓުކުރެވުނު ދާއިރާއާއި ސަރަހައްދާއި އާބާދީގެ ގިންތިތަކާއި މުދަލުގެ ބާވަތްތަކަށް ބަލައި ވަކިވަކިން މައުލޫމާތު އެއްކުރުމުގެ ގާބިލުކަން ކަމަށެވެ. މީގެ ސަބަބުން ކާރިސާތަކުގެ އަސަރުތައް ފުންކޮށް ދެނެގަނެވި، އެހީތެރިކަން ބޭނުންވާ ދާއިރާތަކަށް އަމާޒުކޮށްގެން ފިޔަވަޅު އެޅުމަށާއި، ރޭވުންތެރިކަން އިތުރުކުރުމާއި، އަދި ހަމަހަމަކަމާއެކު އިއާދަކުރުމުގެ މަސައްކަތްތައް ކުރިއަށް ގެންދިއުމަށް މަގުފަހިވެގެންދާނެކަމަށް އެން.ޑީ.އެމް.އޭ އިން މައުލޫމާތުދެއެވެ.
ޑާލާ ޕޯޓަލް އިފްތިތާހުކުރުމަކީ ގައުމީ ފެންވަރުގައި ކާރިސީ ހިރާސް ބެލެހެއްޓުން ހަރުދަނާކުރުމަށާއި، އަވަސް، އަދި ވިލުންތެރި ރާއްޖެއެއް ބިނާކުރުމަށް އެޅުނު މުހިންމު ފިޔަވަޅެއްކަމަށް އެން.ޑީ.އެމް.އޭ އިން ބުނެއެވެ.
މި މަސައްކަތަކީ އެން.ޑީ.އެމް.އޭގެ ސްޓްރެޓީޖިކް އެކްޝަން ޕްލޭނާ އެއްގޮތްވާ ގޮތުގެމަތިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާންކުރައްވާފައިވާ ޑިޖިޓަލް މޯލްޑިވްސް 2.0 ގެ ގައުމީ ޑިޖިޓަލައިޒޭޝަން ލަނޑުދަނޑިތަކާ އެއްގޮތް، އަދި 'ސެންޑާއީ ފްރޭމްވޯކް ފޯ ޑިޒާސްޓަރ ރިސްކް ރިޑަކްޝަން' އާއި 'އާލީ ވޯނިންގްސް ފޯ އޯލް' އިސްނެގުމުގެ ދަށުން ވެފައިވާ ބައިނަލްއަގުވާމީ އިލްތިޒާމުތަކަށް ބާރުދޭ މުހިއްމު މަސައްކަތެއް ކަން އެން.ޑީ.އެމް.އޭ އިން ފާހަގަކޮށްފައިވެއެވެ.
ޑާލާ ޕޯޓަލް ފަރުމާކުރުމުގެ މަސައްކަތް ކޮށްފައިވަނީ ޔޫ.އެން.ޑީ.ޕީ ގެ ފަންޑިން ވިންޑޯ މެދުވެރިކޮށް ޑެންމާކާއި ލަގްޒެމްބާގް އަދި ދެކުނު ކޮރެއާ ސަރުކާރުގެ އެހީއާއެކުގައެވެ.