މި ސަރަހައްދުގެ ހަމަޖެހުން ގާއިމްކުރުމަށް އިންޑިޔާއިން މުހިންމު ދައުރެއް އަދާކުރާކަމަށް ޚާރިޖީ ވަޒީރު، ޑޮކްޓަރ ޢަބްދުﷲ ޚަލީލް ވިދާޅުވެއްޖެ އެވެ.
އިންޑިއާގެ ޖުމްހޫރީ ދުވަހުގެ މުނާސަބަތުގައި އެޤައުމުގެ އެކްސްޓަރނަލް އެފެއާޒް މިނިސްޓަރ ޑޮކްޓަރ ސުބްރަމާނިއަމް ޖައިޝަންކަރު އަށް ދިވެހިރާއްޖޭގެ ޚާރިޖީ ވަޒީރު ޚަލީލް ފޮނުއްވި ތަހުނިޔާގެ މެސެޖުގައި އިންޑިއާގެ 77 ވަނަ ޖުމްހޫރީ ދުވަހުގެ ތަހުނިޔާ ފޮނުއްވާފައިވެ އެވެ.
ތަހުނިޔާގެ މެސެޖުގައި ޚަލީލް ވިދާޅުވީ އިންޑިއާގެ ޖުމްހޫރީ ދުވަސް ފާހަގަކުރުމުން ރަމްޒުކޮށްދެނީ ޑިމޮކްރެޓިކް ހަމަތައް ނެގެހެއްޓުމަށާއި އެންމެން ޝާމިލުވާ ގޮތަށް ގައުމު ތަރައްގީކުރުމަށް އިންޑިއާއިން ދެމުންގެންދާ އަހަންމިއްޔަތުކަން ކަމަށެވެ. އަދި ދުނިޔޭގެ އެންމެ ބޮޑު ޑިމޮކްރަސީގެ ގޮތުގައާއި، ޒަމާންވީ ޙަޟާރަތެއް އޮތް ޤައުމެއްގެ ގޮތުން، މި ސަރަޙައްދުގެ ސުލްހަޔާއި ހަމަޖެހުން ގާއިމުކޮށް، ގުޅުން ބަދަހިކުރުމުގައި އިންޑިއާއިން އަދާކުރަމުންދަނީ މުހިންމު ދައުރެއްކަމަށް ޚަލީލް ވިދާލުވި އެވެ.
މިއިން ދައްކުވައިދެނީ ދެ ގައުމުގެ ދެމެދުގައި އޮތް އިތުބާރާއި، އެއްބަޔަކު އަނެއް ބަޔަކަށް އިޙްތިރާމްކުރުމާއި ދެގައުމުގެ ގުޅުން ބިނާވެފައިވާ މައިގަނޑު އަސާސްތަކުގެ ވަރުގަދަކަން ކަމަށް ޚަލީލް ވިދާޅުވި އެވެ.