އުރީދޫ މޯލްޑިވްސް އިން 2026 ވަނަ އަހަރުގެ ކަލަންޑަރު "ޓީ ވިތު އުރީދޫ" ގެ ނަމުގައި ނެރެފި އެވެ.
ކޮންމެ އަހަރަކުވެސް އުރީދޫގެ ކަލަންޑަރުން ކިޔައިދެނީ ދިވެހި ސަގާފަތާއި އުފެއްދުންތެރިކަމާއި ތަޖުރިބާ ހިއްސާ ކުރާ ވާހަކައެކެވެ. 2026 ވަނަ އަހަރުގެ ކަލަންޑަރުގައި ފާހަގަކުރަމުން މިދަނީ ރާއްޖޭގެ ޖީލުތަކާއި މުޖުތަމައުތައް ގުޅުވައިދޭ ސަގާފަތެއް ކަމަށްވާ "ސައި" ގެ މައްޗަށެވެ.
ޒަމާނުއްސުރެ ރާއްޖޭގެ ގޭގޭގައި ސަޔަކީ ހަމައެކަނި ބުއިމަކަށް ވުރެ މާ ބޮޑު އެއްޗެކެވެ. އެއީ ދުވަސް ފަށުމަށާއި، ބުރަ ދުވަހެއްގެ މެދުތެރެއިން ހަމަޖެހިލުމަށް ނަގާ ބްރޭކެއް ނުވަތަ އާޢިލާއާއި ރަހުމަތްތެރިން ބައްދަލުވާ ގޮތެކެވެ. "ހިނގާ ސަޔަށް؟" މި ލަފުޒަކީ ކޮންމެ ގުޅުމަކަށް، ކޮންމެ މުނާސަބަކަށް ފަހި ސުވާލެއް ކަމަށް އުރީދޫއިން ފާހަގަކުރެ އެވެ.
މި ސަގާފަތާ ގުޅުވައިގެން 2026 ވަނަ އަހަރުގެ ކަލަންޑަރުގައި ކޮންމެ މަހަކު ވެސް ތަފާތު ސައިގެ ބާވަތެއް ހިމެނިފަވާނެވެ. މި ކަލަންޑަރުގައި ގެނެސްދެވިފައިވާނީ ރާއްޖޭގެ އެކި ކަންކޮޅުތަކުގައި ލިބެން ހުންނަ މޭވާ އަދި މާމެލާމެލި ރަހަތައް ހިމެނޭ ސައި ކަމަށް އުރީދޫ އިން ބުނެ އެވެ.
ކަލަންޑަރުގައި ފާހަގަކުރަމުން މިދަނީ ރާއްޖޭގެ ޖީލުތަކާއި މުޖުތަމައުތައް ގުޅުވައިދޭ ސަގާފަތެއް ކަމަށްވާ "ސައި" / ފޮޓޯ: އުރީދޫ
ކަލަންޑަރުގެ ކޮންމެ ސަފްހާއަކުން ފެނިގެންދާނީ އެ ސައިތަކުގައި އެކުލެވިގެންވާ މައި ރަހައިގެ ބާވަތްތައް ކަމަށް އުރީދޫއިން ބުނެ އެވެ.
އުރީދޫ މޯލްޑިވްސް އިން މި އަހަރު ޑެސްކް ކަލަންޑަރުގެ އިތުރުން ފާރުގައި އަޅުވާ ކަލަންޑަރެއް އަދި ޑިޖިޓަލް ކަލަންޑަރެއް ވެސް ތައާރަފްކުރިއެވެ. ކޮންމެ މަހަކު ވެސް ދިވެހި ރަހަތައް ހިމެނިފައިވާ ހާއްސަ ގްރީންޓީ ބްލެންޑެއްގެ ޓީ ކޭކެއް ޑެސްކް ކަލަންޑަރާއެކު، ހިމެނިފައި ވާނެއެވެ.
މީގެ އިތުރުން ކަލަންޑަރުގެ ޑިޖިޓަލް ވާޝަނެއް ވެސް ލިބެން ހުންނާނެ އެވެ. އުރީދޫ މޯލްޑިވްސްގެ އުންމީދަކީ 2026 ވަނަ އަހަރުގެ ކަލަންޑަރަކީ ޑެސްކް، ފާރު އަދި ސްކްރީނުން ކޮންމެ ދުވަހެއްގެ އާދަކާދަގެތެރޭގައި ހިމެނޭ ކަލަންޑަރަކަށް ވެގެންދިޔުން ކަމަށް އުރީދޫއިން ބުނެ އެވެ.