ދެ އަހަރު ދުވަހުގެ ތެރޭގައި ރާއްޖޭގެ 10 ރަށެއްގައި އަލަށް ޑަޔަލިސިސްގެ ޚިދުމަތް ފަށާފައިވާ ކަމަށް ޞިއްޙީ ވަޒީރު ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ.
ދ. އަތޮޅު ހޮސްޕިޓަލުގައި ޑަޔަލިސިސްގެ ޚިދުމަތް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ނާޒިމް ވިދާޅުވީ ދ. އަތޮޅު ހޮސްޕިޓަލަކީ މި ވޭތުވެދިޔަ ދެ އަހަރު ތެރޭގައި މި ޚިދުމަތް ފެށި 10 ވަނަ ހޮސްޕިޓަލު ކަމަށެވެ.
މިކަމުގެ ސަބަބުން އެ ރަށްރަށުގެ ރައްޔިތުން ޑަޔަލިސިސް ހެދުމަށްޓަކައި އެހެން ރަށްރަށަށް ކުރަންޖެހޭ ދަތުރުތައް ހުއްޓި، ބޮޑު ލުޔެއް ލިބިގެންދާނެކަން ވަޒީރު ފާހަގަކުރެއްވިއެވެ.
ޑަޔަލިސިސްގެ ޚިދުމަތް އަލަށް ފަށާފައިވާ ތަންތަނަށް ބަލާލާއިރު، އާމިނާދިޔޯ ޞިއްޙީ މަރުކަޒު، ގއ. އަތޮޅު ހޮސްޕިޓަލް، ށ. އަތޮޅު ހޮސްޕިޓަލް، ނ. ވެލިދޫ ޞިއްޙީ މަރުކަޒު، މުލީ ރީޖަނަލް ހޮސްޕިޓަލް، ތ. އަތޮޅު ހޮސްޕިޓަލް، އއ. އަތޮޅު ހޮސްޕިޓަލް، އދ. އަތޮޅު ހޮސްޕިޓަލްގެ އިތުރުން ބ. ދަރަވަންދޫ ޞިއްޙީ މަރުކަޒު، އަދި ދ. އަތޮޅު ހޮސްޕިޓަލް ހިމެނެއެވެ.
މި ޚިދުމަތުގެ މުހިންމުކަމާ ގުޅޭގޮތުން ވާހަކަ ދައްކަވަމުން ވަޒީރު ވިދާޅުވީ، ޑަޔަލިސިސް ހަދަންޖެހޭ ބަލި މީހުންނަށް ނުވަތަ ބަލި މީހުންގެ އާއިލާއަަކަށް މެނުވީ އެކަމުން އުފުލަންޖެހޭ ތަކުލީފާއި ވޭން އިހުސާސް ނުކުރެވޭނެ ކަމަށެވެ. އެހެންކަމުން އެފަދަ އަސާސީ ޚިދުމަތެއް ރައްޔިތުން ތިބި ރަށަކުން ލިބޭނެ އިންތިޒާމު ހަމަޖެއްސުމަކީ ސަރުކާރުން ވަރަށް ބޮޑަށް އިސްކަމެއް ދޭ ކަމެއް ކަމުގައި ވަޒީރު ވިދާޅުވިއެވެ.
މި ޚިދުމަތް ޤާއިމު ކުރުމަކީ ގިނަ މަސައްކަތްތަކެއް އެކުލެވޭ ކަމެއްކަން ވަޒީރު ފާހަގަކުރެއްވިއެވެ. އަދި އޭގެ ތެރޭގައި ބޭނުންވާ އުމްރާނީ ތަރައްޤިއާއި، މެޝިނަރީޒް އަދި ސާމާނު ހޯދުމުގެ އިތުރުން، މިކަމަށް ބޭނުންވާ ފަންނީ މީހުން ތަމްރީނު ކުރުން ހިމެނޭ ކަމަށް ވަޒީރު ވިދާޅުވިއެވެ.
ޚިދުމަތް ދޭން ފެށި ގިނަ ރަށްތަކަކީ މީގެ ކުރިން އެކަމަށް ތަމްރީނުވެފައިވާ މީހުން ނެތް ރަށްތަކެއް ނަމަވެސް، މިހާރު އެ ރަށްރަށުގައި ތަމްރީނު ލިބިފައިވާ މުވައްޒަފުން ތިބެގެން ޚިދުމަތް ދެމުންދާނެ ކަމަށް ވަޒީރު ވިދާޅުވިއެވެ.
ޑަޔަލިސިސް ހެދުމަކީ، ބަލި މީހާއަށް އިތުރު ތަކުލީފުތަކެއް އުފުލަން ޖެހޭ ކަމެކެވެ. ހަފްތާއަކު 2 ދުވަސް ނުވަތަ 3 ދުވަހުވެސް ޑަޔަލިސިސް ހަދާ މީހުން މަދު ނޫންކަން ވަޒީރު ފާހަގަކުރެއްވި އެވެ. އެހެންނަމަވެސް ޒަމާނާއި އެއްގޮތަށް ބަލި މީހުންނަށް އިތުރު ތަކުލީފުތަކާއި ނުލާ ޑަޔަލިސިސް ހެދުމުގެ މަގު ވަނީ ފަހިވެގެން ގޮސްފައިކަން ފާހަގަކުރައްވާ ވަޒީރު ވިދާޅުވީ ރާއްޖޭގައި ޕެރިޓޯނިއަލް ޑަޔަލިސިސް ނުވަތަ ޑިވައިސެއްގެ އެހީގައި އަމިއްލައަށް ހެދޭ ޑަޔަލިސިސްގެ ޚިދުމަތް ދޭން ފަށާފައިވާކަމަށެވެ.
ރާއްޖޭގައި މިވަގުތު ޑަޔަލިސިސްގެ ޚިދުމަތް ނުފެށި އޮތީ، ވ. އަތޮޅުގެ އިތުރުން ފ.އަތޮޅުގައި ކަމަށް ވަޒީރު ވިދާޅުވިއެވެ. މި އަތޮޅުތަކުގައި މި ޚިދުމަތް ޤާއިމްކުރެއްވިއްޖެނަމަ ރައްޔިތުންނަށް ލުއިތަކެއް ލިބޭނެކަމަށާއި، ޚާއްޞަކޮށް އެކި ސަރަޙައްދުތަކުން އެ ޚިދުމަތް ލިބެން ފެށުމުން ކިޑްނީގެ ބައްޔަށް ފަރުވާ ހޯދުމާއި، ޚާއްޞަކޮށް އެޚިދުމަތް ހޯދުމަށް މާލެ އައުމާއި މާލެއަށް ދިރިއުޅުން ބަދަލުކުރަން ޖެހިފައިވާ މީހުން އަލުން އަމިއްލަ ވަޒަނުގައި ތިބެގެން ފަރުވާ ލިބޭނެ މަގު ފަހިވެގެންދާނެކަން ފާހަގަކުރެއްވިއެވެ.
އަމިއްލަ ރަށުގައި ޚިދުމަތް ނުފެށުނު ނަމަވެސް އަތޮޅު ވެރިކަން ކުރާ ރަށުގައި ޚިދުމަތް ހަމަޖެހިފައިވާނަމަ، އާރުޓީއެލް ފެރީގައި ކުރު ދަތުރެއް ކޮށްގެން ޚިދުމަތް ހޯދޭނެ މަގުފަހިވެވެން ދާނެކަމަށް ވަޒީރު މައުލުމާތުދެއްވިއެވެ. ނުވަތަ އަތޮޅުވެރިކަން ކުރާ ރަށުގައި މާލެ އަށްވުރެ ކުޑަ ޚަރަދެއް ކޮށްގެން ޚިދުމަތް ހޯދޭނެ އިންތިޒާމްތައް ހަމަޖެހިގެންދާނެއެވެ. މިކަމުން މި ބަލި ތަޙައްމަލު ކުރަމުންދާ މީހުންނަށާއި، އާއިލާތަކަށް އެތަށް ލުއިފަސޭހައެއް ލިބޭނެކަމަށް ވަޒީރު ވިދާޅުވިއެވެ.
ރާއްޖޭގައި ގައިންގަޔަށް ނާރާ ބޮޑެތި ބަލިތަކުގެ ތެރޭގައި އެންމެ ގިނައިން ބޭސްފަރުވާއަށް ރާއްޖެއިން ބޭރަށް ދިޔުމަށް ދައުލަތުން ޚަރަދުކުރާ އެއް ބައްޔަކީ ކިޑްނީގެ ބަލިތަކެވެ. ކިޑްނީ ބަލީގެ ފަރުވާ ރާއްޖޭގައި ފުޅާކުރުމަށް ސަރުކާރުން އަންނަނީ މަސައްކަތް ކުރައްވަމުންނެވެ. ކިޑްނީ ބަލީގެ ސަބަބުން ހަފްތާއަކު ދެތިން ދުވަހު ޑަޔަލިސިސްގެ ޚިދުމަތް ހޯދަންޖެހޭ މީހުންގެ ޢަދަދު އަންނަނީ އިތުރުވަމުންނެވެ.
މި ޚިދުމަތް މާލެއާއި އަތޮޅުތަކުގެ ރަށްތަކުގައި ފުޅާކުރުމަށް ސަރުކާރުންވަނީ މަޝްރޫޢެއް ފައްޓަވާފައެވެ. މި މަޝްރޫޢުގެ ދަށުން އެންމެފަހުން ޑަޔަލިސިސްގެ ޚިދުމަތް ފަށާފައިވަނީ، ދ. އަތޮޅު ހޮސްޕިޓަލުގައެވެ.