މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާސް (މަޓާޓޯ) އިން، "ލަސްވޭގަސް ޓްރެވަލް އެޖެންޓް ފޯރަމް" ގައި ބައިވެރިވުމުގެ ފުރުސަތު ހުޅުވާލައިފިއެވެ.
މަޓާޓޯ އިން އާންމުކޮށްފައިވާ ބަޔާނެއްގައި ބުނީ 2026 ވަނަ އަހަރުގެ މެއި މަހުގެ 12 އިން 15 އަށް އެމެރިކާގެ ލަސްވޭގަސްގެ ޕެރިސް ލަސްވޭގަސް ހޮޓެލް އެންޑް ކެސީނޯގައި ބޭއްވުމަށް ހަމަޖެހިފައިވާ "ލަސްވޭގަސް ޓްރެވަލް އެޖެންޓް ފޯރަމް" ގައި ބައިވެރިވުމުގެ ފުރުސަތު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ހުޅުވާލާފައިވާކަމަށެވެ.
އެމެރިކާއަކީ ރާއްޖެއަށް އެންމެ ގިނައިން ފަތުރުވެރިން އަންނަ 10 ގައުމުގެ ތެރޭގައި ހިމެނޭ ގައުމެއްކަން މަޓާޓޯގެ ސާކިއުލާގައި ފާހަގަކޮށްފައިވެއެވެ. އެހެންކަމުން، އުތުރު އެމެރިކާގެ މާކެޓުގައި ރާއްޖޭގެ މަގުބޫލުކަން އިތުރުކުރުމަށްޓަކައި މިފަދަ ހަރަކާތްތަކުގައި ބައިވެރިވުމަކީ ކޮންމެހެން މުހިންމު ކަމެއްކަމަށް މަޓާޓޯ އިން ބުނެއެވެ.
މި ފޯރަމުގައި ރާއްޖޭގެ ފަރާތުން ބައިވެރިވާ ފަރާތްތަކުގެ ކަންކަން ވިލަރެސްކޮށް، އިސްކޮށް ހަރަކާތްތެރިވާނީ މަޓާޓޯއިން ކަން ފާހަގަކޮށް، މި ދައުރުގެ ދަށުން މަޓާޓޯއިން އިވެންޓް އިންތިޒާމުކުރާ ފަރާތްތަކާ ގުޅުން ބަހައްޓައި، ބައިވެރިން ރެޖިސްޓްރީ ކުރުމުގެ ކަންކަން ހަމަޖައްސައިދިނުމުގެ އިތުރުން، މި ފޯރަމުގައި ރާއްޖޭގެ ފަރާތުން ފަންނީ އަދި ފުރިހަމަ ތަމްސީލުތަކެއް ދެއްކުމަށް މަސައްކަތް ކުރާނެ ކަމަށް މަޓާޓޯ އިން މައުލޫމާތުދެއެވެ.
މި ފޯރަމުގައި ބައިވެރިވުމުގެ ފުރުސަތު ރިސޯޓުތައް، ހޮޓެލް ގްރޫޕްތައް، ޑެސްޓިނޭޝަން މެނޭޖްމަންޓް ކުންފުނިތައް، ޓްރެވަލް އެޖެންޓުން، ލިވްއެބޯޑް އޮޕަރޭޓަރުން، އެއާލައިންތައް އަދި ފަތުރުވެރިކަމުގެ ދާއިރާގެ އެހެނިހެން ޚިދުމަތްދޭ ފަރާތްތަކަށް ހުޅުވާލާފައިވާކަމަށް މަޓާޓޯ އިން މައުލޫމާތުދެއެވެ. އަދި ބައިވެރިވުމަށް ބޭނުންވާ ފަރާތްތަކަށް، އެކި ފަންތީގެ ބޫތުތަކާއި ޕެކޭޖްތައް މަޓާޓޯގެ ސާކިއުލާގައި ބަޔާންކޮށްފައިވާނެކަމަށް ބުނެއެވެ.
މި ފޯރަމުގައި ބައިވެރިވާން ޝައުގުވެރިވާ ފަރާތްތަކުން، މަޓާޓޯގެ ސާކިއުލާ ރަނގަޅަށް ދިރާސާކުރުމަށްފަހު، ކަނޑައެޅިފައިވާ ސުންގަޑީގެ ކުރިން "އެކްސްޕްރެޝަން އޮފް އިންޓްރެސްޓް" ހުށަހެޅުމަށް އެ ޖަމިއްޔާއިން އިލްތިމާސްކުރެއެވެ.
ލަސްވޭގަސް ޓްރެވަލް އެޖެންޓް ފޯރަމަކީ އެމެރިކާ އާއި ކެނެޑާގެ 1،000 އަށްވުރެ ގިނަ، ފާހަގަކޮށްލެވޭ ޓްރެވަލް އެޑްވައިޒަރުން ބައިވެރިވާ ބީ.ޓު.ބީ އުސޫލުން ކުރިއަށްގެންދާ ބޮޑު ހަރަކާތެކެވެ. މީގެ ތެރޭގައި ދުރު މަންޒިލްތަކަށާއި ލަގްޒަރީ ފަތުރުވެރިކަމަށް މީހުން ފޮނުވުމުގައި ނުފޫޒުގަދަ، އަދި ވިޔަފާރީގެ ރަނގަޅު ރެކޯޑްތަކެއް އޮތް އެޖެންޓުން ހިމެނެއެވެ. މި ފޯރަމަކީ އުތުރު އެމެރިކާގެ ޓްރެވަލް އެޑްވައިޒަރުންނާ ސީދާ ބައްދަލުކޮށް، ކުރިއާލާ ރޭވިފައިވާ ވަކިވަކި ބައްދަލުވުންތަކާއި، މަޝްވަރާ ބައްދަލުވުންތަކުގެ އިތުރުން ނެޓްވޯކިންގ ސެޝަންތަކުގެ ޒަރީއާއިން ގުޅުން ބަދަހިކުރުމަށް ލިބޭ ވަރަށް ފަހި ފުރުސަތެކެވެ.