ކުރިއަށް އޮތް ލޯކަލް ކައުންސިލް އިންތިޚާބުގައި ވާދަކުރުމަށް ހުޅުވާލި ފުރުސަތުގައި މިހާތަނަށް ކައުންސިލްތަކަށް ވާދަކުރުމަށް 933 ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އިލެކްޝަންސް ކޮމިޝަނުން ދައުލަތުގެ މީޑިއާ އަށް މައުލޫމާތު ދެމުން ބުނީ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގައި ވާދަކުރުމަށް ހަފުތާއެއްގެ ތެރޭގައި 1،633 ފޯމު ހުށަހަޅާފައިވާ ކަމަށެވެ. އެއީ ކައުންސިލްތަކަށް ވާދަކުރުމަށް ހުށަހެޅި 933 ފޯމާއި އަންހެނުންގެ ކޮމިޓީތަކަށް ވާދަކުރުމަށް ހުށަހެޅި 700 ފޯމުކަމަށް އީސީ އިން މައުލޫމާތުދެއެވެ.
ކައުންސިލްތަކަށް ވާދަކުރުމަށް ސިޔާސީ ޕާޓީތަކުން މިހާތަނަށް 750 ފޯމު ހުށަހަޅާފައިވާ ކަމަށާއި އޭގެ ތެރެއިން ޝަރުތުފުރިހަމަވާ ކަމަށް ކަނޑައަޅާފައިވަނީ 617 މީހުންގެ ކަމަށް އީސީ އިން ބުނެއެވެ. އަދި ޕާޓީތަކުން ހުށަހެޅި ފޯމުތަކުގެ ތެރެއިން 113 ފޯމެއް ޝަރުތު ހަމަނުވާ ކަމަށް ކަނޑައަޅާފައިވާކަން ފާހަގަކޮށް އޭގެ ތެރެއިން 41 ފަރާތަކުން އަލުން ފޯމު ހުށަހަޅާފައިވާ ކަމަށްވެސް އިސީ އިން ބުނެއެވެ.
ކައުންސިލްތަކަށް އަމިއްލަ ގޮތުން ވާދަކުރަން 203 ފޯމު ހުށަހަޅާފައިވާއިރު އޭގެ ތެރެއިން 133 މީހުންގެ ޝަރުތު ފުރިހަމަވާއިރު 70 މީހުންގެ ޝަރުތު ފުރިހަމަ ނުވާ ކަމަށް އީސީ އިން ކަނޑައަޅާފައިވާކަމަށް ބުނެއެވެ. އަދި އޭގެތެރެއިން ޝަރުތު ހަމަނުވާ ކަމަށް ކަނޑައެޅި ފޯމުތަކުގެ ތެރެއިން 36 މީހަކު އަލުން ފޯމު ހުށަހަޅާފައިވާ ކަމަށްވެސް މައުލުމާތުދެއެވެ.
އަންހެނުންގެ ކޮމިޓީތަކަށް ސިޔާސީ ޕާޓީތަކުން މިހާތަނަށް 565 ފޯމު ހުށަހަޅާފައިވާއިރު ޝަރުތު ހަމަވަނީ 488 މީހުންގެ ކަމަށާއި ޝަރުތު ހަމަނުވާކަމަށް ކަނޑައެޅި 77 މީހުންގެ ތެރެއިން 15 މީހަކު އަލުން ފޯމު ހުށަހަޅާފައިވާ ކަމަށް އީސީ ބުނެއެވެ. އަދި އަމިއްލަގޮތުން ވާދަކުރަން ފޯމު ހުށަހެޅި 135 މީހުންގެ ތެރެއިން 86 މީހެއްގެ ޝަރުތު ފުރިހަމަވާކަމަށް ކަނޑައަޅާފައިވާކަމަށް އީސީ އިން މައުލޫމާތުދެއެވެ.
އީސީ އިން ކައުންސިލް އަދި އަންހެނުންގެ ކޮމިޓީ އިންތިޚާބުގައި ވާދަކުރަން ހުޅުވާލި މި މަހުގެ 17 ވަނަ ދުވަހުއެވެ.
ކޮންމެ ކެނޑިޑޭޓަކުވެސް ފޯމް ހުށަހަޅާއިރު ސަމާލުކަން ދޭން ޖެހޭ މުހިންމު ބައެއް ކަންކަން އީސީ އިން ވަނީ ހާމަކޮށްފައެވެ. އޭގެތެރެއިން އެއް ކަމަކީ ޕޯޓަލް މެދުވެރިކޮށް ފޯމް ހުށަހެޅޭނެ ވަގުތެވެ. އިލެކްޝަންސް ކޮމިޝަނުން ފުރުސަތު ހުޅޫވާލުމުގެ ފޯމު ހުށަހެޅުމުގެ ފުރުސަތު އޮންނާނީ ރަސްމީ ގަޑިތަކުގައެވެ. އެގޮތުން ހުކުރު ދުވަސް ފިޔަވާ ކޮންމެ ދުވަހަކު ހެނދުނު 8:30 އިން 15:30 އަށް ފޯމް ބަލައިގަންނާނެ ކަމަށާއި ހުކުރު ދުވަހު 15:30 އިން 18:00 އަށް ފޯމް ބަލައިގަންނަމުންދާނެ ކަމަށް އީސީ އިން ބުނެއެވެ.