އެމެރިކާގެ ނިއުޔޯކްގައި ކުރިއަށް ގެންދާ ޓްރެވަލް އެންޑް އެޑްވެންޗާ ޝޯވގައި ރާއްޖެއިން ބައިވެރިވެއްޖެއެވެ.
ޖަނަވަރީ 24 އިން 25 ގެ ނިޔަލަށް ކުރިއަށް ގެންދާ ޓްރެވަލް އެންޑް އެޑްވެންޗާ ޝޯވގައި ރާއްޖެއިން ބައިވެރިވެފައިވަނީ ވިޒިޓް މޯލްޑިވްސް ކޯޕަރޭޝަނާއި އދ. އަށް ކަނޑައަޅާފައިވާ ދިވެހިރާއްޖޭގެ ދާއިމީ މިޝަން ގުޅިގެންނެވެ.
ވިޒިޓް މޯލްޑިވްސް އިން އާންމުކޮށްފައިވާ ބަޔާނެއްގައި ބުނީ މި ހަރަކާތުގެ ތެރެއިން ރާއްޖެއާ ގުޅޭ މައުލޫމާތުތައް ފަތުރުވެރިން އަދި ވިޔަފާރިތަކާ ހަމައަށް ފޯރުކޮށްދީފައިވާނެކަމަށެވެ.
ވިޒިޓް މޯލްޑިވްސްއިން ބުނީ ފަތުރުވެރިން ރާއްޖެއާ މެދު ހޯދަން އެންމެ ޝައުގުވެރިވާ މައުލޫމާތުތައް ޑިޖިޓަލް ވަސީލަތްތަކުގެ އެހީގައި އެފަރާތްތަކަށް ފޯރުކޮށްދިނުމުގެ އިތުރުން، އެ ސަރަހައްދުގެ ފަތުރުވެރިންގެ ތެރޭގައި މަގުބޫލު ކަންކަން ދެނެގަތުމަށް ހާއްސަ ސާވޭއެއް ވެސް މި ފޯރަމްގެ ތެރެއިން ކުރިއަށް ގެންގޮސްފައިވާނެ ކަމަށެވެ.
މި ފޯރަމްގައި ރާއްޖޭގެ ސްޓޯލަށް ޒިޔާރަތްކުރާ ފަރާތްތަކުގެ މެދުގައި ގުރުވަތު ނަގައި، ހާއްސަ އިނާމުތަކެއް ދިނުން ފަދަ ޝައުގުވެރި ހަރަކާތްތައް މި ޓްރެވަލް އެންޑް އެޑްވެންޗާ ޝޯގައި ކުރިއަށް ގެންދިޔަ ކަމަށްވެސް ވިޒިޓްމޯލްޑިވްސް އިން ބުނެއެވެ.
މި ހަރަކާތުގެ ތެރެއިން އެމެރިކާއަށް ކަނޑައަޅުއްވާފައި ހުންނަވާ ދިވެހިރާއްޖޭގެ ސަފީރު އަދި އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު، ޑރ. ޢަލީ ނަޞީރު މުޙައްމަދު، ކުރިއަށް ގެންދިޔަ ޕެނަލް މަޝްވަރާއެއްގައި ބައިވެރިވެވަޑައިގެންނެވި ކަން ފާހަގަކޮށް ވިޒިޓް މޯލްޑިވްސް އިން ބުނީ މި މަޝްވަރާގައި، ދުނިޔޭގެ ފަތުރުވެރިކަމުގައި ރާއްޖެއަށް އޮތް މަޤްބޫލުކަމާއި، ދެމެހެއްޓެނިވި އަދި ޒިންމާދާރު ގޮތެއްގައި ފަތުރުވެރިކަން ކުރިއެރުވުމަށް ރާއްޖެއިން ކުރަމުންދާ މަސައްކަތްތަކަށް އޭނާ އަލިއަޅުއްވާލެއްވިކަމަށެވެ.
ދުނިޔޭގެ ފަތުރުވެރިކަން އަލުން އާރާސްތުވަމުންދާއިރު، އެމެރިކާގެ މާކެޓުގައި ރާއްޖެއަށް އޮތް މަޤްބޫލުކަން ދަނީ އިތުރުވަމުންނެވެ. އެގޮތުން، 2019 ވަނަ އަހަރު އެމެރިކާއިން 47,891 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، 2025 ވަނަ އަހަރު މި ޢަދަދު ވަނީ 66,443 އަށް އިތުރުވެފައެވެ. މިއީ ދުރު ރާސްތާގެ ޗުއްޓީ މަންޒިލެއްގެ ގޮތުގައި އެމެރިކާގެ ފަތުރުވެރިންގެ މެދުގައި ރާއްޖެއަށް އޮތް ދެމެހެއްޓެނިވި ޝައުޤުވެރިކަން ހާމަކޮށްދޭ ކަމެއްކަމަށް ވިސިޓްމޯލްޑިވްސް އިން ބުނެއެވެ.
ފަތުރުވެރިކަމުގެ މިފަދަ ބޮޑު ހަރަކާތެއްގައި ބައިވެރިވުމުގެ ސަބަބުން، ރާއްޖެއަކީ މަތީ ފަންތީގެ ޚިދުމަތްތަކާއި، ރާއްޖޭގައި ފަތުރުވެރިންނަށް ހުރި ތަފާތު ފުރުސަތުތަކާއި، ތަޖުރިބާތަކެއް ލިބިގެންދާނެ ދުނިޔޭގެ ފެންވަރުގެ މަންޒިލެއްގެ ގޮތުގައި އޮތް އޮތުން އިތުރަށް ހަރުދަނާވެގެންދާނެ ކަމަށް ވިސިޓްމޯލްޑިވްސް އިން މައުލޫމާތުދެއެވެ.
ދެ ދުވަހުގެ މުއްދަތަށް ނިއުޔޯކްގެ ޖެވިޓްސް ސެންޓަރުގައި ކުރިއަށް ގެންދިޔަ މި ޓްރެވަލް އެންޑް އެޑްވެންޗާ ޝޯވއަކީ އުތުރު އެމެރިކާގައި ބާއްވޭ އެންމެ ބޮޑު އެއް ފަތުރުވެރިކަމުގެ ފޯރަމެވެ. މި ފޯރަމަށް ޓްރެވަލް އެޑްވައިޒަރުންގެ އިތުރުން ބައިނަލްއަގުވާމީ މީޑިއާތައް ހިމެނޭހެން 20،000 އަށްވުރެ ގިނަ މީހުން ޒިޔާރަތްކުރެއެވެ. މިއީ މަތީ ފަންތީގެ ތަފާތު ތަޖުރިބާތަކަށް ޝައުގުވެރިވާ އެމެރިކާގެ ކަސްޓަމަރުންނާ ސީދާ ގޮތެއްގައި ގުޅުން ބަދަހިކުރުމަށް ލިބޭ ވަރަށް މުހިންމު ފުރުސަތެއްކަން ވިސިޓްމޯލްޑިވްސް އިން ފާހަގަކުރެއެވެ.