ރާއްޖޭގެ ކޮންމެ އަތޮޅެއްގައި ދަތުރުދާނެ ރަށެއް ނުވަތަ ޕިކްނިކް އައިލެންޑެއް ތަރައްގީކުރުމަށް ބޭނުންވާ ކޮންސަލްޓަންސީ ދޭނެ ބަޔަކު ހޯދުމަށް ކުރި އިއުލާނު ބާތިލުކޮށްފި އެވެ.
މިނިސްޓްރީ އޮފް ސޯޝަލް ޑިވެލޮޕްމެންޓުން މިއަދު ސަރުކާރުގެ ގެޒެޓުގައި ޝާއިރުކުރި އިއުލާނެއްގައި ބުނެފައިވަނީ ރާއްޖޭގެ ހުރިހާ އަތޮޅެއްގައި ދަތުރު ދިއުމަށް ހާއްސަ ރަށެއް ތަރައްގީކުރުމަށް ސަރުކާރުން ހިންގާ "ޕިކްނިކް އައިލެންޑް ޑިވެލޮޕްމަންޓް ޕްރޮޖެކްޓަށް" ކޮންސަލްޓަންސީ މަސައްކަތް ކޮށްދޭނެ ބަޔަކު ހޯދަން ކުރި އިއުލާނު މިހާރު ބާތިލުކޮށްފައިވާ ކަމަށެވެ.
މިނިސްޓްރީން ބާތިލު ކުރި އިއުލާނުގައި ވަނީ އެ މަސައްކަތުގެ ބީލަން ހުށަހަޅަން ބޭނުންވާ ފަރާތްތަކުން މިމަހުގެ 21 ވަނަ ދުވަހުގެ 14:00 ގެ ކުރިން ބީލަމުގައި ރަޖިސްޓްރީ ކުރަންވާނެ ކަމަށެވެ. އަދި މިމަހުގެ 28 ވަނަ ދުވަހުގެ ހެނދުނު 10:00 ޖެހުމާ ހަމައަށް އަންދާސީ ހިސާބު ހުށަހެޅުމުގެ ފުރުސަތު އޮންނާނެ ކަމަށްވެސް ބުނެފައިވެ އެވެ.
ރާއްޖޭގެ ކޮންމެ އަތޮޅަކުން މަދުވެގެން އެއް ރަށް ދަތުރުދާން ހާއްސަކޮށް، ސަރުކާރުން ތަރައްގީކޮށްދޭނެ ކަަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ މިދިޔަ އަހަރު އެމަނިކުފާނު ރައްޔިތުންނާ ބައްދަލު ކުރެއްވުމަށް ރަށްރަށަށް ކުރެއްވި ދަތުރުފުޅުގެ ތެރޭގަ އެވެ.
ރައީސް އޭރު ވިދާޅުވެފައިވަނީ، ދަތުރުދާނެ ވަކި ރަށެއް ކޮންމެ އަތޮޅެއްގައި ތަރައްގީކުރުމުން، އެ އަތޮޅެއްގައި ލޯކަލް ޓޫރިޒަމް ކުރިއެރުވުމަށްވެސް ބޮޑެތި ފަސޭހަތަކެއް ލިބިގެންދާނެ ކަމަށެވެ.
މި އިއުލާނު ބާތިލުކުރި ވަކި ސަބަބެއް މިނިސްޓްރީން ހާމަކޮށްފައެއް ނުވެ އެވެ.