ގޯއްޗާއި ފްލެޓް ދިނުމުގައި އެންމެ އިސްކަން ދޭނީ އެއްވެސް ބޯހިޔާވަހިކަމެއް ނެތް އާއިލާތަކަށް ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ސޯޝަލް މީޑިއާގައި މިނިސްޓަރު މުއްތަލިބް އާންމުކުރެއްވި ބަޔާނެއްގައި ވިދާޅުވީ ސަރުކާރުން އަލަށް ތައާރަފުކުރި "އާއިލީ ބޯހިޔާވަހިކަން" މަޝްރޫއުގެ ދަށުން ފުރުސަތު ދިނުމުގައި އެންމެ އިސްކަން ދޭނީ އެއްވެސް ބޯހިޔާވަހިކަމެއް ނެތް އާއިލާތަކަށް ކަމަށެވެ.
މިނިސްޓަރު ވިދާޅުވީ މި ސިޔާސަތު ބައްޓަންކޮށްފައިވަނީ މުއްސަނދިކަން އިތުރުކުރަން ބޭނުންވާ ފަރާތްތަކަށްވުރެ ބޮޑަށް، އަމިއްލަ ބިމެއް ނުވަތަ ގެދޮރެއް ނެތް އާއިލާތަކަށް އިސްކަންދޭ ގޮތަށް ކަމަށެވެ. އަދި ބޯހިޔާވަހިކަމަކީ މާލީ މަންފާއެއް ހޯދުމަށް އޮތް ވަސީލަތަކަށްވުރެ ބޮޑަށް، އިންސާނީ ކަރާމާތާ ގުޅިފައިވާ އަސާސީ ބޭނުމެއްގެ ގޮތުގައި ސަރުކާރުން ބަލާކަމަށްވެސް މިނިސްޓަރު ފާހަގަކުރެއްވިއެވެ.
ގްރޭޓާ މާލެ ސަރަހައްދުން 400 އަކަފޫޓަށްވުރެ ބޮޑު ބިމެއް ދެމަފިރިންކުރެ މީހެއްގެ ނަމުގައި އޮތްނަމަ އެއީ ޝަރުތު ހަމަނުވާނެ ކަމެއްގެ ގޮތުގައި ކަނޑައަޅާފައިވާކަން ފަހަގަކޮށް އެއް ކޮޓަރި ނުވަތަ ދެ ކޮޓަރީގެ އެޕާޓްމަންޓެއް އޮތް ނަމަވެސް 18 އަހަރުން ދަށުގެ ކުދިން ތިބި އާއިލާތަކަށް މި މަޝްރޫއަށް ކުރިމަތިލެވޭނެ ކަމަށް ޑރ. މުއްތަލިބު މައުލުމާތުދެއްވިއެވެ.
ސަރުކާރުގެ މި ސިޔާސަތުގެ މައިގަނޑު ފަލްސަފާއަކީ "ޒީރޯ އެކްސެސް" ނުވަތަ އެއްވެސް ގޮތެއް ނެތް އާއިލާތަކަށް ފުރުސަތު ދިނުން ކަމަށް މިނިސްޓަރު ވިދާޅުވިއެވެ.
މިވަގުތު ޝަރުތުތައް ހަރުކަށިކޮށްފައިވަނީ ބޯހިޔާވަހިކަމަށް އޮތް ޑިމާންޑާއި ސަރުކާރަށް ފޯރުކޮށްދެވެން ހުރި މިންވަރަށް ބަލައިގެން ކަމަށާއި، މިއީ ދާއިމީ ކަމެއް ނޫން ކަމަށްވެސް މިނިސްޓަރު ވިދާޅުވިއެވެ. އަދި ސަރުކާރުން ކުރިއަށްގެންދާ ސޯޝަލް ހައުސިން މަޝްރޫއުތަކާއި ގޯތި ދިނުމުގެ މަޝްރޫއުތަކާއެކު، ކޮންމެ އާއިލާއަކަށް މަދުވެގެން އެއް ބޯހިޔާވަހިކަން ކަށަވަރުވުމުން މި ސިޔާސަތުތަކަށް ލުއިތަކެއް ލިބިގެންދާނެ ކަމަށް އޭނާ ވިދާޅުވިއެވެ.
މިނިސްޓަރ އިތުރަށް ވިދާޅުވީ ބޯހިޔާވަހިކަމުގެ ބޭނުންތެރިކަން ވަޒަންކުރަނީ ވަކިވަކި ފަރުދުންގެ ފެންވަރުގައި ނޫން ކަމަށާއި، އެއީ މުޅި އާއިލާގެ އާމްދަނީއާއި ދިރިއުޅުމުގެ ހާލަތަށް ބަލައިގެން ކަމަށެވެ.
ސަރުކާރުން މިހާރު ހުޅުވާލައިފައިވާ 'ބޯހިޔާވެހިކަން އެންމެނަށް' ސްކީމްގައި ދެމަފރިންނަށް ބޯހިޔާވެހިކަމަށް ކުރިމަތިނުލެވޭގޮތް ވަނީ ހަދައިފައެވެ. އެގޮތުން ދެމަފިރިން ކުރެ މީހެއްގެ ނަމުގައި މާލޭގައި ބިމެއް އޮތްނަމަ، އެ ފަރާތަކަށް ބޯހިޔާވެހިކަމަށް ޝަރުތުހަމައެއް ނުވޭނެއެވެ. އަދި އޭގެއިތުރުން މާލޭގައި 400 އަކަފޫޓަށްވުރެ ބޮޑު ބިމެއް އޮތް މީހެއްނަމަވެސް ބޯހިޔާވެހިކަމަށް ޝަރުތުހަމައެއް ނުވާނެއެވެ. 400 އަކަފޫޓަށްވުރެ ކުޑަ ބިމެއް ނަމަ، ޝަރުތުހަމަވާނީ އެ ބިމެއްދޫކޮށްލަން އެއްބަސްވާނަމަ އެކަނިއެވެ.