"މުސްލިމް ޓްރެވަލް ޝޯ" ގައި ބައިވެރިވުމަށް އިންޓަރނޭޝަނަލް ހަލާލް ޓޫރިޒަމް އޮގަނައިޒޭޝަން (އައި.އެޗް.ޓީ.އޯ) އިން ނިންމައިފިއެވެ.
އައި.އެޗް.ޓީ.އޯ އިން ބުނީ، ފެބްރުއަރީ 7 އިން 8 އަށް ލަންޑަންގެ އެކްސެލްގައި ބާއްވާ ދުނިޔޭގެ އެންމެ ބޮޑު މުސްލިމް ދަތުރުފަތުރުގެ ހަރަކާތް ކަމަށްވާ 'މުސްލިމް ޓްރެވަލް ޝޯ' ގައި ދިވެހިރާއްޖެ ބައިވެރިވާނެކަމަށެވެ.
މިއީ އައި.އެޗް.ޓީ.އޯ އިން އިސްވެ ކުރިއަށްގެންދާ ހަރަކާތެއްކަމަށް ވަނީ ބުނެފައެވެ. އަދި މި ހަރަކާތަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (ވިޒިޓް މޯލްޑިވްސް)، މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާސްގެ އިތުރުން މޯލްޑިވްސް ބޯޓިންގ އެސޯސިއޭޝަން އަދި ނޭޝަނަލް ހޮޓެލްސް އެންޑް ގެސްޓް ހައުސް އެސޯސިއޭޝަން އޮފް މޯލްޑިވްސްގެ ރަސްމީ ތާއީދު ލިބިފައިވާކަމަށް އައި.އެޗް.ޓީ.އޯ މައުލޫމާތުދެއެވެ.
މި ހަރަކާތުގައި ބައިވެރިވުމަކީ ހަލުވިކަމާއެކު ކުރިއަރަމުން އަންނަ ދުނިޔޭގެ ހަލާލް ފަތުރުވެރިކަމުގެ ބާޒާރުގައި ރާއްޖޭގެ ދައުރު ފުޅާކޮށް، މަގުބޫލުކަން އިތުރުކުރުމަށް އެޅޭ މުހިންމު އިސްތިރާތީޖީ ފިޔަވަޅެއްކަމަށް އައި.އެޗް.ޓީ.އޯ އިން ބުނެއެވެ.
މުސްލިމް ޓްރެވަލް ޝޯއަކީ ހަލާލް އަދި މުސްލިމުންނަށް ބޭނުންވާ ފަތުރުވެރިކަމުގެ ޚިދުމަތްތައް ފޯރުކޮށްދިނުމުގައި ދުނިޔޭގެ ފެންވަރުގައި ބަލައިގަނެވިފައިވާ އެންމެ ބޮޑު އެއް މާހައުލެވެ.
2026 ވަނަ އަހަރުގެ މި ހަރަކާތުގައި ރާއްޖެއަށް މުހިންމު ބައިތަކަށް ބަލާލާއިރު މި ޝޯގައި މުސްލިމް ފަތުރުވެރިކަމާ ގުޅޭ އައު އިސްތިރާތީޖީ ސިޔާސަތުތައް ތައާރަފްކުރުން، އިސްލާމީ އުސޫލުތަކާ އެއްގޮތަށް ފޯރުކޮށްދޭ ޚިދުމަތްތަކާއި ވަސީލަތްތައް ދައްކާލުން، ވިޔަފާރިވެރިންނާއި މުސްލިމް ފަތުރުވެރިންނާ ސީދާ ބައްދަލުކޮށް މުއާމަލާތްކުރުން، ދިގުމުއްދަތުގެ ވިޔަފާރި ގުޅުންތަކާއި ޚިދުމަތް ފޯރުކޮށްދޭނެ އައު މަގުތައް ބިނާކުރުން ހިމެނެއެވެ.
މި ހަރަކާތަކީ ދިވެހިރާއްޖޭގެ ފަތުރުވެރިކަމުގެ ދާއިރާ ބައިނަލްއަގުވާމީ މައިދާނުގައި އިޝްތިހާރުކޮށް، ހިދުމަތްތައް ދައްކާލުމަށް ލިބޭ ވަރަށް މުހިންމު ފުރުސަތެއް ކަމަށް އައި.އެޗް.ޓީ.އޯ އިން ވަނީ ބުނެފައެވެ.